Read Masana YOHANA 19 Bible Online

YOHANA 19 - Masana bible

YOHANA 19

¹Hay na'ta Pilatus vi Yesu watamu.

²Sojena ci bogoray ma zigiyna, tunumti kalamu, cukum sligar purpel talamu kaw;

³Bugolda nisi ma talamu di'e: Gaŋ deɓe, mulla vi Yudiyana! Nisi cum geliyamu kaw.

⁴Pilatus kali goy jiy mara lo, di tam sa Yudiyana: Ɗuwgiya, nan min margitay goy jiya, kay nigi ma wi ala nan fi law ne' kalam kay junumɗi kaw.

⁵Yesu kali goy jiya hiɗi bogoray ma zigiyna tuni kalamu, hiɗi sligar-purpel cuki talamu kaw. Pilatus disiya: San kay kigini!

⁶Hay li ma muliyan ŋulo sa-ɗifinna hiɗi sa sunda wumu, nisi siwela di'e: Ɓalam kat gu-ma-grakŋa! Ɓalam kat gu-ma-grakŋa! Pilatus disiya: Nigi kay tuwgi vigita, ɓalgit kat gu-ma-grakŋa kay tuwgiya; kay nanu, nan fi lawta kalamu kay junumɗi.

⁷Sa yudiyana hotom dita: Gatta vuma ka'a, kuɗ gatta kayni, nam fi mitta, kay nam li tuwam goora vi Lawna.

⁸Hay li ma Pilatus hum lawta kayni, nam hob hiɗi narta ŋol suwa.

⁹Nam hot kalaf hay Pretoriyum* lo, di tam Yesu: Naŋ ay arige pa? May Yesu hotom dita noŋɗi. Pilatus hot dumu:

¹⁰Naŋ hot dit tanɗi su? Naŋ may wi ala donota ka hay ɓanu kay gaŋu, donota ka hay ɓanu kay ɓalaŋ kat gu-ma-grakŋa kaw disu?

¹¹Yesu hotom dita: Donota vaŋ may kan noŋ ne'ɗi, la na' vuli taŋu kulo paɗi. Kuɗ na'ta kayni nam ma vulan goy hay ɓaŋu, suluk ŋolla ka tuni kalamu.

¹²Tun caw hay liy namna pa, Pilatus gar hagata kay gumu. May sa Yudiyana siweliya di'e: La naŋ gumawa, naŋ may mi bana Cesar loɗi. Kay gigekaw ma li tuwam mul kay tuwam ɗeŋe, nam fok kulo kay Cesar.

¹³Hay li ma Pilatus hum lawt kayni, nam vi Yesu goy jiya, nam mus kay zlamda-kitata, hay liy ma yum ala: Hiɗiy beɗayna, ma yum hay vun Hebren ala Gabbata.

¹⁴May kayni buur ta kot slena vi Paskat hayta, goboy hay leer ma karkiyana. Nam di tam sa Yudiyana: Mulla vigi kayni!

¹⁵May nisi ciriy digi-digi' di'e: Cum goyo! Cum goyo! Ɓalam kat gu-ma-grakŋa! Pilatus disiya: Mulla vigi ɓalam kat gu-ma-grakŋ mi nan su? Muliyan ŋulo sa-ɗifinna hot dita: Mulla vuma kep kayn mi Cesar.

¹⁶Nala, nam vulum goy tisiya kay ɓalam kat gu-ma-grakŋa. Nisi vumu kal hiɗi namu kaw.

¹⁷Yesu ziy gu-ma-grakŋa valamu, tuɗ hay liyn ma yum ala zok-ta'ara, ma diy hiɗi vun Hebren ala: Golgata.

¹⁸Kayni mi liyn ma nisi ɓalam kat gu-ma-grakŋa hayna, hiɗi sum sara ma' kaw, kep galam hena, hena galam hena, Yesu jarsi waŋ may.

¹⁹Pilatus kot ɗota, tuna' kulo kay gu-ma-grakŋa. Nam ɗom ki kayn nala: YESU MA NASARETNA, MULLA VI YUDIYANA.

²⁰Sum sa Yudiyana ŋolo jaŋ ɗot kayni, kay liy ma nisi ɓal Yesu hayna ay goboy hiɗi hoyok-ziyn ma ŋolla: Nala ɗota ay hay vun Hebrena, hay vun Lateŋŋa hiɗi vun Grekŋa.

