Read Masana YOHANA 12 Bible Online

YOHANA 12 - Masana bible

YOHANA 12

¹Buur karkiya jew Paskata, Yesu ma hay Betaniya, liyn ma Lasarus ma nam dayam kulo hay mitta pa ka hayna.

²Ɗawni, nisi kotom tina, Marta ay sunsiya, may Lasarus ka musi jar nisi sa lakay ti hiɗi namu.

³Mariya sli urdina vi nard[12] ma gus lop ŋolo ir livre* kep, na' ɦokom gay Yesu, na' ɦasam selem kaw hiɗi ɗuŋusa'a; hay liy namna ziyna hob hiɗi hisna vi urdina.

⁴May Yudas Iskariyot, kep jar sa hatayna, nam ma min di newt kalamna ka di'e:

⁵Mula kayni may gusum goy ir deniye* kis-hiɗi kay vulum mi sa hawnaɗi kay mige?

⁶Nam law na kayni may ala dikam ka tum kay sa hawnaɗi, may kay nam kayni mi sa ma kulla, nala slen kaf ma nisi ka cukum hay birimna nam ka yawamu.

⁷May Yesu di'e: Hina' ŋay urdina kayni kay buura vi pita vanu.

⁸Sa hawna ka hiɗi nigi dok-dok, may nanu nan may hiɗi nigi dok-dokɗi.

⁹Sum sa Yudiyan ŋolo hum ala nam ay ɗawni, nisi ma'a, may kuɗ Yesu tutaɗi, may kay ɗuw Lasarus ma nam dayam kulo jar sa mitin pana kaw.

¹⁰Muliyan ŋulo sa-ɗifinna ŋra vunsi kay ci Yesu goyo kaw.

¹¹Kay sa yudiyana ŋolo tun caw hinsiya, vi kuɗ Yesu kay ɗekka ma nam lum tam Lasarus.

¹²Hay buurta ka'ta, sumuna ŋolo sa may hay yuldeta hum ala Yesu ka kali hay Yerusalem;

¹³nisi yaw boŋŋa vi gomona, kali goyo kay ŋafam iramu, nisi siwela di'e: hosanna, bolda ka kay nam ma ka ma'a hay semda vi Bum-Sumuna, mulla vi Israyel.

¹⁴Yesu vi goor-kurota ɓe ka'a, ki ɗo'ay nala:

¹⁵Nak li narɗi goota vi Siyon; Ɗuwagu mulla vag ka ma'a, ɓey kay goor-kurota.[13]

¹⁶Sa hatayna valam may hum caw slen kayni tuwaɗi, may hay li ma nam fi gajijita fina, humsi gisi ala slen ɗoy kayn kalamu, liy kalamu kaw.

¹⁷Sumuna sa ay hiɗi Yesu hay li ma nam day Lasarus kulo jar sa mitin pana li di-goyta kalamu kaw.

¹⁸Kuɗ na'ta sumun patay kay ŋafam iramu, kay nisi humi ala li ɗekka kayni mi namu.

¹⁹Sa Farisena* ka law jar-tuwsi ala: Nigi waawa ala nigi as fi va loɗi ɗisu? Ɗuwgi tige, sumuna kaf kali kuɗumu.

²⁰Sum sa Grekŋa sara'a ay jar sum sa co kulo hay Yerusalem kay girif Lawna, hay buura vi yuldeta.

²¹Nisi ter tuwsi kulo tam Filip ma Betsayda hay Galileyana, nisi jobom ala: Bum-Sumuna, numa min wi Yesu.

²²Filip tuɗ di lawt kayni mi Andre. Bugolda Andre hiɗi Filip co di lawt kayni mi Yesu.

²³Yesu hotsi dita: Liyn coowa kay goora vi sana ma fi gajijita.

²⁴Nan digi gasita, la jaf-alkamarena may wasay gaa kay nagatɗi, la nam mitɗi kaw, nam hin ɗawn valam tuɗoŋ na kep, may la nam mitawa, nam as li jafna ŋolo.

²⁵Sa ma min irita valamu, nam ma ba'a, may sa ma ka gawt kay irita valamu gaa kay nagat tani, nam ma ŋoma'a ta-ta hay irita vatɗita.

²⁶La sa sunanu, nam tap kuɗanu, liyn ma nan ka haya, sunda vanu ma mus haya kaw. La sa sunanu, Bumna ma vulum suburta.

