Read Masana GATTA-SEM-MA'TA 30 Bible Online

GATTA-SEM-MA'TA 30 - Masana bible

GATTA-SEM-MA'TA 30

¹Hay li ma yoboyn cani kaf vunam hobawa katgiya, kayn di ala be'da hiɗi bolda ta nan lak vokgiya, la nigi ŋom yoboyn cani hay dikgiya jar jaf-sumun kaf sa Ma-Vatɗin lakgiyawa goy jarsina,

²la nigi hotay tam Ma-Vatɗina Lawna vigiya, la nigi hum kuɗumu hiɗi dikgi kaf, hiɗi ciwta vigi kaf, nigiya hiɗi gurona vigiya, kuɗ sle ma nan dum tigi vaydi,

³ki kayn nala Ma-Vatɗina Lawna vigiya ma hot sa gorvona vigi aya, ma li slugot kigiya, nam ma hot tokgiyaya goy jar sum sa nam digiɗgi goy jarsin pa lo.

⁴La nigi meray goy hay liyn kaf kaw, Ma-Vatɗina Lawna vigiya ma hot tokgiyay goy ɗawn pa, goy ɗawn pa nam ma hot yawgiyaya.

⁵Ma-Vatɗina Lawna vigiya ma hotgiyay hay nagata vi sumaygiya, nigi ma hot lak hay nagat na'ta; nam ma ligi ŋaata, ma biyagi ŋol suw sumaygiya.

⁶Ma-Vatɗina Lawna vigiya ma kaagi dikgi gosaya, ma ka dik gurona vigi gosaya kaw, kay nigi ma min Ma-Vatɗina Lawna vigiya hiɗi dikgi kaf, hiɗi ciwta vigi kaf, hiɗi yalla vigi kaf, kay nigi ma mus iriya kaw.

⁷Ma-Vatɗina Lawna vigiya ma gi be'da kayni kaf gaa kay sa gawt kigina, sa kaagi gawi hiɗi sa lasgiya kaw.

⁸Nigiya, nigi ma hotaya, nigi ma hum kuɗ del Ma-Vatɗina, vun-ma-gatna kaf ma nan ɗom tigi vaydi nigi ma li kuɗumu.

⁹Ma-Vatɗina Lawna vigiya ma hobgi hiɗi ŋaata hay li ma nam ma muɗ lop ma nigi lumna ŋolo, guro sa nigi vuɗsina, farayna vigiya, sle ma sinena, kay Ma-Vatɗina ma li firi kay ŋaata vigi lo, ki nam li firi kay ŋaata vi sumaygi nala,

¹⁰hay li ma nigi humawa kuɗ del Ma-Vatɗina Lawna vigiya, hay li ma nigi humawa kuɗ vun-ma-gatna hiɗi sle ma diyna ma ka ɗoy hay ɗerwelda vi gatta kayni, hay li ma nigi hotiyawa tam Ma-Vatɗina Lawna vigiya hiɗi dikgi kaf hiɗi ciwta vigi kaf.

¹¹Kay na'ta vun-ma-gatna namna ma nan vulgit vaydi kayni nam suw donota vigiɗi, nam may suwi kigiɗi kaw.

¹²Nam may kulo dukalawnɗi, kay a nigi ma di ala: Sa ma as jik kulo hay dukalawna, maray vun-ma-gatna namna, kay nay ma humumu, kay nay ma ŋomom hay dikaya, as di naɗi.

¹³Nam may goy hay gal hena vi niy-lumnaɗi, kay a nigi ma di ala: Sa ma nay as gum goy hay gal hena vi niy-lumna, maray vun-ma-gatna kay nay ma humumu, kay nay ma ŋomom hay dikaya as di naɗi.

¹⁴Yoboy namna hayɗin ka goboy hiɗi nigiya, hay vungiya, hay dikgiya, kay nigi ma li kuɗumu.

¹⁵Duwgiya, vaydi nan tun vokgiya irita hiɗi ŋaata, mitta hiɗi joota.

¹⁶Kay nan vulgi gatta vaydi a nigi ma min Ma-Vatɗina Lawna vigiya, kay poy hay hagata valamu, kay li kuɗ vun-ma-gatna valamu, sle ma colina hiɗi dita valamu, kay nigi ma mus iriya, kay nigi ma biya'a, kay Ma-Vatɗina ma gi bol kigiya hay nagata ta nigi ma co haya'ta ɗawni.

¹⁷May la nigi min cal goyo, la nigi kal vokgiya kay girif gaa vok lawayn mara'a sunumu kaw,

¹⁸nan di tigi vaydi ala nigi ma vat goyo, hay li ma nigi ɦaw Yordanawa kulo'o, hay li ma nigi coowa hay nagat na'ta, buura vigi ma ɦur vokɗi.

¹⁹Vaydi nan lak dukalawn hiɗi nagata kay nisi ma wi jaraya: Nan tun irita hiɗi mitta vokgiya, bolda hiɗi be'da kaw. Vilekgi irita, kay nigi ma lak iriya, nigiya hiɗi jafna vigiya,

²⁰kay min Ma-Vatɗina, Lawna vigiya, kay hum kuɗ della valamu, kay jun tuwgi talamu: Namu mi irita vigiya, mi ma ɦur buura vigi vokgina, kay nigi ma lak hay nagata ta Ma-Vatɗin yi va kalamu kay vula' mi sumaygiya: Abraham, Isaak hiɗi Yakub.