Read Masana YOHANA 16 Bible Online

YOHANA 16 - Masana bible

YOHANA 16

¹Nan digi slen kaynawa, kay va fi dabgi segiɗi.

²Nisi ma cukgi goy hay sinagogayna* pa; lo, liyn ma co'o hay li ma gigekaw ma cigi goyo, ma var ala nam girifim kayn mi Lawna.

³Slen kayn nisi ma lumu, kay nisi may wi Bumnaɗi, may wan nanɗi kaw.

⁴Nan di slen kaynawa tigiya, kay hay liy ma liyn maawa, humgi ma gigi kay nan digiyawa nala. May slen kayni nan digitawa goy jew paɗi, kay nan ka hiɗi nigiya.

⁵Wulin kayni, nan tuɗ tam nam ma ganina, sa jargiya ma joban ala naŋ na arige mayɗi.

⁶May kay nan di slen kayni tigiya, kay na'ta yorta hobgi dikgiyawa.

⁷May nan digi gasita: Ŋaa'a kigiya kay nan kal goyo, kay la nan kal goyɗi, sa ma ɗob-lawta as ma tigiɗi kaw, may la nan kal goyo, nan ma gigitiya.

⁸Hay li ma nam maawana, nam ma mun varta vi sa nagatna kay sulukŋa, kay ɗigerta hiɗi kitata kaw:

⁹Kay sulukŋa, kay nisi vi hayanɗi;

¹⁰Kay ɗigerta, kay ta ala nan tuɗ tam Bumna, nigi ma wan loɗi;

¹¹Kay kitata: Kay ta ala mulla ma kay nagat tanna kitata vumawa.

¹²Slen ŋolo ka kanu kay dum tigiya, may nigi as humum wulinɗi.

¹³Hay li ma Ŋusta vi gasita maawa, na' ma ɗigergi hay gasita pet; kay yoboyna may ta' na' kay tuwa' ma ɗeŋŋaɗi, may na' ma dum goy tigi kayn mi sle ma na' humumiya hiɗi slen ma min ma vokayna kaw.

¹⁴Na'a ma vulan suburta, kay na' ma yaw hay slena vanu, li di-goyta tigiya.

¹⁵Slena vi Bumna kaf nam fanna; kay na'ta nan di'e, na' ma yaw hay slena vanu kay li di-goyta tigiya.

¹⁶Hini ir liyn neeɗa ɦawa, nigi ma wan loɗi; bugol liyn neeɗa ɦawa kaw, nigi ma wanu lo, kay nan tuɗ tam Bunu.

¹⁷Nala sum sara jar sa hatayna valamu di jar-tuwsiya: Va ma nam dayt ala hini mus ir liyn neeɗa ɦawa, nigi ma wan loɗi, hini mus ir liyn neeɗa lo kaw nigi ma wanu, lo nan tuɗ tam Bunu. Va ma nam dayt nala kayni mi mige?

¹⁸Nisi ka di lo: Va ma nam dum ala hini mus ir liyn neeɗa. kayn mi mige? Kay nay wi va ma nam di kalamnaɗi.

¹⁹Yesu wi ala nisi min jobomu, nala nam di tisiya: Nigi ka job tuwgi jar-tuwgi kay va ma nan di tigi ala: Mus neeɗa nigi ma wan loɗi, bugol liyn neeɗa lo kaw nigi ma wanu.

²⁰Nan digi gasita: Nigi ma tiya, yor tuwgiya kaw, may sa nagatna ma firiya: Nigi ma yor tuwgiya, may yorta vigi ma muɗ goy firita.

²¹Hay li ma cata ka puka, na' yor tuwa'a, kay liyna va' hebiya; may hay li ma na' puk goorawa, huma' may ga' kay tuw-tita va' loɗi, kay firita kay san vuɗawa gaa kay nagata.

²²Nigi nala kaw, nigi wulin ka hiɗi yorta, may nan ma wigiya lo, dikgi ma li firiya, sa mara'a as sli firita vigi goyɗi.

²³Hay buur namna ɗawni, nigi ma joban kay va loɗi, nan digi gasita, slen pet ma nigi siɗawam tam Bumna, nam ma vulgita hay semda vanu.

²⁴Ta-ta wulini, nigi may siɗaw va hay semda van ne'ɗi. Siɗawgiya, nigi ma fi'e; a firita vigi ma hob kulo'o.

²⁵Slen kayni nan dumawa tigiya hay law ma nir-niramna, liyn ma ma'a ma nan ma lawgi hay law ma nir-niramna loɗi, may nan ma digi goy haraŋi kay Bumna.

²⁶Hay buur namna ɗawni, nigi ma job kay semda vanu, may nan as digi ala nan ma siɗaw Lawna kigiyaɗi,

²⁷kay Bumna kay tuwam mingiya, kay nigi minanawa, nigi vi kaw ala nan may goy vi Bumna pa.

²⁸Nan kali goy tam Bumni pa, nan maawa hay nagata; wulini nan min hin nagata, nan min tuɗ tam Bumna kaw.

²⁹Sa hatayna valam dumu: Ɗuwaŋu, wulin kayni naŋ di goy haraŋ cetet', naŋ may law hay law ma nir-niramna noŋ ne'ɗi.

³⁰Wulin kayni, numa wi ala naŋ wi slen kafe, naŋ may min ala sa jobaŋ loɗi; kay na'ta numa vi ala naŋ may vi Lawni pa.

³¹Yesu hotsi dita: Nigi vaawa wulini su?

³²Ɗuwgiya, liyn ma ma'a, may wulini kaw, liyn ma nigi ma mer goy kep kep gige hay galla valamu valamu, liyn ma nigi ma hinan goy van kep kaw; may nan may van kepɗi, kay Bumna ka hiɗi nanu.

³³Slen kayni nan di tigiyawa kay nigi ma fi toyta hay nanu. Nigi ma fi lasta hay nagata, may teŋgi irgiya, nanu, nan kolawa kay nagata.