Read Masana YOHANA 15 Bible Online

YOHANA 15 - Masana bible

YOHANA 15

¹Nanu, nan mi gu gulda-gulda ma gasina, Bunu mi Bum sine gulda-guldana.

²Ɓam guna pet ma ka hay nanu, ma may vuɗ vuɗ-gunaɗi, nam kaam goyo, ɓam-guna kaf ma vuɗ vuɗ-guna, nam sletem tuwamu kay nam fi vuɗ vuɗ-guna suwa.

³Wulini nigi ka pasiyaki kay yoboyna ma nan kusum tigiya.

⁴Lakgi hay nanu, ki nan ka hay nigi nala. Ki ɓam guna fi vuɗ vuɗ-guna kay tuwam ɗeŋɗi, la nam may tapay tam gunɗi. Nala nigi kaw, la nigi lak hayanɗi, nigi as li vaɗi.

⁵Nanu, nan mi gu gulda-guldana; nigiya mi ɓam-guna. Sa ma mus hay nanu, ki nan hay namu nala kaw, nam vuɗ vuɗ-gun ŋolo, kay bay nanu, nigi as li va noŋ ne'ɗi.

⁶La sa mus hay nanɗi, ma gumis goyo ki ɓam-guna nala, nam ma so goyo kaw; bugolda sumun tokomu, cukum hay kuta, nam ŋal goyo kaw.

⁷La nigi lak hay nanu, yoboyna van mus haygiya kaw, jobgi va mige kaf ma nigi mina, van namna ma vulis tigiya kaw.

⁸Bunu fi gajijita kuɗ slen kayni, a nigi ma vuɗ vuɗ-gun ŋolo, nala nigi ma muɗ goy sa hatayna vanu.

⁹ki Bumna minanawa, nan mingiyawa kaw. Lakgi hay minda vanu.

¹⁰La nigi ŋom vun-ma-gatna vanu, nigi ma lak hay minda vanu, ki nan ŋom vun-ma-gatna vi Bunawa, musawa hay minda valamu kaw nala.

¹¹Slen kayni nan dumawa tigiya, kay firita vanu ma mus haygiya, kay firita vigiya ma hob kulo'o kaw.

¹²Kayni mi vun-ma-gatna vanu: Mingi jar-tuwgiya tuwgiya, ki nan mingiyawa nala.

¹³Minda ta ŋol suw minda ta san vul irita valam goy kay ɓosiyomna kayni tayɗi.

¹⁴Nigi si ɓosiyonna, la nigi li slen ma nan gatgi kalamna.

¹⁵Nan yigi ala sa gorvona loɗi, kay gorvona wi va ma mulamna lumnaɗi. Nan yigiyawa ala boniyonna, kay slen kaf ma nan humumay vun Bun pana, nan dumawa goy tigiya.

¹⁶Nigi may vilekan nan goyɗi, may nanu, nan vilekgi goyo, tungiyawa kaw, kay nigi ma tuɗ goyo, kay nigi ma vuɗ vuɗ-guna, kay vuɗna vigiya ma mus ta-ta, a va mige kaw ma nigi jobom tam Bumna hay semda vanu, nam ma vulgita.

¹⁷Va ma nan gatgi kalamna kayni, kay nigi ma min tuwgiya jar-tuwgiya.

¹⁸La sa nagatna ka gawt kigiya, wigi goy ala nisi ka gawt kan nan jewgi nigiya.

¹⁹Lali nigi ay vi nagata, nagat ma minim ɗawni mi va ma ay ir va'na; may wulin nigi may vi nagat loɗi, kay nan vilekgi goy jar sa nagatna pa, kuɗ kayni sa nagatna ka gaw kigiya.

²⁰Humgi ma gigi kay yoboyna ma nan dum tigiya: Gorvona nam ŋol suw mulamnaɗi. La nisi lan lasi, nisi ma ligi lasi kaw; la nisi ŋom yoboyna vanu, nisi ma ŋom yoboyna vigi kaw.

²¹May slen kayni kaf nisi ma lum tigiya kuɗ semda vanu, kay nisi may wi nam ma ganinaɗi.

²²La nan ma miy tisiɗi, la nan disi diyɗi, sulukŋa visi mayɗi. May wulin kayni nisi as ɗob sem-lawta kay sulukŋa visiɗi.

²³Sa ma ka gaw kanu, nam ka gaw kay Bunu kaw.

²⁴Lopna ma sa mara lum tuwaɗin kayni, la nan lum liy jarsiɗi, sulukŋa visi mayɗi. Wulini nisi wumawa, may nisi ka gawt kanu, kay Bunu kaw.

²⁵May kayni li'e kay yoboyna ma ɗoy hay gatta vunam hob kulo'o, ma ala: Nigi ka gawt kanu bay lawta.[17]

²⁶Sa ma ɗob-lawta, ma nan ma gumi tigi tam Bumni pana, Ŋusta vi gasita ta may vi Bumni pa, hay li ma na' maawa tigiya, na' ma li di-goyta kanu,

²⁷nigi kaw, nigi ma li di-goyta, kay nigi ka hiɗi nanu hay tun cawt pa.