Read Masana GATTA-SEM-MA'TA 28 Bible Online

GATTA-SEM-MA'TA 28 - Masana bible

GATTA-SEM-MA'TA 28

¹La nigi hum kuɗ del Ma-Vatɗina Lawna vigi ŋaa'a, la vun-ma-gatna valamu ma nan vulgit vaydina nigi ŋomomu, li kuɗumu kaw, Ma-Vatɗina Lawna vigi ma vulgi ŋolda kay jaf-sum sa hay nagat kafe.

²Hay li ma nigi humawa kuɗ della vi Ma-Vatɗina Lawna vigiya, bolda ma co kigiya, na' ma ŋuygi kaf:

³Nigi ma fi bolda hay hoyok-ziy ma ŋulona, nigi ma fi bolda goy hay sinena.

⁴Nigi ma vuɗ guron ŋolo, nigi ma zum wan ŋolo, luwayn ma biya ŋolo, fukunayn ma biya ŋolo.

⁵Dutta hiɗi doŋolayta vigiya ma fi bolda.

⁶Nigi ma fi bolda hay cota vigiya, nigi ma fi bolda hay kalta vigiya kaw.

⁷Sa gaw kigina sa min durgina Ma-Vatɗin ma munsi vokgi jaŋi; nisi ma cukay goy hay hagat kep kay durgiya, may ma hot bugolsi hay haga siɗiya.

⁸Ma-Vatɗina ma vul hagata kay bolda ma mus hiɗi nigiya, hay feera vigiya hiɗi lopna vigi kaf. Nam ma gi bol kigiya hay nagata ta Ma-Vatɗina Lawna vigiya min vulgiya.

⁹Ma-Vatɗina ma ligi goy si sumuna valam sa peldetna, ki nam yi va kalam nala, kayni hay li ma nigi humawa kuɗ vun-ma-gatna valamu, hay li ma nigi poyawa hay hagata valamu kaw.

¹⁰Sum sa hay nagat kaf ma wi ala sem Ma-Vatɗin ka yiy tigiya, nala nisi ma li nar kigiya.

¹¹Ma-Vatɗin ma hobgi hiɗi slena, hay li ma nam ma vulgi guron ŋolo, nam ma biya farayna vigi ŋolo, vuɗ jafn ŋolo kaw, hay nagata ta nam yi va kalamu tam sumaygiya kay vulgiya.

¹²Ma-Vatɗina ma malgi vun timgilla valam ma ŋaana goyo, dukalawna, kay si niyn ay gaa hay nagata hay liyna valamu, kay gi bol kay lopna vi ɓigi kaf, nigi ma ni balla goy mi sumun ŋolo, may nigi ma gar bal hay ɓam saɗi.

¹³Ma-Vatɗina ma muɗgi si sum sa vokŋa, may si sum sa bugollaɗi, nigi ma li dok-dok kulo kami, may gaa kuɗuw noŋ ne'ɗi, kayni hay li ma nigi hum kuɗ vun-ma-gatna vi Ma-Vatɗina Lawna vigiya, vun-ma-gatna ma nan ɗom tigi vaydina. Hay li ma nigi ŋomomu, li kuɗumu kaw,

¹⁴vun-ma-gatna ma nan vulgit vaydina nigi as kay cal goy galam gulu lebo galam jufu kay tap kuɗ lawayn mara'a kay girifimɗi.

¹⁵May la nigi hum kuɗ del Ma-Vatɗina Lawna vigiɗi, la vun-ma-gatna hiɗi slena valamu ma nam dumna, ma nan vulgit vaydina kaf nigi ŋomomɗi, li kuɗumɗi kaw, be'da cani kaf ma co kigiya, na' ma vigiya:

¹⁶Nigi ma fi be'da hay hoyok-ziyn ma ŋulona, nigi ma fi be'da goy hay sinena.

¹⁷Dutta hiɗi doŋolayta vigiya ma fi be'da.

¹⁸Guro sa nigi vuɗsina, jaf ma nigi cukum gaa hay sinena, luwayna hiɗi fukunayna vigiya ma biya loɗi.

¹⁹Nigi ma fi be'da hay cota vigiya, nigi ma fi be'da hay kalta vigiya kaw.

