Read Masana YOHANA 17 Bible Online

YOHANA 17 - Masana bible

YOHANA 17

¹Hay li ma Yesu di slen kayni dina, nam muɗ iram kulo wuralawna di'e: Bunu, leera coya, laŋ goora van goy gajijiya, kay goora vaŋ ma fi vulaŋ suburta kaw,

²ki naŋ vulum donotawa kay sliwna kaf, kay nam ma muɗ vul irita vatɗita mi nisi kaf sa naŋ vulumtawa.

³Kayni ti irita ta vatɗita, a nisi ma waŋu, naŋ kep mi Lawn ma gasina, hiɗi nam ma naŋ gumina, Yesu Kristu.

⁴Nan suburaŋ seŋawa gaa kay nagata, lopna ma naŋ vulanta kay lumu, nan vatamawa kaw.

⁵Wulin kayni, naŋ Bunu, cukan hiɗi gajijita vok iraŋu, vulan gajijita na'ta ta nan ay hiɗi na'a kataŋ jew tun cawta vi nagata.

⁶Nan ɗekaŋ seŋ goy tam sumuna sa naŋ vulanti gaa kay nagatna. Nisi ay sa faŋŋa, naŋ vulanti manu; nisi vaawa kuɗ yoboyna vaŋu kaw.

⁷Wulini kaw, nisi wi goy ala slen mige kaf ma naŋ vulanawa, nam may vaŋay pa.

⁸Kay yoboyna ma naŋ vulantina, nan vulsitawa; nisi vumawa kaw; nisi wi goy gasi ala nan may goy taŋ pa, nisi vi kaw ala naŋ ganiya.

⁹Nan wulin siɗawaŋ kayn kisiya. Nan siɗaw kay sa nagatnɗi, may kay nisi sa naŋ vulanti manu, kay nisi sa si faŋŋa.

¹⁰-- Slena van kaf nam mi ma faŋŋa, slena vaŋ kaw nam vanu -- nala nan fi gajijit kayn kuɗumu.

¹¹Nan may hay nagat loɗi; nisi ka hay nagata, may nan tuɗ taŋu. Naŋ Bun ma peldetna, naŋ ma ŋomsi hay semda vaŋ ŋomge! Nisi sa naŋ vulanti manu, a nisi ma tap kep ki nay ka kep nala.

¹²Hay li ma nan ay hiɗi nisiya, sumuna sa naŋ vulantina, nan ŋomsi hay semda vaŋu. Nan ŋomsi ŋaa'a, sa kep jarsi ma ba goy mayɗi, may kep mi goora vi ba-goyta, kay vun yoboyna hay ɗota ma hob kulo'o.

¹³Wulin kayni, nan ka hotis kataŋu, may nan law zawni hay nagata, kay firita vanu ma hobsi haysi hob'.

¹⁴Nan vulsi yoboyna vaŋawa, sa nagatna ka gawt kisiya, kay nisi say vi nagata loɗi, ki nan may vi nagatɗi nala kaw.

¹⁵Nan siɗawaŋu kay naŋ yawsi goy hay nagat paɗi, may kay naŋ ma ŋomsi kay ma joona.

¹⁶Nisi say vi nagatɗi, ki nan may vi nagatɗi nala.

¹⁷Lisi goy peldete hay gasita: Yoboyna vaŋu mi gasita.

¹⁸Ki naŋ ganiyawa hay nagata, nan cuksiyawa kaw hay nagata.

¹⁹Nanu, nan li tuwan goy peldete kisiya, kay nisi kaw ma li goy peldete hay gasita.

²⁰Nan siɗawaŋ kayn kisi nisi tutaɗi, may lo kay nisi sa min vi hay nanu kuɗ yoboyna visiya,

²¹kay nisi kaf ma tap kep; ki naŋ bunu, naŋ ka hay nanu nala, nan hay naŋu kaw, kay nisi ma tap kep kaw hay naya, kay sa nagatna ma wi ala naŋ ganiyawa.

²²Nanu, nan vulsi gajijita ta naŋ vulanawa, kay nisi ma tap kepe ki nay ka kep nala kaw.

²³-- Nan hay nisiya, naŋ hay nanu may -- kay nisi ma tap tuɗoŋ kep, kay sa nagatna ma wi ala naŋ ganiyawa, naŋ minsiya kaw, ki naŋ minanawa nala.

²⁴Bunu, nan min ala liyn ma nan ka haya, nisi sa naŋ vulantina lak hiɗi nanu kaw, kay nisi ma ɗuw gajijita vanu, na' ta naŋ vulanawa, kay naŋ minanay jew sem nagata bay tun gaa tuwa.

²⁵Bun ma ɗigera, sa nagatna may waŋɗi; may nan waŋaya, nala kaw nisi sa lakŋi wi goy haraŋ ala naŋ ganiyawa.

²⁶Nan di goy tisiya kay semda vaŋu, nan min disi goy ka' lo, kay minda ta naŋ minan hiɗi na'ta ma mus haysiya, nan haysiya kaw.