Read Masana GATTA-SEM-MA'TA 17 Bible Online

GATTA-SEM-MA'TA 17 - Masana bible

GATTA-SEM-MA'TA 17

¹Hay li ma nigi min li ɗifin tam Ma-Vatɗina Lawna vigiya hiɗi putna lebo goor ɦu-dimina, nam ma li mi ma moy talamɗi, lebo va ma guni may talamɗi, kay ma moy talamna nam kir Ma-Vatɗina Lawna vigi bisi.

²La li ŋalɗi, hay hoyok-ziyna vigi mara'a ma Ma-Vatɗin vulgitna, sa jufu lebo ca'a ka haya, may li slen ma joona kir Ma-Vatɗina Lawna vigiya, la san namna ɓulak bonota ta jargi hiɗi Lawna,

³hay li ma nam tuɗ girif lawayn mara'a, dab vokom gaa vokomu, lebo vok fatta, tilla lebo sle ma dukalawna kaf, min li kuɗ sle ma nan dumnaɗi;

⁴hay li ma nigi hum labar namnawa, nigi ma fek lawt goy ŋaa'a. La lawt kayn gasiya, la dir lawt patawa goy ala law ma liwis ki kayn nala ka liy jar sa Israyel gasiya,

⁵la sa ma li lawt kayni mi sa jufu lebo ca'a kaw, nigi maram hay vun-galana vigiya, nigi ma gum hiɗi goorhoyona ta-ta nam mitis goyo.

⁶Ci san goy mat kayni, sum sa irsi wum hay lawta ma li ma' lebo ɦidi; la ir san kep ɦawa wum hay lawta, nigi as cum matɗi.

⁷Sum sa irsi wi san hay lawta ma poŋ ɓisi kulo jew kay cum goy si nisiya, bugolda sumun kaf ma gumu may. Ki kayn nala nigi ma pat joot goy jargiya.

⁸La lawt muɗ kuɗ mat ma cina, lebo kuɗ law ma ka jar sumuna, lebo sa ka tuw sa mara mili, la law na'ta lop ŋol kigiya kay ka kitata va'a, ci-wayt ka kuɗa'a hay hoyok-ziyna, nigi ma yaw kulo'o, tuɗ hay liyn ma Ma-Vatɗina Lawna vigi vilekemna.

⁹Nigi ma tuɗ kat muliyan-sa-ɗifinna sa Levitna, kat sa ma ka ka kitat hay liy namna; nigi ma visi sem lawta, nisi ma ka kitata kay law na'ta.

¹⁰Nigi ma tap ɗawni kuɗ kitata ta nisi ka' hay liyn ma Ma-Vatɗin vilekemna, nigi ma tap ɗawn kuɗ va ma mul-ma-ɗifinna digitna.

¹¹Nigi ma tap ɗawni kuɗ gatta ta nisi ɗekgiya, hiɗi kitata ta nisi ka'a, nigi ma cal goy jufɗi, goy gulɗi kaw, may nigi tap ɗawni kuɗ va ma nisi colomna.

¹²Sa ma li wuraŋi, ma slen ma mul-ma-ɗifinna ma ka coli hay sunda vi Ma-Vatɗin dumna nam min humumɗina, ma min hum sa ma ka kitatɗi layna, sa namna ma mita. Ki kayn nala nigi ma pat joot goyo jar sa Israyella.

¹³Sumun kaf ma hum labara, narta ma kal hay diksiya, nala nisi as li wuraŋga loɗi.

¹⁴Hay li ma nigi coowa hay nagata ta Ma-Vatɗina Lawna vigiya min vulgiya, hay li ma nigi lakawa haya'a, ziyn cukawa haya kaw, la nigi daawa ala, numa min tun mul kuma'a ki jaf-sum segena sa ka ŋuyi galgi nala,

¹⁵mul nam na ma nigi tunum kigin ɗawni, ma vilekem mi Ma-Vatɗina Lawna vigiya nam ma li mi sa ma hay jafna vigiya. Sa ma pulu ma may hay jafna vigiɗina nigi as tunum mulɗi.

¹⁶Nam ma li mi sa ma hiɗi kulumayn dak-dakɗi, nam ma hot sumun hay Egipte kay gar kulumayn ŋolɗi; kay Ma-Vatɗina di tigi ala: Nigi ma hot hay naga na'ta ɗawn loɗi.

¹⁷Nam ma li mi sa ma hiɗi boyn kuɗum ŋolɗi, kay a nam ma cal goyɗi, nam ma li hiɗi doorota hiɗi or hay ɓalam dak-dakɗi.

¹⁸Hay li ma nam musawa hay mulda valamu, nam ma sli ɗerwelda vi gatta hay ɓam muliyan-sa-ɗifinna sa levitna, nam ɗo' hay ɗerwel mara'a, bura' talam waŋ'.

¹⁹Nam ma bura' talam waŋ', jaŋa'a hay buura irita valam kaf, kay nam ma hat kay li nar kuɗ Ma-Vatɗina Lawna valamu, kay nam ma ŋom gatta hiɗi dita ma ɗoy hay ɗerwel na'ta kaf, kay nam ma li kuɗa'a.

²⁰Kay suburta ma kal hay dikam ala nam kulo ŋol suw ɓosiyomnaɗi, a nam ma raw vun-ma-gatna goyo kay cal goy hay gal jufu lebo gal gulɗi; kay nam ma ɦur buura valam voko hay mulda valamu, namu hiɗi gurona valamu jar sa Israyella.