²⁰Ma-Vatɗina ma gi be'da ay gaa kigiya, ɦuyumda hiɗi narta ŋolda hay lop ma nigi lumna kaf ta-ta nigi ma vat goy kirɓicik', kuɗ varta vigi ta joota, kay yigi ma jokan goyna.

²¹Ma-Vatɗin ma jaɓ bakmaran kuɗgiya, ta-ta nam ma vatgi goyo hay nagata ta nigi min kal haya'a kay sla'ata

²²Ma-Vatɗina ma watgi hiɗi bakmarana, hiɗi moy ma gi tuw san kuna, hiɗi tuwgi ma hol goyna, hiɗi tuwgi ma loɗ goyna, hiɗi koɓorona, hiɗi seŋŋa, hiɗi fuyumna, nam ma jaɓ kuɗgiya ta-ta nigi ma vat goyo.

²³Dukalawn kulo kigiya ma muɗ mi wayna, nagat gaa kuɗgiya ma muɗ mi kawaya may.

²⁴Baŋal niy ma sina Ma-Vatɗin ma gi butuwna hiɗi tukŋa ay hay nagata vigiya; nam ma ko'ay gaa kigi hay dukalawn pa ta-ta nigi ma vat goy kirɓicik'.

²⁵Ma-Vatɗina ma mungi vok sa gawt kigina; nigi ma cukay goy kay dursi kayni hay hagat kepe, may nigi ma mun voksiya hay hagat siɗiya; muliyana vi nagata ma li ɦuyum' kuɗgiya.

²⁶Ŋumna vigiya ma li mi tina vi layayn ma dukalawna hiɗi muuriyana ma hay nagata; sa mara ma as kay hiwirim loɗi.

²⁷Ma-Vatɗina ma watgi hiɗi milla vi sa Egiptena, hiɗi moy waɗaŋŋa hiɗi narmayna, hiɗi tuw ma cukŋa, ta-ta nigi as muɗ ŋaa'a loɗi.

²⁸Ma-Vatɗina ma watgi hiɗi kiŋ-kiŋŋa, hiɗi ir ma dukŋa, hiɗi ɦoyna,

²⁹hay falayt kaw nigi ma tupa tiŋ-tiŋ' ki sa ma dukin tupa hay jufunda nala, sle ma dikgi kalamna nigi ma fumɗi, hay buurta kaf nigi ma lak hay curo'da, sumun ma fok sligar ma tigina, sa ma as gut kigi mayɗi.

³⁰Nigi ma gaɓ cata, may sa mara ma bur hiɗi na' dono'o, nigi ma in ziyna, may nigi ma bur hayamɗi, nigi ma pi gulda-guldana, may nigi ma firi kuɗumɗi.

³¹Farayna vigi sumun ma ŋatam gaa kirgi puɗak, may nigi as tum sliwamɗi; kurona vigiya sumun ma kulum vok irgiya, nisi ma hotgit loɗi; fukunayna vigiya ma vulis mi sa gaw kigina, may sa mara ma co gut kigi mayɗi.

³²Guro-jufayna hiɗi guro-boyna vigiya ma vulis goy mi jaf sum sara'a, irgi ma wisiya, sutaygi ma to kuɗsi dok-doko, may nigi ma as noŋɗi.

³³Sum sa nigi may wisi noŋɗina ma ti vuɗna vi sle ma hay sinena vigina hiɗi vuɗna vi lopna vigi kaf, buur kaf nigi ma lak hay curoɗta hiɗi tayta gaa sem sumuna.

³⁴Sle ma li kirgin ɗawni ma ɦoygi goyo.

³⁵Ma-Vatɗina ma hin goɗoŋ ma joona gigi hay ŋulofgiya, hay gaygiya kaw, goɗoŋ ma nigi as yer goy kalamɗina. Goɗoŋ namna ma gigi ay gaa hay segi pa ta-ta kulo kigiya.

³⁶Nigiya hiɗi mul ma nigi tunum kigina, Ma-Vatɗina ma tuɗgi jar jaf-sum sa nigi may wisi goy jewɗi, nagata ta nigi may wa'ɗi, sumaygi kaw may wa'ɗi lay. Ɗawni nigi ma girif lawayn mara'a, girif guna hiɗi hiɗiyna kaw.

