Read Masana GATTA-SEM-MA'TA 16 Bible Online

GATTA-SEM-MA'TA 16 - Masana bible

GATTA-SEM-MA'TA 16

¹Nigi ma li kuɗ tilla vi feɗna, nigi ma li Paskata kaw kay subur Ma-Vatɗina, Lawna vigiya, kay Ma-Vatɗina Lawna vigi kalgiyay goy hay Egipte pa kayni hay tilla vi feɗna, kayn hay henjeta.

²Nigi ma li ɗifinna vi Paskata tam Ma-Vatɗina Lawna vigiya, nigi ma ŋat luwayna hiɗi fokŋa hay liyn ma Ma-Vatɗina Lawna vigiya vilekemawa kay tun semda valam haya.

³Hay buura vi yuldet ɗawni, nigi ma ti fun ma hiɗi kufnaɗi, may nigi ma ti fun-bay-kufna buur siɗiya, fun ma lasta, kay nigi kal ay goy hay Egipte pa kayni hiɗi sukgi kelgiya: Nala humgi ma gigi kay buura irita vigi kaf kay buur ma nigi kali goy hay Egipte pa.

⁴Hay nagata vigi noŋ kaf kayni sa as wi kufnɗi ta-ta ir buur siɗiya; sliw ma nigi ŋatamna ma nigi lum ɗifini hay vulatita vi buur ma jewna as hinim kulo'o kay ta-ta grawtaɗi.

⁵Nigi as li ɗifinna vi Paskata hay liyn marige kaw ma Ma-Vatɗina vulgiya kay nigi ma lak ziy hayamnaɗi;

⁶may nigi as li ɗifinna vi Paskata kayni hay liyn ma Ma-Vatɗina vilekemu kay tun semda valam haya hay vulatita, hay li ma fatta ɗik gaa'a, ŋray dig liyn ma nigi kali goy hay Egiptena.

⁷Va ma ŋatamna nigi ma zalam sliwamu, nigi as tumu hay liyn ma Ma-Vatɗina Lawna vigi vilekemna. Hay graw culumta nigi ma hot vo'o hay guɗukŋa vigiya may.

⁸Ir buur karkiya, nigi ma ti fun-bay-kufna, hay buurta siɗiyat ɗawni, nigi ma li dakka ŋolda ta vat yuldeta hay semda vi Ma-Vatɗina Lawna vigiya. Nigi ma li lopɗi.

⁹Nigi ma ŋaɓ lumut siɗiya, tun caw kayni hiɗi zana vi alkamarena ma kulo kay selemna.

¹⁰Bugol kayni nigi ma li yuldeta vi lumuna hay semda vi Ma-Vatɗina Lawna vigiya, vulda ta kuɗ minda ta nigi vula' tam Ma-Vatɗina na' ma li ŋray ki bolda ta Ma-Vatɗina Lawna vigiya li tigi nala.

¹¹Nigi ma li firita vok Ma-Vatɗina Lawna vigiya, hay liy ma Ma-Vatɗina Lawna vigi vilekemu kay tun semda valam haya, kayn di ala nigiya, goora hiɗi goota vigiya, sa ma gorvona hiɗi gorvota vigiya, sa ma Levitna ma ka musi ziy jargiya, sa ma pulla, sa ma kuyuna hiɗi cata duhulta sa ka li ziy jargiya kaw.

¹²Humgi ma gigi ala nigi ay gorvo'o hay Egipte, nala dita vi Ma-Vatɗina nigi ma ŋoma'a, li kuɗa'a kaw.

¹³Nigi ma li yuldeta vi tabernaklena ir buur siɗiya bugol nigi feɗ wanawa, ja gulda-guldanawa kaw.

¹⁴Nigi ma li firiya hay li ma nigi li yuldet na'ta: Nigiya, goora vigiya hiɗi goota vigiya, gorvona hiɗi gorvota vigiya, sa ma Levitna, sa ma pulla, hiɗi cata duhulta ta ka li ziy jargiya kaw.

¹⁵Nigi ma li yuldeta ir buur siɗiya hay semda vi Ma-Vatɗina Lawna vigiya, hay liyn ma Ma-Vatɗin ma vilekemna; kay Ma-Vatɗina Lawna vigiya ma gigi bolo hay slen ma nigi feɗemna kaf, hay lop ma nigi lumna kaf, firita vigi ma vatɗi kaw.

¹⁶Sem ɦidi hay busata, sum sa jufayn jargi kaf ma co vok ir Ma-Vatɗina Lawna vigiya hay liyn ma nam vilekemna: Hay yuldeta vi fun-bay-kufna, hay yuldeta vi lumuna, hiɗi yuldeta vi tabernaklena. Sa as co vok ir Ma-Vatɗina hiɗi ɓalam goy ɦawa kiɗaŋ-kiɗaŋɗi.

¹⁷Gigekaw ma vul va ma nam as kalamna, ŋray hiɗi bolda ta Ma-Vatɗina Lawna valamu ga' kalamu.

¹⁸Nigi ma tun sa ka kitata hiɗi sa ŋulona vi sojena hay hay hoyok-ziy ma Ma-Vatɗina Lawna vigiya vulgit kafna, kuɗ jafna vigi kaf, nisi ma ka kitat hiɗi ɗigerta.

¹⁹Nigi ma ɓulak gasit goyɗi, nigi ma jak kay ŋolda vi sanɗi, nigi ma yaw va hay ɓam saɗi, kay sle ma yawam hay ɓam sana duk ir sa yalla, ɓulak yoboyna vi sum sa ɗigera kaw.

²⁰Nigi ma tap kayni kuɗ law ma ɗigera, kay nigi ma lak iriya, kay nigi ma sli nagata ta Ma-Vatɗina Lawna vigiya min vulgiya kaw.

²¹Nigi ma col gu kulo'o hay sem Asera* kat giwin-ma-ɗifinna ma nigi inim kulo'o mi Ma-Vatɗina Lawn viginɗi.

²²Nigi ma in hiɗiy kuloɗi, kay mige Ma-Vatɗina Lawna vigiya ka gaw hiɗi kayni.