Read Masana YOHANA 14 Bible Online

YOHANA 14 - Masana bible

YOHANA 14

¹Hingi dikgi li narɗi, vigi hay Lawna, vigi hay nanu kaw.

²Hay ziyna vi Bunu liyn ma musta ka ŋolo. Lali may naɗi, nan digiyawa goy jewe; kay nan min tuɗa kay kot liyn kigiya.

³May la nan tuɗa kay kot liyn kigiya, nan ma hotiya kay yawgi kuɗanu, kay hay liy ma nan ka'a, nigi kaw ma lak hiɗi nanu.

⁴Nala, liyn ma nan min tuɗ haya, nigi as wi haga na'ta kaw.

⁵Tomas dumu: Bum-Sumuna, numa wi liyn ma naŋ ma tuɗ haynaɗi, nala numa as wi haga na'ta ɗawn nanige?

⁶Yesu dumu: Nanu mi hagata, mi gasita, mi irita kaw. Bay nanu sa fi ma tam Bunɗi.

⁷La nigi wan nanawa, nigi ma wi Bunu kaw. Tun caw wulin pa, nigi wumu, nigi wumawa kaw.

⁸Filip dumu: Bum-Sumuna, Ɗekma kay Bumna, kay kayni asma'a.

⁹Yesu dumu: Nan musawa hiɗi nigi ir liyn ŋolo, may naŋ bay wan goy gasi tuwa Filip! Sa ma wanawa, wi Bumnawa kaw. Naŋ as di lo ala ɗekma kay Bumna kayni ir nanige?

¹⁰Naŋ may wi ala nan ka hay Bumna, Bumna hay nanu kaw ɗisu? Yoboyna ma nan dum tigin kayni nam may van kay tuwan ma ɗeŋŋaɗi, may li lop namna kayni mi Bumna ma ka hayanu.

¹¹Vigi ala nan ka hay Bumna, Bumna ka hay nanu kaw. La naɗi kaw, vigiya kuɗ lop namna kay tuwam kayni.

¹²Nan digi gasita, sa ma vi hay nanu, nam ma li lop ma nan lumna, nam ma li lop ma ŋulo ma suw kayni kaw, kay nan min tuɗ tam Bunu;

¹³mige kaw ma nigi jobom hay semda vanu, nan ma lumu, kay Bumna ma fi suburta hay Goora.

¹⁴La nigi job va hay semda vanu, nan ma vulgita.

¹⁵La nigi minanu, nigi ŋom vun-ma-gatna vanu hay dikgiya may,

¹⁶nan kaw, nan ma siɗaw Bumna, nam ma vulgi sa ma ɗob-lawta ma min mus hiɗi nigiya ta-ta hay vatɗita,

¹⁷kayni Ŋusta vi gasita, ta sa nagatna as fa'ɗi, kay nisi ɗuwa'ɗi, wa'ɗi kaw; may nigiya, nigi wa'a kay na' ka musi goboy tigiya, na' ma mus haygiya kaw.

¹⁸Nan ma hingi goy kuyuɗi, nan ma ma tigiya.

¹⁹Liyn hini mus tuwa neeɗa, sa nagatna ma wan noŋ loɗi, may nigiya, nigi ma wanu, kay nanu, nan ka iriya, nigi kaw ma mus iriya.

²⁰Hay buur namna nigi ma wi ala nan ka hay Bunu, nigi ka hay nanu, nan haygi nigiya kaw.

²¹Sa ma vi vun-ma-gatna vanu, ŋomom hay dikam kaw, kayn mi nam ma minanna. Sa ma minanu, Bunu ma minimu, nan kaw ma minimu, nan ma vul tuwan goy kiramu kaw.

²²Yudas -- may Iskariyotɗi -- dumu: Bum-Sumuna, naŋ ɗek tuwaŋ goy kirma numa tuta, may ɗek tuwaŋ goy kir sa nagatnaɗi kay mige?

²³Yesu hotom dita: La sa minanu, ŋom yoboyna van hay dikam kaw, nala Bunu ma minimu, numa ma tuɗ talamu, kot liy ma musta vuma vo valamu kaw.

²⁴Sa ma minanɗi, nam may ŋom yoboyna van hay dikamɗi kaw. Yoboyna ma nigi humumna kayni may mi yoboyna vanɗi, may mi yoboyna vi Bumna ma ganina.

²⁵Slen kayni nan dumawa tigiya hay li ma nan ka musi hiɗi nigiya.

²⁶May sa ma ɗob-lawta, Ŋusta-Peldetta ta Bumna min ga'ay hay semda vanu, kayni ti na'a ta min hatgi slen kaf, na' ma gigi humgi kaw kay slen ma nan dum tigina.

²⁷Nan hin toyta tigiya, nan vulgi toytawa. Nanu nan vulgi toyta ki sa nagatna vula' naɗi. Hingi dikgi yorɗi, ligi narɗi kaw.

²⁸Nigi humawa kay nan di tigi ala: Nan tuɗ goyo, bugolda nan ma hotay tigiya. La nigi minanu, nigi ma firiya kuɗ ta ala nan tuɗ tam Bumna, kay Bumna nam ŋol suwan nanu.

²⁹Nan digi slen kaynawa wulini jew a nam co'o, kay ta ala hay li ma nan coowana, nigi ma vi'e.

³⁰Nan ma law hiɗi nigiya loɗi, kay mul ma kay nagatna ka co'o. Va valam may hayan ne'ɗi.

³¹May kay sa nagatna as wi goy ala nan min Bumna, nan li kuɗ va ma Bumna gatanawa kaw. Yawgi kulo'o, tuɗays goy tan pa.