Read Masana GATTA-SEM-MA'TA 26 Bible Online

GATTA-SEM-MA'TA 26 - Masana bible

GATTA-SEM-MA'TA 26

¹Hay li ma nigi coowa hay nagata ta Ma-Vatɗina Lawna vigiya min vulgiya kay lak haya' voco'o, la nigi sli nagat na'tawa, la nigi lakawa haya'a, kaw,

²nagata ta Ma-Vatɗin min vulgit ɗawni, vun-jaf ma jewna vi sle ma vuɗ haya' kafna nigi ma yawamu, nigi ma cukum hay tikisina, nigi ma tuɗ hay liyn ma Ma-Vatɗina Lawna vigiya vilekemu kay tun semda valam haya.

³Nigi ma tuɗ kat mul-ma-ɗifinna ma ka li lop hay buur namna, nigi ma dum ala: Nan li di-goyta vaydi vok Ma-Vatɗina, Lawna vaŋu ala: Nan kalawa hay nagata ta Ma-Vatɗina yi va kalamu tam sumiyaya kay vulayta.

⁴Nala mul-ma-ɗifinna ma vi vulda hay ɓigiya, nam ma tuna' gaa vok giwin-ma-ɗifinna vi Ma-Vatɗina, Lawna vigiya.

⁵Nigi ma sli dit mara lo, nigi ma di vok Ma-Vatɗina Lawna vigi ala bunu ay sa ma Arameena ma ŋom farayna; nam kal hay Egipte hiɗi sumun kuɗum neeɗa ɦawa kay li ziya; ɗawni nam muɗ mi jaf-sum sa ŋolo, dono'o, dak-daki kaw.

⁶Sum sa Egipten lasma'a, curoɗma'a, tun lop ma nek kuma'a kaw.

⁷Numa siwel tam Ma-Vatɗina, Lawna vi sumayma'a, Ma-Vatɗin hum della vuma'a, wi curoɗ ma sumun ka curoɗmana, lasta hiɗi hawta vuma'a.

⁸Ma-Vatɗin kalma'ay goy hay Egipte pa, hiɗi ɓalam ma donona, hiɗi gila ŋam goy meɗiya, hiɗi wiira ŋolo, hiɗi ɗekka mara'a mara'a kaw.

⁹Nam coma'ayawa hay liy namna tani, vulma nagat na'tawa, nagata ta miira hiɗi yumda ka riŋ goy haya.

¹⁰Wulin kayni nan zawni, nan mar vun-jaf ma jewna vi sle ma vuɗ hay nagata ta naŋ vulanu taŋ naŋu Ma-Vatɗina. Nigi ma tunum gaa vok Ma-Vatɗina Lawna vigiya, nigi ma girif gaa'a vok Ma-Vatɗina Lawna vigiya.

¹¹Bugol kayni nigi ma li firiya hiɗi sa Levitna hiɗi sa pulla sa ka jargina, kay ŋaata ta Ma-Vatɗina Lawna vigi la' tigi kafta, tigi nigiya hiɗi ziyna vigi kaf kaw.

¹²Hay li ma nigi poŋ ir gal-ma-doogona vi slena vigiyawa goy kafe, hay busata ɦidita, busata vi gal-ma-doogona, nigi ma vulum mi sa Levitna, mi sa ma pulla, mi sa kuyuna hiɗi boy sa duhulla, nisi ma ti'e, haysi ma hoba kaw hay liyn ma nigi ka lakay hayamna.

¹³Nigi ma law vok Ma-Vatɗina Lawna vigi ala: Slen ma vuli goy ɗifinna nan yawamay goy hay ziyna vanu, nan vulum mi sa Levitna, sa pulla, sa kuyuna hiɗi boy sa duhulla, kuɗ vun-ma-gatna kaf ma naŋ ɗom tanu; vun-ma-gatna vaŋu nan may raw mara goy kepɗi, yan may jok mara kepɗi kaw.

¹⁴Hay li ma nan ka ti do'olla, sle namna nan may ti kuɗumɗi, nan may yaw mara goyo kay li va ma liwis hiɗi namɗi, nan may vul mara goy kuɗum hay liy ma mittaɗi kaw. Nan hum kuɗ del Ma-Vatɗina Lawna vanu, nan li kuɗ vun-ma-gatna ma naŋ ɗom tanna kafe.

¹⁵Naŋ ma jak humaŋay gaa'a hay liyn ma musta vaŋu ma peldetna pa, kulo wuralawn pa, gi bol kay sumuna vaŋu sa Israyella hiɗi nagata ta naŋ vulma'a, ki naŋ yi va kaŋu vok sumayma'a nala, nagata ta miira hiɗi yumda ka riŋ goy haya.

¹⁶Vaydi, Ma-Vatɗina Lawna vigiya ka gatgiya kay nigi ma li kuɗ sle ma diyna hiɗi ɗota valamu; nigi ma ŋomomu li lop hiɗi namu hiɗi dikgi kaf, hiɗi ciwta vigi kaf kaw.

¹⁷Vaydi nigi col lawt vok Ma-Vatɗina ala nam mi Lawna vigiya, kay nigi ma tuɗ hay hagata valamu, kay nigi ma li kuɗ slen ma nam ɗomna, vun-ma-gatna hiɗi dita valamu, kay nigi ma humum delemu;

¹⁸ki kayn nala Ma-Vatɗina col dit ala, nigi ma muɗ si sumuna valam kay tuwamu, ki nam di tigi nala, kay nigi ma li kuɗ vun-ma-gatna valam kafe.

¹⁹Kay jaf-sum sa nam kotsin kaf, nam ma vulgi ŋolda kisiya, vulgi gajijita, sem ma tiyna hiɗi wileta, kay nigi ma li si jaf-sum sa peldete ir vi Ma-Vatɗina Lawna vigiya, ki nam di tigi nala.