Read Masana GATTA-SEM-MA'TA 31 Bible Online

GATTA-SEM-MA'TA 31 - Masana bible

GATTA-SEM-MA'TA 31

¹Musus kali di yoboyn kayni kaf tam sa Israyella:

²Nam ka disi ala: Vaydi busata van coy kis kalam dok-ma', nan as kay poy tani tani loɗi. Lo Ma-Vatɗina di tan ala: Naŋ ma ɦaw Yordan kulo loɗi.

³Ma-Vatɗina Lawna vigi kay tuwamu ma tun vokgiya, jaf-sum nisina nam ma vatsi goy vokgiya, nigi ma kol kisiya. Yosuwa kaw ma tun vokgiya, ki Ma-Vatɗina di nala.

⁴Ma-Vatɗina ma li tam sum nisina ki nam li tam Sihon hiɗi Og, muliyana vi sa Amoriyana hiɗi nagata visiya nala, nam vatsi goyo.

⁵Ma-Vatɗina ma vulsi hay ɓigiya, nigi ma li katsiya kuɗ vun-ma-gatna ma nan vulgit kafna.

⁶Ligi tuwgi dono'o, lakgi kursuliya, ligi nar kisiɗi, dikgi ɓirgi kisiɗi kaw, kay Ma-Vatɗina Lawna vigiya kay tuwamu ka tuɗ vokgiya, nam ma noygi goyɗi, ma hingi goyɗi kaw.

⁷Musus yi Yosuwa, nam dum vok sa Israyella kaf ala: Laŋ tuwaŋ dono'o, laŋ tuwaŋ kursuliya kaw, kay sumun kayni, nagata ta Ma-Vatɗin yi va kalamu vok sumaysiya kay vulsita, vulsit voco ɗawni mi naŋu.

⁸Ma-Vatɗina kay tuwamu ka tuɗ vokaŋu, nam kay tuwamu ma li hiɗi naŋu; nam ma noyaŋ goyɗi, nam ma hinaŋ goyɗi kaw; tuwaŋ li narɗi, tuwaŋ jiriyaŋɗi.

⁹Musus ɗo gatta na'ta, vula' mi muliyan-sa-ɗifinna, gurona vi Levi, sa ka ziy timgilla vi bonota vi Ma-Vatɗina, hiɗi tam sa maariyana vi Israyella kaf kaw.

¹⁰Musus ka vulsi dit ala: Hay vatta vi busat siɗiya kaf, hay liyna vi busata vi hinta vi balla, hay yuldeta vi guɗukŋa,

¹¹hay li ma sa Israyella coowa kay lak vok Ma-Vatɗina Lawna vigiya, hay liyn ma nam ma vilekemu, naŋ ma jaŋ gatta na'ta vok sa Israyella kafe, kay nisi ma huma'a.

¹²Naŋ ma tok sumuna, sa jufayna, sa boyna, gurosgurayna hiɗi sa pulla sa ka lakay ziy jargiya, kay nisi ma hum kayni a nisi ma hat kay li nar kuɗ Ma-Vatɗina, Lawna vigiya, kay ŋom yoboyna vi vun-ma-gatna.

¹³Gurona visiya sa may wi vun-ma-gatnaɗina ma hum kayni, nisi ma hat kay li nar kuɗ Ma-Vatɗina, Lawna vigiya, dok-dok hay liyn ma nigi ka li ziy hay nagata ta nigi min lak haya'ta, bugol nigi ɦaw Yordan kulo'o ɦawna.

¹⁴Ma-Vatɗina di tam Musus: Wulin kayni buura vi mitta vaŋu coowa goboyo. Yaŋ Yosuwa, nigi ma lak kulo'o hay guɗuk ma fi-tuwna. Nan ma vulum dita vanu. Musus hiɗi Yosuwa kali lak kulo'o hay guɗuk ma fi-tuwna.

¹⁵Ma-Vatɗina vul tuwam goyo hay guɗukŋa, hay ɗugulla ma no'osna, ɗugulla ma no'osna col vun guɗukŋa.

