Read Masana GATTA-SEM-MA'TA 5 Bible Online

GATTA-SEM-MA'TA 5 - Masana bible

GATTA-SEM-MA'TA 5

¹Musus yi sum sa Israyel kaf, nam ka disi ala: Nigi sa Israyella, humgi dita hiɗi gatta kaf ta nan di vaydi hay humgiya. Nigi ma hatamu nigi ma li kuɗumu kay li lop hiɗi namu.

²Ma-Vatɗina Lawna vaya jun bonot ay hiɗi naya hay Horeb.

³Bono na'ta Ma-Vatɗin juna' kayni may hiɗi sumiyayɗi, nam juna' kayni hiɗi naya sa ka tani vaydi, sa ka iri kafe.

⁴Ma-Vatɗina ka lawgi goy kirgi haraŋi kulo kay hiɗiyta, goy jar kuta pa.

⁵Hay na'ta kayni, nan ka coli jar Ma-Vatɗina hiɗi nigiya, kay vigi labara vi Ma-Vatɗina; kay nigi li nari kay kuta, nigi may jik kulo'o kay hiɗiytɗi. Nam di'e:

⁶Nanu mi Ma-Vatɗina Lawna vigiya, ma kalgiyay goy hay nagat Egipte pa, goy hay ziy ma gorvota pa,

⁷nigi ma ŋra lawayn mara'a hiɗi nanɗi,

⁸nigi ma kot sle ma ceɗayna ma ŋray hiɗi sle ma ka kulo'o hay wuralawnɗi, sle ma ka hay nagatɗi, sle ma ka hay niyna gaa kuɗ nagatɗi kaw.

⁹Nigi ma girif gaa vok sle namnaɗi, nigi as kay sunumɗi kaw; kay nanu, Ma-Vatɗina, Lawna vigiya, nan mi Lawn ma hunaya, ma ka kitata vi sumayna kay gurona tam jafsi voksi ɦidi kaw fiɗi kaw, tam nisi sa ka gawt tanu.

¹⁰May nan as li ŋaata tam jafsi voksi birimi tisi nisi sa minanu, sa ŋom vun-ma-gatna vanu.

¹¹Nigi ma yi sem Ma-Vatɗina Lawna vigi waaɗi; kay la san yi sem Ma-Vatɗin waa'a, Ma-Vatɗin as hinimɗi.

¹²Humgi kuɗ buur ma sabatna, kay lum goy peldete, ki Ma-Vatɗina Lawna vigiya vul hagat tigi nala.

¹³Nigi ma li lop hay buur karkiya, nigi ma li lopna vigi kafe.

¹⁴May buurta siɗiyat kayni ti buurta vi Ma-Vatɗina Lawna vigiya, nigi as li lop haya'ɗi; nigi as li lopɗi kaw, gurona vigi sa jufayna li lopɗi kaw, guro-boyna vigi li lopɗi kaw, sa sunda vigiya sa jufayna hiɗi sa boyna as li lop hayɗi kaw, putna as li lop hayɗi kaw, kuron as li lop hayɗi kaw, farayn as li lop hayɗi kaw, sa ma pulla ma ka hay ziyna vigiya as li lop hayɗi kaw, kay sa gorvona vaŋu hiɗi gorvota vaŋu ma tun-suku ki naŋ nala.

¹⁵Humgi ma gigi ala nigi ay gorvo'o hay nagata Egipte, may Ma-Vatɗina Lawna vigiya kalgiyay goyo hiɗi ɓalam ma donona, hiɗi glaŋam goy meɗi kigiya: Kuɗ kayni Ma-Vatɗina Lawna vigiya vul gatta tigi ala nigi ma li kuɗ buur ma sabatna.

¹⁶Sligi yam bugiya hiɗi sugi kulo'o, ki Ma-Vatɗina Lawna vigiya vulgi gatta nala, kay buura vigi ma ɦur voko, kay nigi ma lak hay sle'ta gaa kay nagata ta Ma-Vatɗina Lawna vigiya min vulgit ɗawni.

¹⁷Nigi ma ci matɗi,

¹⁸nigi ma li zlata-buloɗi,

¹⁹nigi ma kulɗi,

²⁰nigi ma di law ma sin kat sugolgiɗi.

²¹Nigi ma niŋa cata vi sugolgiɗi, nigi ma niŋa ziyna vi sugolgiɗi, sinena valamɗi, gorvona hiɗi gorvota valamɗi, niŋa putna hiɗi kurona valamɗi, slena valam noŋ kaf nigi ma niŋamɗi.

²²Cani mi yoboyna ma Ma-Vatɗina dum tam tokŋa vigi noŋ kafna, hay li ma nam lawam hiɗi delem kulo ŋolo kulo kay hiɗiyna goy jar kuta, jar ɗugulla hiɗi tukŋa, bay cuk va mara haya. Nam ɗom hay table ma hiɗiyna ma', vulum tanu.

²³Hay li ma nigi hum della jar jufunda humna, hay li ma hiɗiyn ay sliy kuwa, nigi co tanu hiɗi sa ŋulona vi jafna vigiya hiɗi sa maariyana vigi kaf,

²⁴nigi ka di ala: Wulin kayni Ma-Vatɗina Lawna vaya hinay ɗuw gajijita valamu hiɗi ŋolda valamu, nay hum della valamawa goy jar kuta pa kaw; vaydi kayni nay waawa ala Lawna as law hiɗi sana, san as mus iriya kaw.

²⁵Wulin kayni, nay mit goy ɗawn kay mige? Kay kuta ŋol na'ta kayni ma vatay goyo; la nay hum della vi Ma-Vatɗina Lawna vay lo lo, nay ɗawn ma mita.

²⁶Sa ma wurana ma hum del Lawn ma irina goy jar kut pa ki nay nala, may bugolda nam hot mus iri lo kayni mi sa marige?

²⁷Tuɗaŋ goboyo, humaŋ slen kaf ma Ma-Vatɗina Lawna vaya min di'e, naŋu, slen ma Ma-Vatɗina Lawna vay dum kafna naŋ ma hot dum goyo, numa ma humumu kay numa min li lop hiɗi namu.

²⁸Ma-Vatɗina hum yoboyna vigiya hay li ma nigi dum tanu, Ma-Vatɗin di tanu: Yoboy ma sumun kayni dum taŋu nan humumu, slen ma nisi dum taŋu kayn hay liyamu.

²⁹Haha! La nisi ka hiɗi dik na'ta dok-doko kay li nar kuɗanu, kay li kuɗ vun-ma-gatna vanu kafe, kay na'ta nisi ma lak hay sle'ta dok-doko, nisiya hiɗi gurona visiya.

³⁰Tuɗaŋu, di tisi ala: Hotgi hay guɗukŋa vigiya.

³¹May naŋu, musaŋ hiɗi nanu, nan ma daŋ kay vun-ma-gatna, kay sle ma colina hiɗi dita kaf, naŋ ma hatsita, kay nisi ma li lop hiɗi na'a, hay nagata ta nan min vulsit ɗawni.

³²Slen ma Ma-Vatɗina Lawna vigiya di tigiya, nigi ma ŋomomu kay li lop hiɗi namu, nigi ma cal goy gal jufɗi, gal gulɗi kaw.

³³Hagata ta Ma-Vatɗina Lawna vigiya ɗekgi ka'ta, nigi ma tuɗ haya' hiɗi dikgi kaf, kay nigi ma lak iriya, kay nigi ma lak hay sle'ta, kay buura vigi ma ɦur voko hay nagata ta nigi ma co haya'ta ɗawni.