Read Masana GATTA-SEM-MA'TA 25 Bible Online

GATTA-SEM-MA'TA 25 - Masana bible

GATTA-SEM-MA'TA 25

¹Hay li ma law ka jar sumuna, may la nisi coowa vokgiya kay nigi ka kitata visiya ni, sa ma lawta valam hay liya'ana nigi ma butum goyo, may sa ma lawta valam hay liya'ɗina nigi ma ka kitat kalamu may.

²La sa ma li joota as fi watta, sa ma ka kitata as burum gaa butuwu, gaa vok iramu, nisi ma watam ŋray hiɗi joo ma nam lumna.

³Nam as kay watam suw libet dok-fiɗi ɗi, kay la watta suwi ŋolo, nam cap sa'ata.

⁴Nigi ma jun vun putna hay li ma nam to wanɗi

⁵Hay li ma ɓosiyom-tuwsin ka lakay ziy dar kepe, la kep jarsi mita bay hin gooro, cata vi ma mitina as tuɗ sli sa ma pulɗi, may ɓasum jufa'na ma tuɗ ta'a, nam as musa' kuɗum ca'a.

⁶Goor ma na' vuɗum jewna ma yum hiɗi sem ɓasulum ma mitna, kay selem ma li hasay goy jar sum sa Israyelɗi.

⁷La san kayni min mus hiɗi cata vi ɓasulumnaɗi, cata vi ɓasulumna ma tuɗ goy hay vun-galana kat sa maariyana, na' ma di ala: Ɓasum jufanna min sli sem ɓasulumna kulo'o jar sa Israyelɗi, nam min musan kuɗum caɗi.

⁸Sum sa maariyana vi hoyok-ziyna ma yumu, ma law hiɗi namu, la nam so vokom dok-dok ala nam mina'ɗi,

⁹ki kayn nala na' ma co katamu vok sum sa maariyan sa hay hoyok-ziyn kaf, na' ma patam tuguru ma selemna goyo, na' ma tufum nenen kulo kiramu, na' ma di talam ala: Van ma li ki kayn nala kat sa ma min in ziyna vi ɓasulum kulo'ɗina

¹⁰Bugolda ziyna valam hin ɗawni yum ala «ziyna vi sa ma tugurun selem patay goyna».

¹¹La sumun ma' ka to tuwsiya jar-tuwsiya, la cata vi hena co'o kay but jufa' goy hay ɓam sa hena ma ka tomna, la na' meɗ ɓa'awa goyo, mok sa henawa kay huɗamu (lebo yuwamu),

¹²nigi ma ka' ɓa' goyo, nigi ma wa' hawa'ɗi.

¹³Nigi ma lak sle ma ŋaɓ nekka hay birimna vigi kuɗ batam ma'ɗi, kep gooro kep ŋoloɗi.

¹⁴Nigi ma lak tasa ma li ŋaɓta hay ziyna vigi ma'ɗi, kep gooro, kep ŋolo kayn may ŋaaɗi.

¹⁵Va ma ŋa nekka visiya ma li hay liyamu, tasata ŋaɓta vigi ma li hay liya'a kaw, kay buura vigi ma hur voko hay nagata ta Ma-Vatɗina Lawna visiya min vulgiya.

¹⁶Kay la gigekaw li ki kayn nala, la gigekaw li slen ma kulla, nam liwisi kir Ma-Vatɗina Lawna vigiya.

¹⁷Humgi ma gigi kay va ma Amalek li tigiya hay hagata, hay li ma nigi kali goy hay Egipte pa,

¹⁸nanige nam ŋaf hiɗi nigiya hay hagata, nanige nam ka ir sum sa hin bugolgina, sum sa hinay goy giɗergina, kayn hay li ma nigi ay makay ŋolo, kayni kay nisi may li nar kay Lawnɗi.

¹⁹Hay li ma Ma-Vatɗina Lawna vigiya butgiyawa goyo hay ɓam sum sa gawta sa ŋuyi tigi kafna, hay li ma nam vulgi tun sukkawa hay nagata ta Ma-Vatɗina min vulgit voco'o kay nigi ma lak haya'a, nigi ma has sem Amalek goy kay nagata: Yigi ma jok kaynɗi.