Read Masana GATTA-SEM-MA'TA 20 Bible Online

GATTA-SEM-MA'TA 20 - Masana bible

GATTA-SEM-MA'TA 20

¹Hay li ma nigi cukawa goyo kay dur sa gawt kigina, la irgi wi kulumayna, keke-ma-duura hiɗi sumun ŋol ɦini-ɦini suwgi nigiya, nigi ma li nar kisiɗi; kay Ma-Vatɗina Lawna vigiya ma kalgiyay goy hay nagat Egipte pana, nam ka hiɗi nigiya.

²Hay li ma duura coowa goboyo, mul-ma-ɗifinna ma ɦur kulo goboyo, law tam sumuna.

³Nam ma di ala: Humgiya, Israyella, vaydi nigi ka tuɗ tam sa gawt kigina kay dursiya. Narta ma kal hay dikgiɗi, ligi narɗi, tuwgi wirgi kisiɗi, ligi tuwgi voksi keŋ-keŋɗi.

⁴Kay Ma-Vatɗina Lawna vigiya ka tuɗ vokgiya, kay dur sa gawt kigina hay baŋalgiya, kay nam min suɗgi goyo.

⁵Sa ŋulona vi sojena ma muɗ irsi kirsiya di tisi ala: Sa ma in ziy ta wuliya may bay mala' vuna' tuwa ka su? La ka'a, nam hot vo'o, kay a nam mit vun duura may sa mara mala' vuna' hay baŋalamu kayni asɗi.

⁶Sa ma pi gulda-guldana may bay ja vuɗna valam tuwa ka su? La ka'a, nam hot vo'o hay ziyna valamu, kay a nam mit vun duura, may sa mara ja vuɗna vi gulda-guldan hay baŋalamu kayn may asɗi.

⁷Sa ma cat kalam gaɓiya may bay sli kalam tuwa ka su? La ka'a, nam hot vo hay ziyna valamu, kay a nam mit vun duura may sa mara sla' hay baŋalamu kayn may asɗi.

⁸Sa ŋulona vi sojena ma law tam sumun lo, nisi ma disi ala: Sa ma tuwam nari, ma kursulit may hay dikamɗi ka su? La ka'a, nam ma hot vo hay ziyna valamu, kay la naɗi nam ɗawn ma muɗ sum segen nari.

⁹Hay li ma sa ŋulona vi sojen vunsi vatawa, nisi ma tun soje sa ŋulona kuɗ vokŋa vokŋa.

¹⁰Hay li ma nigi coowa kat hoyok-ziya kay li duura, nigi ma job tam sum sa hay hoyok-ziyna kay nisi tap kuɗgi bay duura.

¹¹La nisi humgiyawa mal vun-galanawa goyo, sum sa hay hoyok-ziy namna nigi ma muɗsi gorvo vigiya, nisi as kay vulgi taara kaw.

¹²La nisi min tap kuɗgiɗi, min kay durgiya, nala nigi ma ŋuy hoyok-ziyna visiya.

¹³Ma-Vatɗina Lawna vigiya ma vulsi hay ɓigiya, ki kayn nala sa jufayn kaf nigi ma calsi goy hiɗi kew-gaferaŋa.

¹⁴May boyna, gurosgurayna hiɗi farayna, sle ma hay hoyok-ziyn kaf, sle ma ɓuraŋŋa kaf, nigi ma vurumumu, nigi ma ti sle ma ɓuraŋŋa ma nigi yawam hay ɓam sa gawt kigina sa Ma-Vatɗina Lawna vigi vulsi hay ɓigiya.

¹⁵Nigi ma li ki kayn nala kaw kat hoyok-ziyn kaf ma ka goy gine'e hiɗi nigiya, ma may tapay hiɗi hoyok-ziyna vi jaf-sum nisin lakŋiɗina.

¹⁶May hay hoyok-ziyna vi sum nisina ma Ma-Vatɗina Lawna vulgit vocon ɗawni, sle ma sukka hayamna kaf nigi as kay hin mara iriɗi.

¹⁷Kay nigi ma cum goy kafe, sa Hititna, sa Amoriyana, sa Kanaaniyana, sa Feresiyena, sa Heviyena hiɗi sa Yebusiyena, ki Ma-Vatɗina Lawna vigiya di tigi nala,

¹⁸kay nisi ma hatgiya a nigi ma sli kuɗ liwista kaf ta nisi ka li'e hay sem lawayna visiya, a nigi ma li suluk kat Ma-Vatɗina Lawna vigiya kayni may hay liyamɗi.

¹⁹Hoyok-ziy ma nigi min slumna la nigi ŋuyumawa, la nigi musawa ta-ta goy ŋoromu, gu ma piy (hay sinena) nigi ma param gaaɗi, nigi as tum vuɗamu, may kaam goyɗi. Kay gu ma hay sinena nam may mi sa'a kay nigi durumɗi.

²⁰May gu ma as vu'ɗina nigi as param gaa'a, nigi as gi zlaɓ hiɗi namu kat hoyok-ziyna ma nigi ka durumna, ta-ta nigi sli hoyok-ziy namna tuwa.