³⁷Sum sa Ma-Vatɗin nargi hay nagata visin ɗawni ma muɗ ɦuyum' kigiya, ma cen kuɗgiya, pangiya kaw.

³⁸Nigi ma cuk jafn gaa hay sinena vigi ŋolo, may nigi ma feɗ jafn kiɗaya, kay baara ma tum goyo.

³⁹Nigi ma pi gulda-guldana, nigi ma zumum diramu, may nigi ma ci vinna valamɗi, nigi ma fi a jamɗi, kay jufulla ma tum goyo.

⁴⁰Nigi ma fi olivena hay nagata vigi noŋ kaf, may nigi ma set mul tigiɗi, kay vuɗna vi gu-oliven ma yak goyo.

⁴¹Nigi ma fi guro sa jufayna hiɗi sa boyna, may nisi ma li vigiɗi, kay nisi ma kal goy gorvo'o.

⁴²Gu ma vuɗna hay nagata vigi noŋ kaf keŋkeŋŋa ma hob humamu.

⁴³Sa ma pulla ma ka jargina ma li dok-dok kulo kigiya, may nigiya, nigi ma hot dok-dok gaa'a;

⁴⁴nam ma vulgi balla, nigi ma vulum bal malam namɗi; nam ma li mi yamda, nigi ma li si sa cawna may.

⁴⁵Be'da na'ta kaf cani ma co kigiya, na' ma tap kuɗgiya ta-ta na' ma co tigiya ta-ta nigi ma ɓulakis goy kafe, kay mige nigi min hum del Ma-Vatɗina Lawna vigiɗi, kay vun-ma-gatna hiɗi sle ma diyna valamu nigi min li kuɗumɗi.

⁴⁶Nam ma hin dok-dok tigiya, tam gurona vigi kaw ki ɗekka hiɗi gul-yalda nala.

⁴⁷Kay mige hay li ma nigi ka hiɗi slen dak-daki, nigi min sun Ma-Vatɗina Lawn vigiya hiɗi firita hiɗi dikga ta ŋaatɗi,

⁴⁸nala nigi ma sumun jar mayta, jar laata, jar nalata hiɗi kiɗata vi slen kafe. Sa gawt kigina Ma-Vatɗina ma cuksi ay katgiya, nisi ma tun juk ma kawayn kelgiya, ta-ta nigi ma vat goy kafe.

⁴⁹Goy gine'e hay vun nagat ma dabayn pa, Ma-Vatɗina ma yaw jaf-sum sara'a kulo katgiya, jaf-sum nisina ma ko gaa kigi ki bakŋa nala, jaf-sum sa nigi may hum vunna visiɗina.

⁵⁰Jaf-sum sa irsi kirkiliya, si sum sa as wi haw sum sa maariyanɗi, wi haw sum sa guraynɗi kaw.

⁵¹Nisi ma yaw farayna vigiya hiɗi sle ma sinena, ta-ta nigi ma vat goy kafe; nisi ma hin alkamarenɗi, hin vin ma jibetnɗi, hin mulaɗi, hin luwaynɗi, hin fukunaynɗi, ta-ta nisi ma vatgi goy kafe.

⁵²Nisi ma ŋuygiya hay liyn ma nigi ka lakay hayamna kafe, ta-ta gulmun ma fiyokŋa ma donona ma nigi tun ŋalda vigi kalamna ho gaa kafe, ma hay nagata vigi kaf, nisi ma ŋuygiya hay liyn ma nigi ka hayam kafna hay nagata ta Ma-Vatɗina Lawna vigiya min vulgit kafe.

⁵³Hay li ma sa gawta ŋuygiyawa, hay li ma nigi kalawa hay vun-zlata, nigi ma mut gurona vigiya, guro sa jufayna vigiya hiɗi sa boyna vigiya sa Ma-Vatɗin vulgitna nigi ma mutsi sliwsiya.

⁵⁴Sa ma jargi kiliŋŋa hiɗi sa ma lumaɗna ma ɗuw ɓasulumna birek-ceke, cata valam ta bur gaa dikamta hiɗi gurona valam sa nam hulotsi goyn kaw.

