Read Masana GATTA-SEM-MA'TA 29 Bible Online

GATTA-SEM-MA'TA 29 - Masana bible

GATTA-SEM-MA'TA 29

¹Musus yi sa Israyel kaf nam di'e: Nigi wi slen ma Ma-Vatɗin lum vok irginawa kaf, hay nagata Egipte, kat Farawn, kat sa sunda valam kaf, kat nagata valam kaf,

²wakka ŋulota ta irgi wa'ta, ɗekka hiɗi gul-yalda ma ŋulona.

³May ta-ta vaydi, Ma-Vatɗina may vulgi dikga ta as kay wiɗi, ira kay ɗuwɗi, humda kay humɗi kaw.

⁴Nan tuni vokgi hay fulda ta-ta busat dok-fiɗi; sligara vigi ma tigina may jet goyɗi, tuguruna vigi ma segina may ti goyɗi kaw;

⁵nigi may ti fuɗi, nigi may ci vinɗi kaw, ci dolay ma galakɗi kaw, kay nigi ma wi ala nanu mi Ma-Vatɗina Lawna vigiya.

⁶Nigi co hay liyn tani; Sihon mulla vi Hesbon hiɗi Og mulla vi Basan kali goy kay ŋafay iraya kay duraya, may nay kol kisiya.

⁷Nay sli nagata visiya, nay vula' voco'o mi gurona vi Ruben, gurona vi Gad hiɗi gal jafna vi Manase.

⁸Nigi ma hum kuɗ yoboyna vi bonota na'ta, nigi ma ŋoma'a, kay slen ma nigi lumna kaf ma tuɗ hay liyamu.

⁹Vaydi nigi ma co vok Ma-Vatɗina Lawna vigiya, nigi kaf, sa ŋulona vigiya, sa hay jafna vigiya, sa maariyana vigiya, sa ŋulona vi sojena vigiya, sum sa Israyella kaf,

¹⁰gurona vigiya, boyna vigiya, sa pulla sa ka jargi hay kaŋŋa, tun caway tam sa ma ɓet gun pa ta-ta tam sa ma go niyna.

¹¹Nigi ka kal hay bonota vi Ma-Vatɗina Lawna vigiya, hiɗi va ma nam yi kalamu, ma Ma-Vatɗina Lawna vigiya ŋram hiɗi nigi vaydina.

¹²Kay muɗgi goy vaydi sumuna valamu, kay nam kay tuwamu ma muɗ mi Lawna vigiya, ki nam di tigi nala, ki nam yi va kalamu vun sumaygiya Abraham, Isaak hiɗi Yakub nala.

¹³Nan yi va kanu kay jun bonot hiɗi nigi kayni may tigi nigi vaydi deɗi,

¹⁴may hiɗi nisi sa ka jaray tani vaydi vok Ma-Vatɗina Lawna vaya, hiɗi nisi sa may jaray tani vaydi noŋɗi kaw.

¹⁵Nigi kay tuwgi wi'e nanige nay li ziy ay hay nagat Egipte, nigi wi'e nanige nay jikay jar jaf-sumuna.

¹⁶Nigi wi liwista hiɗi lawayn ma waana visiyawa, guna hiɗi hiɗiyna, doorota hiɗi ora ma ka hay ziyna visina,

¹⁷sa ma jufu lebo ca'a, jafna lebo vuɗna, ma iram muɗi goyo vaydi kat Ma-Vatɗina Lawna vaya, kay tuɗ girif lawayna vi sum nisina, sa ma ki kayn nala ma li jargiɗi, sutayna ma vuɗ samna hiɗi goyo-goyna nigi ma hinim jargiɗi.[9]

¹⁸La san gigekaw, bugol nam hum yoboyna vi va ma yi kamna kayni humna, nam ma ɗut tuwam hay dikamu a di ala nan ma fi toyta, la nan so tuwan hay so'otta vi dikga, ala nan min tap ɦoyta vi dolayna tam laata nam ma di naɗi.

¹⁹Ma-Vatɗina ma min kay vulum gidaɗi, may ɦiyda hiɗi hunayta vi Ma-Vatɗina ma ŋal kat san namna, be'da kaf ma ka ɗoy hay ɗerwel kayni ma nig gaa kalamu, Ma-Vatɗin ma ɦasam selem goyo gaa kay nagata.

²⁰Ma-Vatɗina ma poŋom iram goyo, joot kalamu jar jafna vi sa Israyel kaf, kuɗ be'da kaf ta ka ɗoy hay ɗerwelda vi bonota vi gatta kayni.

²¹Jafna sa min ma'a, gurona vigi sa min fok kulo bugolgiya, hiɗi sa pulla sa may goy hay nagata ta ginet pa, hay li ma irsi ma wi bakmarana ma hay nagat na'ta hiɗi moyna ma Ma-Vatɗina ma wat sumun hiɗi namna.

²²Hay li ma irsi ma wi sufre*, mandana hiɗi nagat kaf sliy kuwa, hay li ma va ma cuk jaf mayɗi, ma vuɗ mayɗi, us ma day kulo mayɗi, ki hay ɓulakka vi Sodoma hiɗi Gomora, Adma hiɗi Seboyim, hay li ma Ma-Vatɗin ɓulakam goyo hay ɦiyda ta ŋolda valamu,

²³jaf-sumun kaf ma di ala: Ma-Vatɗina li nagat kayni nala kay mige? Hiyda valamu ŋol nala kay mige?

²⁴Sumun ma hotsi dit ala: Kay bonota ta Ma-Vatɗina juna' jaram hiɗi sumaysiya hay kalta visi ay goy hay Egipte pata yisi joka'a goyo;

²⁵kay nisi kali girif lawayn mara'a kay dab voksi gaa vokomu, lawayna ma nisi may wum jewɗi, ma nam may vulsit misiɗina,

²⁶ki kayn nala ɦiyda vi Ma-Vatɗina fok kulo'o kat nagat kayni, be'da ta ka ɗoy hay ɗerwelda kayni kaf nam hina' co kisiya.

²⁷Ma-Vatɗina yawsiyay goy hay nagata visi pa hiɗi ɦiyda ŋolda, nam cuksi goy hay nagat tara'a, ki nay ka wi vaydi tan nala.

²⁸Slen ma ŋayayna nam vi Ma-Vatɗina Lawna vaya; slen ma ɗeki goyna nam vay naya hiɗi gurona vaya kay dok-doko, kay nay ma ŋom yoboyna vi gatta kayni kafe.