Read Masana GATTA-SEM-MA'TA 33 Bible Online

GATTA-SEM-MA'TA 33 - Masana bible

GATTA-SEM-MA'TA 33

¹Kayni ti bolda ta Musus sana vi Lawna ga' kay sa Israyella jew mitta valamu.

²Nam di'e: Ma-Vatɗina may goy wi Sinay pa, nam fokay kulo kisiya hay Seyir pa, nam wileɗ kulo'o kay hiɗiyta Paran, nam kali goy jar sa sunda-wuralawna sa gu' gu' ŋolo, hiɗi ɓalam ta jufta gi kuta vi gatta aya.

³Awa, nam min sumuna; sa peldetna valam kaf ka hay ɓalamu, nisi ka lakay gaa gayaŋu, nisi vi yoboyna vaŋawa.

⁴Musus vul vun-ma-gatna kataya, nam kayni mi galla vi tokŋa vi Yakub.

⁵Nam ay mi mulla kay Yesurun*, hay li ma sa ŋulona vi sumuna tokaya, hiɗi sa jafna vi Israyel kaw.

⁶Hin Ruben mus iriya, a nam ma mitɗige, sumuna valamu ma li ŋol dak-dak lige.

⁷Kayni mi va ma nam di'e kay Yuda: Ma-Vatɗina, humaŋ della vi Yuda humge, naŋ ma hotom kat sumuna valam hotge. Hin gilaŋam gut kalamu, naŋ ma gutumu hay li ma nam ka dur sa gawt kalamna.

⁸Kay Levi nam di'e: Tumimna* hiɗi Urimna vuli hay ɓam sa ma peldetna, ma naŋ nememay hay Masana, ma naŋ ci wayt hiɗi namu hay Meribana.

⁹Namu ma di kay sulumu hiɗi bulum ala: Nan may ɗuwsiɗi, namu ma may poŋ jar ɓosiyomnaɗina, ma may wi gurona valamɗina, kay sa Levitna li kuɗ yoboyna vaŋu, nisi ŋom bonota ta jargita kaw.

¹⁰Nisi hat dita vaŋu mi Yakub, hat gatta vaŋu mi Israyel kaw; nisi cuk urdi ma hisna hay cinaŋu, hiɗi vulda kaf kulo kay giwin-ma-ɗifinna vaŋu kaw.

¹¹Ma-Vatɗina, gaŋ bol kay donota valam gi ge. Firiyaŋ hiɗi lopna vi ɓalamu, sum sa fok kulo kalamna naŋ ma kussi fursi goyo, nisi sa ka gaw kalamna kaw, kay nisi ma fok kulo loɗi.

¹²Kay Benyamin nam di'e: Namu mi ma Ma-Vatɗin minim ŋolla, nam musi katam hiɗi sle'ta; Ma-Vatɗina vulum liyn ma musta dok-doko, nam musi kulo pelemu.

¹³Kay Yosef nam di'e: Ma-Vatɗina ma gi bol kay nagata valamu, hiɗi ŋaata valamu ta may kulo dukalawn pa, hiɗi maɗayna, hiɗi niy ma may gaa hay zulla pana,

¹⁴hiɗi ŋaata vi fatta ta ti'e, hiɗi ŋaata vi jaf ma day hay tilla kafna,

¹⁵hiɗi vun-jaf ma jewna vi hiɗiy ma ɓa-ɓana, kuɗ ŋaata vi hiɗiyn ma vatɗina,

¹⁶kuɗ ŋaata vi nagata hiɗi sle ma haya'na. Hin slugota vi nam ma ka musi jar gikŋa, co kay Yosef coge; hay vok namna ma vileki goyo jar ɓosiyomna.

¹⁷Put-gujuna valam ma vuɗi jewna vulum wileta; miyok put namna ki miyok funda nala; hiɗi miyok namna, nam dab sumuna kafe, ta-ta hay dabaŋ-gu'ta vi nagata: Sum sa gu' gu'na vi Efrayim nisi ki kayn nala, sum sa birimna vi Manase nisi ki kayn nala.

¹⁸Kay Zabulon nam di'e: Firiyaŋu Zabulon hay kal-goyta vaŋu, naŋu Isakar kaw, hay guɗukŋa vaŋu.

¹⁹Nisi ma yi sumuna kulo kay hiɗiyta; ɗawni nisi ma li ɗifinna ma ɗigera, kay nisi ma ti faray ma may gaa kuɗ niy-lumna pana, hiɗi farayna ma ŋayay gaa jar ŋeslna.

²⁰Kay Gad nam di'e: Sle'ta ka kay nam ma sleɗ dik Gadna, nam ma tun suku ki zlo-tancata nala, nam jet gilaŋŋa hiɗi zok-ta'ara goyo.

²¹Nam vilek vun-jaf ma jewnawa, kay galla vi sa ma ŋolla ka ŋayay hay liy namna; nam ka tuni vok sumuna, nam li ɗigerta vi Ma-Vatɗinawa, hiɗi kitata valamu kay sa Israyella.

²²Kay Dan nam di'e: Dan mi zlon ma joriyona, ma ka pira goy hay Basan.

²³Kay Neftali nam di'e: Neftali hobi hiɗi slugota, hobi hiɗi bolda vi Ma-Vatɗina, nam sli gal ma vulatina hiɗi gal ma kayamna.

²⁴Kay Aser nam di'e: Jar gurona vi Yakub, bolda ka kay Aser, slugot li kalamu jar ɓosiyomna lige, hinim tun selem hay mula tunge.

²⁵Vun-ziyna vaŋu ma li mi kawaya hiɗi wayna kaw lige, musaŋ iriya bay-moyna dok-dok musge.

²⁶Naŋ Yesurun*, lawn mara'a ma ŋray hiɗi Lawna vaŋ mayɗi, Nam fokay hay dukalawn pa kay gut kuɗaŋu, nam ka ziyi kulo kay ɗugulla hiɗi mulda valamu.

²⁷Lawn Ma-Vatɗina mi liyn ma ŋayna, liyn ma ŋayna ka hay glaŋam Ma-Vatɗina; nam digiɗ sa gawta goy vokaŋu, nan di'e: Vatsi goyo.

²⁸Sa Israyella ka lakay hay sle'ta, jafna vi Yakub ka tuni goy visiya, hay nagata vi alkamarena hiɗi gulda-guldana, liyn ma dukalawna ka si maɗayn gaa'a.

²⁹Sle'ta kigiya, nigi sa Israyella, sa ma ki nigi nala mi gige? Sum sa suɗi goyo kay Ma-Vatɗina. Marayta vi gutda vigiya, kew-gaferaŋa vi mulda vigiya. Sa gaw kigina ma mun jaŋi vokgiya, nigi ma tay liyn ma ɗiŋiriŋŋa visi gaa'a.[10]