⁵⁵Nam ma li nari kay ɓuraw sliw gurona valam hiɗi nisiya, kay hin kalam ti ɗawn mi sliw gurona valam tuta, kay hay li ma sa gawta ŋuygiyawa, nigi kalawa hay vun-zlata, va mara ma hin kigi loɗi.

⁵⁶Cata ta jargiya ta kiliŋga, ta lumaɗta, ta may tun se' gaa kay nagat noŋɗi kuɗ kiliŋga hiɗi lumaɗta va'ta, ma muɗ ɗuw jufa' ma na' bur gaa dikamna birek-ceke, gurona va' kaw na' ma ɗuwsi birek-ceke.

⁵⁷Ŋray ca kaw hiɗi goor ma na' vuɗumna, kay hay li ma slen kiɗawa goy hay ɓa' kafe, na' ma gar kay ti goy ŋayaya, kay mige sa gawta ŋuygiyawa, kalgiyawa vun-zlata, hoyok-ziyna vigiya nisi slumawa.

⁵⁸La yoboyn ma hay gatta ma ɗoy hay ɗerwelda kayni nigi may ŋomomu kay li kuɗumɗi, la nigi may li nar kuɗ semda ta gajijita ta ɦuyumda vi Ma-Vatɗina Lawna vigiɗi,

⁵⁹Ma-Vatɗina ma li ɗekka kay watgiya, nigiya hiɗi jafna vigiya, nam ma watgi hiɗi milla ma citɗina, hiɗi moy ŋulona ma vatɗina,

⁶⁰nam ma mar bakmarana vi Egipte kigi kafe, moy ma tuwgi as cuk nar vokomna, moy namna ma gaɓ katgiya.

⁶¹Ma-Vatɗina ma mar moyn kuɗ jafam kaf katgiya, hiɗi bakmarana ma may ɗoy hay ɗerwelda vi gatta kaynɗina, ta-ta nigi ma vatis goy noŋ kaf.

⁶²Jew kayni nigi ay ŋolo ki mislek ma dukalawn nala, may nigi ma hin kiɗaya, kay nigi min hum vun Ma-Vatɗina Lawna vigiɗi.

⁶³Ki Ma-Vatɗina dikam firiya kay ligi ŋaata, kay biyagi jafgiya nala, nala kaw dikam ma li firiya kay vatgi goyo, cigi goy kafe; nagata ta nigi min cuk haya'ta sumun ma yawgi goy haya' pa.

⁶⁴Ma-Vatɗina ma mergi goy jar jaf-sumun kaf, hay vun nagat hen pa ta-ta gal hen goŋ', nigi ma girif lawayn sara'a sa nigi kay tuwgi may wisiɗi, sa sumaygi may wisiɗi kaw: Guna hiɗi hiɗiyna.

⁶⁵Jar jaf-sum nisin ɗawni, nigi ma lak kiliŋɗi, nigi ma fi liyn ma tun-sukka kay tun way-segi hayamɗi. Ma-Vatɗina ma muɗgi dikgi geɗa, ma liwekgi irgiya, ma muɗ ciwta vigi lasa.

⁶⁶Irita vigiya ma li kulo gaɓi vokgiya, nigi ma li nari hay falayta, hay henjeta kaw, nigi ma ci way ŋolo kay irita vigiya.

⁶⁷Hay graw culumta nigi ma di ala la li kayn vulatita ɗisu, hay vulatit kaw nigi ma di ala lali kayn graw culumta ɗisu, kuɗ narta ta nigi ma wi hay dikgiya, hiɗi sle ma irgi ma wum kafna.

⁶⁸Ma-Vatɗina ma ɓegi hay lumna kay nargi hay Egipte, nigi ma tuɗ hay hagata ta nan digi ala nigi ma wa' loɗi ta. Ɗawni, nigi ma vul tuwgi kay gus goyo hay ɓam sa gawt kigina, ki sa gorvona hiɗi sa sunna nala, ma fi sa ma gusgiɗi kaw.

⁶⁹Kayni mi yoboyna vi bonota ta Ma-Vatɗina vul hagata tam Musus kay nam ma juna' hiɗi sa Israyella hay nagata vi Mowab, bonota ta nam juna' hiɗi nisiya hay Horeb tay hayɗi.