²⁷Wulini ciwta vanu ka yor ŋolo. Nan ma di mige? Bunu, suɗan goy hay leer namna zawni suɗge. May kay na'ta kayni nan maawa hay leer namna zawni.

²⁸Bunu, vulaŋ suburta mi semda vaŋu! Bugol kayni del may kulo wuralawni pa di'e: Nan vulaŋ suburtawa, nan ma vulaŋ suburta mara lo.

²⁹Sum sa ay tokay hay liy namna, sa hum del kawna tun caw di ala bay kayn mi Lawna, segena di'e: sunda-wuralawna lawawa hiɗi namu.

³⁰Yesu sli ditiya di'e: Della kayni may law kan nanɗi, may kigi nigiya.

³¹Wulin kayn mi kitata ma kay sa nagat tani, wulini mulla vi sa nagat tanna ma gumis goy jiya.

³²May nanu, hay li ma nan gaɓawa kulo kay nagata, nan ma mar varta vi sumuni kaf tanu.

³³Nam di nala kay dek kay ir mitta ta nam ma mit hiɗi na'ta.

³⁴Sumuna hotom dita: Numa humay hay Gatta kayn ala Kristu mus ta-ta hay vatɗita; naŋ as di ala ŋaata kayn goora vi sana gaɓis kulo'o ir nanige? Goora vi sana mi gige?

³⁵Yesu disiya: Haraŋa ka jargi tuwa ir liyn neeɗa ɦawa, kay na'ta poygiya hay li ma nigi ka hay haraŋa, kay jufunda ma nig kigiɗi, sa ma tuɗ hay jufunda wi liyn ma nam tuɗ haynaɗi.

³⁶Hay liyn ma haraŋa ka tigiya, vigi hayamu, kay nigi ma muɗ goy si gurona vi haraŋa. Hay li ma Yesu di slen kayni dina, nam kali goyo, ŋay tuwamu.

³⁷hiɗi ɗekka ma Yesu lum tisin kayn kaf, nisi min vi hayamɗi,

³⁸Kay yoboyna ma Esaya sa ma jobta-Lawna dumna vunam ma hob kulo'o, ma di ala: Bum-Sumuna, sa ma vi kuɗ yoboyna ma numa'a kusum goyna mi gige? Lo ɓam Bum-Sumuna ɗek goy haraŋ kayn tam gige?[14]

³⁹Kuɗ na'ta kayni nisi as viɗi, kay Esaya di lo:

⁴⁰Nam duk ir sumuna, Tunsi diksi toŋoroŋo kaw, Kay nisi ma wi hiɗi irsiɗi, Humumɗi kaw, kay a nisi hamɗi, A nisi fi yerta-goytaɗi kaw.[15]

⁴¹Kayni mi sle ma Esaya dumu, lawam kaw hay li ma nam wi gajijita valamu.

⁴²Kuɗ kayni jar sa ŋulona kaw, sum segena ŋolo vi hay namu; may kuɗ sa Farisena*, nisi li di-goyta visiɗi, kay nisi ma cuksis goy hay sinagogayna* visi paɗi.

⁴³Kay nisi min suburta vi sumuna suw suburta vi Lawna.

⁴⁴May Yesu siwela ala: Sa ma vi hayanu, nam vi kayni hayan nan ɗi, may hay nam ma ganina;

⁴⁵Sa ma ɗuwan ŋaa'a, nam ɗuwum ŋaa kayn mi nam ma ganina.

⁴⁶Nanu mi haraŋa, nan maawa hay nagata kay gigekaw ma vi hay nanu ma mus hay jufundaɗi.

⁴⁷La sa hum yoboyna vanu, may la nam ŋomomɗi, ka kitat kalam ɗawn mi nanɗi, kay nan maawa kay ka kitat kay sa nagatnaɗi, may kay suɗ sa nagatna goyo.

⁴⁸Sa ma noyan goyo vi yoboyna vanɗi kaw, sa ma ka kitat kalam ka'a, kayni mi yoboyna ma nan dumna, mi namu ma ka kitata kalamu hay buur ma cawna.

⁴⁹Kay yoboy namna nan dum kay tuwan ɗeŋɗi; may Bumna ma ganina, nam kay tuwam gatan kay slen ma nan dumu, kay slen ma nan as lawamna kaw.

⁵⁰Nan wi'e kay vun-ma-gatna valam kayn ti irita vatɗita, nala va ma nan lawamu, nan lawam ki Bumna danay nala.