Read Masana YOHANA 10 Bible Online

YOHANA 10 - Masana bible

YOHANA 10

¹Nan digi gasita, sa ma kal kalafi hay ciŋana vi fok-dimina, la nam jik hay vunam paɗi, may goy hay liy mara'a, nam kayni mi kulla, mi coŋcoloŋŋa kaw.

²May sa ma kal kalafi hay vun-ciŋana, nam mi ŋomda vi fok-dimina.

³Sa ma ŋom vun-ciŋana as malam vunna goyo, fok-dimina humum delemu, nam yi fok-dimina valamu hiɗi selemu selemu, cukum goy jiya kaw.

⁴Hay li ma nam cuk fok-dimina valamawa goy jiy cukŋa, nam tun goy vokomu, fok-dimina tuɗ kuɗumu kaw, kay nam wum delemu.

⁵Nam as tap kuɗ sa maraɗi, nam ma mer kalamu, kay nam may hum del sum segenɗi.

⁶Yesu disi law ma buri gaana, may nisi hum caw sle ma nam dum tisinɗi.

⁷Yesu disi lo: Nan digi gasita: Nanu mi vun-ciŋana vi fok-dimina.

⁸Nisi kaf sa co jewanu nisi si kuliyana, si sa coŋcoloŋŋa kaw, fok-dimina may humsi delsiɗi.

⁹Nanu, nan mi vun-ciŋana; la sa jik hayanu kal kalafi, nam ma fi su'da; nam ma kal kalafi, ma kal goy jiya, ma fi liyn ma tina kaw.

¹⁰Sa ma kulla ma kayn kay kula, kay ci mati, kay ɓulak slena kaw; may nanu nan maawa kay fok-dimina ma fi irita, nam ma fa' ŋol suw asa.

¹¹Nanu nan mi ŋomda ma gasina, ŋomda ma gasina vul irita valam goyo kay fok-dimina.

¹²May sa ma ŋom kay fi wurakŋa, nam may mi ŋomdaɗi, fok-dimina may valamɗi, hay li ma nam wi keŋŋa ka ma'a, nam hin fokŋa, pira kaw, keŋŋa vi fokŋa, merem goyo kaw.

¹³Kay nam mi sa ma li lop kay wurakŋa, nam var kay fok-diminaɗi. Nanu mi ŋomda ma ŋaana.

¹⁴Nan wi fok-dimina vanu, fok-dimina vanu wanu kaw.

¹⁵Ki Bumna wanu, nan wi Bumna kaw; nala nan vul irita vanu goy kay fok-dimina.

¹⁶Fok-dimina van hena ka'a, nam may kalaf hay ciŋana zawnɗi; fok-dimi namna kayni nan maramaya; nam kaw ma muɗ human delanu, kay nam ma muɗ mi farana kep, sa ma ŋomda kepe kaw.

¹⁷Bumna minanu, kay nan hin irita van goyo, kay nan ma sla'a lo.

¹⁸Sa mara as sla' goy kanɗi, may nan vula' kayn kay tuwan ma ɗeŋŋa, donota van ka'a kay vula' goyo, donota van ka'a kay hot sla'a kaw, nan fi hagat kayni tam buni pa.

¹⁹Sa Yudiyana vunsi hot ɓuraw lo kuɗ yoboyn kayni.

²⁰Segen ŋolo jarsiya di'e: Ful ka kalamu, nam guruɗi goyo, nigi humum kayn kay mige?

²¹Segen di'e: Yoboyna valam kayni may mi yoboyna vi sa ma ful kalamnaɗi, fulla as mal ir sa ma dukina goy su?

²²Sumuna li yuldeta vi mal vun-ziyna hay Yerusalem, kayni hay cayda.

²³Yesu poy hay Tempella kuɗ diɓira vi Salomon.

²⁴Sa yudiyana ŋuyum cusl' dumu: Naŋ min hinma lak hay bay-wida nala ta-ta lancitige? La naŋu mi Kristu, duma'ay goy haraŋi.

²⁵Yesu hotsi dita: Nan digiyawa, nigi min viɗi, lopna ma nan ka lum hay semda vi Bunu ka li di-goyta kanu.

²⁶May nigi min viɗi, kay nigi say si fok-dimina vanɗi.

²⁷Fok-dimina vanu human delanu, nan kaw nan wumu, nam tap kuɗanu kaw.

²⁸Nan vulum irita ta vatɗita; nam ma ba goy loɗi, sa as hulotom goy hay ɓan paɗi.

²⁹Bunu ma vulum manu, nam ŋol suw kafe, lo sa as hulotom goy hay ɓam Bun paɗi kaw.

³⁰Nan hiɗi Bumna numa ka tuɗoŋ kep.

³¹Sa Yudiyana yaw goorhoyona lo kay gumu.

³²Yesu hot dit tisi ala: Nan ɗekgi lopna ma ŋulona ma ŋaana ma may vi buni pana, lopna ma nigi gan hiɗi goorhoyon kalamna kayni mi marige?

³³Sa Yudiyana hotom dita: Numa gaŋ hiɗi goorhoyon kayn may kay lop ma ŋaaɗi, may kay ŋulda, kay naŋ mi sa'a, may naŋ ŋra tuwaŋ hiɗi Lawna.

³⁴Yesu hot dit tisiya: Ɗota ta di ala: Nan di'e: Nigiya si lawayna,[9] kayni may ɗoy hay Gatta vigiɗi su?

³⁵La nisi sa yoboyna vi Lawna may goy tisina ɗota yisi ala lawayna, nala ɗota as ɦas goyɗi.

³⁶Tam nam ma Bumna lum goy peldete, gumawa kaw gaa kay nagata, nigi di'e: Naŋ ŋul Lawna! Kay nan di ala nan kayni mi goora vi Lawna.

³⁷La nan li lopna vi Bunɗi, nigi vi hayanɗi.

³⁸May la nan lumu, la nigi may vi hayanɗi kaw, vigi hay lopna kayni, a nigi fi wi ala Bumna ka hay nanu, nan hay Bumna kaw.

³⁹Nisi gar kay vum lo, nam kal kisiya may.

⁴⁰Yesu tuɗ lo goy bugol niy-lumna Yordan, hay liy ma Yohana li baptisma haya, mus haya kaw.

⁴¹Sumun ŋolo co talamu, nisi di'e: Yohana may li ɗekka kep kawɗi, may slen kaf ma Yohana di kay san kayni nam gasiya.

⁴²Hay liy namna sumun ŋolo vi hayamu.