Read Masana GATTA-SEM-MA'TA 6 Bible Online

GATTA-SEM-MA'TA 6 - Masana bible

GATTA-SEM-MA'TA 6

¹Kayni mi vun-ma-gatna, dita colita hiɗi slen ma diyna ma Ma-Vatɗina Lawna vigiya vul hagata kay hatgiya, kay nigi ma li lop hiɗi namu hay nagata ta nigi min kal haya kay muɗa' goy ir vigiya,

²kay nigi ma li nar kuɗ Ma-Vatɗina Lawna vigiya, hay buurta kaf, nigiya, gurona vigiya hiɗi guro-ŋolona vigiya, li kuɗ slen ma diyna hiɗi vun-ma-gatna kaf ma nan vulgiya, kay buura vigi ma ɦur voko.

³Nigi ma hum kuɗumu, nigi sa Israyella, nigi ma ŋomomu kay li lop hiɗi namu, kay nigi ma fi sle'ta, kay nigi ma biya ŋolo, ki Ma-Vatɗina Lawna vi sumaygi di tigi nala ala: Kayni ti nagata ta miira hiɗi yumda ka riŋ goy haya.

⁴Humgiya, nigi sa Israyella, Ma-Vatɗina Lawna vaya nam kepe.

⁵Nigi ma min Ma-Vatɗina Lawna vigiya hiɗi dikgi kaf, hiɗi ciwta vigi kaf, hiɗi donota vigi kaf.

⁶Yoboy ma nan vulgit vaydi kayni nigi ma ŋomom hay dikgiya.

⁷Nigi ma kalam hay yam gurona vigiya, nigi ma disita hay li ma nigi ka vo hay ziyna vigiya, hay li ma nigi ka hay rogoyta, hay li ma nigi bur gaa'a, hay li ma nigi fok kulo'o kaw.

⁸Nigi ma junum hay gilaŋsi kay li ɗek-goyta kisiya, junum hay voksi kaw.

⁹Nigi ma ɗom kulo hay vun-ziyna vigiya, hay vun-galana vigi kaw.

¹⁰Hay li ma Ma-Vatɗina Lawna vigiya cogiyawa hay nagat ta nam yi va kalamu kay vula' mi sumaygiya, Abraham, Isaak hiɗi Yakub, kay vulgi nagat na'ta hiɗi hoyok-ziyn ma ŋulona ma ŋaana ma nigi may inimɗina,

¹¹ziy ma hobi hiɗi sle ma ŋaana kuɗ batam kaf ma may tokom si nigiɗina, kaara ma jugoɗay jewe, ma may jugoɗom si nigiɗina, gulda-guldana hiɗi gun-olive ma may pum si nigiɗina, hay li ma nigi tumawa, haygi ma hoba kaw.

¹²Ligi ŋali kay yigi ma jok Ma-vatɗinɗi, nam ma kalgiyay goy hay Egipte pa, goy hay nagata ta ligi gorvota.

¹³Nigi ma li nar kuɗ Ma-Vatɗina Lawna vigiya, nigi ma girifimtin mi namu, la nigi yi va kigiya, ma li kayn hay semda valamu.

¹⁴Nigi ma tap kuɗ lawayn maraɗi, lawayna vi sum sa goy galgina nigi ma tap kuɗumɗi;

¹⁵kay Ma-Vatɗina Lawna vigiya ma ka jargin kayni nam mi Lawn ma hunaya, ɦiyda vi Ma-Vatɗina Lawna vigiya as fok kulo katgiya, nam as vatgi goyo gaa kay yam nagata.

¹⁶Nigi ma nem Ma-Vatɗina Lawna vigiya ki nigi nemma ay hay Masa naɗi.[2]

¹⁷May nigi ma hum ŋaa'a ŋolo kuɗ vun-ma-gatna vi Ma-Vatɗina Lawna vigiya, humgi kuɗ di-goyta hiɗi sle ma ɗoyna valamu kafe.

¹⁸Nigi ma lum mi sle ma ɗigera hiɗi sle ma ŋaana vok ir Ma-Vatɗina, kay nigi ma lak hay sle'ta, kay nigi ma kal hay nagata ta Ma-Vatɗina yi va kalamu kay vulgiya kaw,

¹⁹nam ma digiɗ sa gawta goy vokgi kaf ki nam di nala.

²⁰Hay li ma jifinta gurona vigi jobgiyawa ala di-goyta, sle ma ɗoyna hiɗi sle ma diyna ma Ma-Vatɗin vulum tigi kayni ɗek mige ni,

²¹nigi ma di tam gurona vigi ala: Numa ay gorvo'o hay ɓam Farawn hay Egipte, Ma-Vatɗin kalma'ay goy hay Egipte pa kayni hiɗi ɓalam ma donona.

²²Dekka ta ŋolda hiɗi slen ma laŋ ɦuyumna, hiɗi ɗekka ta ɓulak slen kaf Ma-Vatɗin la' kat sa Egiptena vok irma'a, kat Farawn hiɗi ziyna valam noŋ kaf;

²³nam yawma'ay goy hay ɗawn pa, kay narma hay nagata ta nam yi va kalamu tam sumayma'a kay nam min vulmata.

²⁴Ma-Vatɗina vul gatta tuma'a kay numa ma ŋom dita na'ta kaf cani, kay numa ma li nar kuɗ Ma-Vatɗina Lawna vuma'a, kay numa'a ma lak dok-dok hay sle'ta, kay nam ma ŋom irita vuma'a ki nam ka li vaydi nala.

²⁵La nay li kuɗ vun-ma-gatna vi Ma-Vatɗina Lawna vay kafe, la nay li lop hiɗi namu, nay ma fi ɗigerta.