¹⁶Ma-Vatɗina di tam Musus: Wulin kayni naŋ ka mita, sumun kayni ma yaw kulo'o, nisi ma li tuwsi liwisi hiɗi lawayn ma pulla vi nagata ta nigi min kal haya'ta ɗawni, Nisi ma noyan goyo, bonota van ta nan juna' hiɗi nisita nisi ma ja' jara' goyo.

¹⁷Hay buur na'ta kayni, nan ma muɗ ɦiya katsita, nan ma noysi goyo, nan ma ŋay iran kisiya; sumun ma tisi ɓuraŋi; joota hiɗi zlata ŋolo ma fisiya; nisi ma di ala: Joot kayni co kaya kay Lawn may jarayɗi nala ɗisu?

¹⁸Nan hayɗini, nan ma ŋay iran goy kisi kafe hay buur na'ta ɗawni, kuɗ joota ta nisi ma la' kafta, hay li ma nisi muɗ irsi kat lawayn mara'a.

¹⁹Wulin kayni, ɗogi nulla kayni, hatgit mi sa Israyella, tunum hay vunsiya, kay nulla namna ma li mi di-goyta vanu kat sa Israyella.

²⁰Kay sumun kayni nan min kalsi hay nagata ta nan yi va kanu vun sumaysiya kay vulsiya, nagata ta miira hiɗi yumda ka riŋ goy haya; nisi ma ti'e, ma hoba, ma ɗora, bugolda nisi ma muɗ irsi kat lawayn mara'a, ma girifimu, nisi ma ŋulanu, yisi ma jok bonota ta jarsi hiɗi nanta.

²¹Hay li ma joota hiɗi zlat ŋolo coowa kat gurona visiya, nulla kayni yisi ma jokomɗi, nulla namna ma li di-goyta kat jaf-sum nisina, nan ka wi varta visiya, ta ka ɗek tuwa' goy vaydi de', jew a nan kalsi hay nagata ta nan yi va kanu kay vula' mi sumaysiya.

²²Hay buur na'ta kayni, Musus ɗo nulla namna, nam hatam mi gurona vi Israyel.

²³Ma-Vatɗina vul dita valam tam Yosuwa goora vi Nun: Nam di'e: Laŋ tuwaŋ ɗeŋe, laŋ kursuliya, kay nagata ta nan yi va kanu kay vula' mi sa Israyella kalsi haya' ɗawni mi naŋu; nan kay tuwanu ma li hiɗi naŋu.

²⁴Hay li ma Musus ɓalam vat ɗona vi gatta na'ta vatna,

²⁵nam vul hagata tam sa Levitna sa ka ziy timgilla vi bonota vi Ma-Vatɗina:

²⁶Sligi ɗerwel namna vi gatta, burum goy gal timgilla vi bonota vi Ma-Vatɗina, Lawna vigiya; nam ma li buri waŋ ki va ma li di-goyta kigina nala.

²⁷Kay nan wi ŋusta ŋel-gatta vigiya hiɗi yigi ma ɗeŋŋa. La nigi ŋel vun Ma-Vatɗina hay li ma nan ka iri jargi tuwana, nigi ma li kayni suwa sem gaage hay li ma nan mitawa?

²⁸Tokgi sa maariyana hiɗi sa ŋulona vi sojena vigi vokan kaf, nan min di yoboyn kayni kay nisi ma humumu, nan min ala dukalawna hiɗi nagata ma wi jarma'a kaw.

²⁹Kay nan wi ala bugol mitta van ɗawni, nigi ma muɗ tuwgi liwisi, nigi ɗawni ma cal goy hay hagata ta nan ɗekgi ka'ta, nala joot ma co kigiya hay liyn ma hinina, hay li ma nigi ma li sle ma joo kir Ma-Vatɗina, hay li ma nigi muɗum ɦiya hiɗi lopna vi ɓigiya.

³⁰Musus di yoboy ma hay nul namna ta-ta hay vatta valam goŋ', kay nam min ala tokŋa vi sa Israyella kaf ma humumu.