Read Masana GATTA-SEM-MA'TA 8 Bible Online

GATTA-SEM-MA'TA 8 - Masana bible

GATTA-SEM-MA'TA 8

¹Gatta ta nan vulgit vaydita kaf nigi ma ŋoma'a kay li kuɗa'a, kay nigi ma lak iriya, kay jafgi ma biya ŋolo, kay nigi ma kal hay nagata ta Ma-Vatɗina yi va kalamu kay vula' mi sumaygiya.

²Humgi ma gigi kay hagata ta Ma-Vatɗina jikgi haya'ta kaf hay busat dok-fiɗi hay fulda, kay hotgi yigi gaa'a, kay wakgi kaw, kay wi sle ma hay dikgina, la nigi li kuɗ vun-ma-gatna valamu lebo liɗi su.

³Nam hotgi yigi gaa'a, nam lasgi hiɗi mayta, manna ma nigi wumɗi lay sumaygi wumɗi layna nam vulgit a ti'e, kay nam min hatgi ala: Sana mus iriya kay fuwa ɦawaɗi, may kay yoboyn kafe ma may goy hay vun Ma-Vatɗina pa.[3]

⁴Sligara vigi ma tigina may jet goyɗi, segi may holɗi kaw hay busat dok-fiɗi lakŋi.

⁵Nigi ma wi hay dikgi ala Ma-Vatɗina Lawna vigi ka gatgi kayn gatiya, ki san ka gat goora valam nala.

⁶Nigi ma li kuɗ vun-ma-gatna vi Ma-Vatɗina Lawna vigiya, kay tuɗ hay hagata valamu, kay li nar kuɗumu.

⁷Kay Ma-Vatɗina Lawna vigi min kalgi hay nagata ŋaata, nagata ta niyn ka jaŋ goy haya, nagata ta niyn ka riŋ haya, kaara hiɗi niy-deera ma hay lokŋa, hiɗi niy-ma-riŋ goy tam hiɗiyna;

⁸nagata vi alkamarena, vi orgena, vi gulda-guldana, nagata vi gu-gumna hiɗi gu-grenadinna*, nagata vi gu-olive hiɗi yumda;

⁹nagata ta nigi as ti tin ma as kiɗaɗina, nagata ta va as kiɗagi haya' noŋɗita, nagata ta hiɗiy ma haya'na mi kawaya, hiɗiyna vigiya ma yor wayn ɗawni mi namu.

¹⁰Hay li ma nigi ti funawa nigi hobawa kaw, nigi ma hot gi-deɓta tam Ma-Vatɗina Lawna vigiya kay nagata ŋaata ta nam vulgiya.

¹¹Ligi ŋali kay yigi ma jok Ma-Vatɗina Lawna vigiɗi, kay nigi ma muɗ a noy vun-ma-gatna valamu, slen ma colina hiɗi ɗota ta nam vulgit vaydi kaf goyɗi.

¹²Hay li ma nigi ti funawa hobawa, hay li ma nigi in ziynawa, lakawa hay ziyn ma ŋaana,

¹³hay li ma farayna vigi ma ŋulona hiɗi ma gurayna biyawa, hay li ma doorota hiɗi ora vigiya biyawa dak-daki, hay li ma slena vigi kaw biyawa ŋolo,

¹⁴nigi ma li ŋali, a suburta ma kal hay dikgiɗi, Ma-Vatɗina Lawna vigiya ma kalgiyay goy hay nagata Egipte hay gorvota pana yigi ma jokomɗi.

¹⁵Nam poygi hay fulda ŋolda na'ta ta laŋ tuwaŋ nari, nagata vi guy ma joona, ɦurduwna hiɗi laata, liyn ma niy may hayɗina, nam mun niyn ay goyo tam hiɗiy ma ɗeŋŋa pa kay nigi ma cumu.

¹⁶Nam vulgi manna ma sumaygi wumɗina kay ti'e hay fulda, kay hotgi yigi gaa'a, kay wakgiya, kay ligi ŋaata bugol kayni may.

¹⁷Nigi ma li ŋali kay di hay dikgi ala faray namna numa fum kayni kuɗ donota hiɗi gaŋeraŋa vi ɓuma'a.

¹⁸Humgi ma gigi kay Ma-Vatɗina Lawna vigiya, kay vulgi donot a fi faray namna kayni mi namu, ki vaydi nam hob vun bonota ta nam yi va kalamu hay li ma nam juna' hiɗi sumaygiya nala.

¹⁹La yigi jok Ma-Vatɗina Lawna vigi gasiya, la nigi jun bono hiɗi laway hegena, la nigi sunsiya girif gaa voksiya kaw, nan fi digi goy vaydi ala nigi kaf ma ba goyo.

²⁰Awa, nigi ma ba goyo ki jaf-sumuna sa Ma-Vatɗin digiɗsi vokgin nala, kay nigi min hum kuɗ della vi Ma-Vatɗina Lawna vigiɗi.