²¹muliyan ŋulo sa-ɗifinna di tam Pilatus: Naŋ may ɗo ala mulla vi Yudiyanaɗi, may nam di'e: namu mi mulla vi Yudiyana.

²²Pilatus hotsi dita: Va ma nan ɗoya, nan ɗoya.

²³Sojena, hay li ma nisi ɓal Yesu kat gu-ma-grakŋawa, nisi yaw sligara valamu, ɓurawam iram fiɗi kay sojen fiɗi lay. Nisi yaw sligar-tuwna valamu, ma sira may talamɗina, mi sligar ma kepna, ciliy kulo kalam pa ta-ta gaa selem dab'. Nisi di jar-tuwsiya:

²⁴Nay hawam goyɗi, may ŋaɓayta kuɗ ɦayta kay sa gige kla ma fumu. Kay vun ɗota ma hob kulo'o: Nisi ɓuraw sligara vanu, Sligar-tuwna vanu nisi ŋaɓam kuɗ ɦayta.[18] Kayni mi slen ma sojena lumu.

²⁵Goboy tam gu-ma-grakŋa vi Yesu, sulumu, ɓasum sulumta, Mariya cata vi Klewpas hiɗi Mariya Madelen ay lakay lak'.

²⁶Hay li ma Yesu wi sulumu colay goboy hiɗi sa ma hatayna ma nam minimna, nam di tam sulumu: Cata, zawni mi goora vagu.

²⁷Bugol kayni nam di tam sa ma hatayna: Zawni ti suŋu. Hay leer namna de', sa ma hatayna joka' vo valamu.

²⁸Bugol kayni Yesu ma wi ala slen kaf asawa, kay vun ɗota hob kulo'o: nam di'e: laat canu.

²⁹Hay li namna kayni, doway kep ay hobay hiɗi vinegre* galsi zaw. Nisi jiyob sligar ma ɗutina hay vinegrena, junum vun vi hisopna*, vulumti kulo vunamu.

³⁰Hay li ma Yesu jugo vinegren* jugona, nam di'e: Slen kaf hobawa kulo'o. Bugolda nam her yalam gaa'a, sukam kal goyo.

³¹Kayni hay buur ma kotta, a hin tuwna kulo kay gu-ma-grakŋa hay buur sabatnaɗi -- kay sabatna namna kayni mi buur ma ŋolo -- Sa Yudiyana job tam Pilatus kay kus gay sa ɓalay kay gu-ma-grakŋa, yawsi gaa'a kaw.

³²Sojena ma'a kus gay sa ma jewna, bugolda kus gay ma hena ma ɓalay kat gu-ma-grakŋa hiɗi namu.

³³Co tam Yesu kayn nisi fum miti vatiya, nala nisi may kusum gayamɗi;

³⁴may sa kep jar sa sojena jikim hay galamu hiɗi kawayna, koloy na kay', niyna hiɗi busuwna jaŋay goyo.

³⁵Nam ma wumu li di-goytawa kalamu, di-goyta valamu gasiya; nalamu nam wi ala nam di gasiya, kay nigi kaw ma vi'e.

³⁶Van kayni coowa nala kay vun-ɗota fi hob kulo'o: Zokom kep kaw ma kusɗi.[19]

³⁷Ɗota ka di lo ala: Nisi ma ɗuw tam nam ma nisi jikimna.[20]

³⁸Bugol kayni Yosef ma Arimatena, sa ma hatayna vi Yesu, may goy ŋayaya, kay nam li nar kay sa yudiyana, nam job Pilatus kay vulum hagata kay sli tuw Yesu. Pilatus vulum hagata. Nam co'o sli tuwna kaw.

³⁹Nikodemus ma'a kaw, nam ma hay liyn ma jewna ma talamu hay henjeta, nam mar miir, rigasay hiɗi alowes ir livre* goboy kis.

⁴⁰Nisi sli tuw Yesu, ɗutum hiɗi sligara, hiɗi aromatna, kuɗ data vi pita vi sa Yudiyana.

⁴¹Hay li numa nam ay ɓalay kat gu-ma-grakŋa kayni, jardeŋ mara ay goboy hiɗi namu, hay jardeŋŋa, zulda kep wuliya ta nisi bay bur sa haya' tuwa.

⁴²Kay nisi ka hay kotta vi sa Yudiyana, lo kay ta ala zulda ay goboyo, nisi bur Yesu gaa hay zul na'ta.