Read Masana YOHANA 2 Bible Online

YOHANA 2 - Masana bible

YOHANA 2

¹Buur ɦidi bugolda kayni, yuldeta vi dabayna li hay Kana hay Galileya. Sum Yesu ay ɗawn dam' lay.

²Yesu hiɗi sa hatayna valamu fi yita kay lak hay yuldeta vi slita na'ta kaw.

³Hay li ma vin kiɗasiyawa, sum Yesu ka dumu: Vin may kisiɗi.

⁴Yesu da'a: Cata, va ma jarag hiɗi nanu mi mige? Liyna vanu bay co tuwa'a.

⁵Sulum ka di tam sa sunda ala: Ligi slen kaf ma nam digi kalamna.

⁶Hay li namna doway-hiɗiyna karkiya ka lak, ma lakay kay poora vi sa yudiyana, ma ŋaɓta ma' lebo ɦidi ka haya.

⁷Yesu disiya: Hobgi dowayn lakŋi hiɗi niyna. Nisi hobom kulo vunam pulus' pulus' kaf.

⁸Yesu ka disi ala: Wulin kayni calgit yo, nargit tam mul-yuldeta. Nisi tuɗum kaw.

⁹Sa ma kot tina jugo niyna ma muɗi goy vinna: Nam wi liyna ma vinna kayni may hayam panaɗi, may sa sunda sa go niyn ayna wi kayni goy haraŋ;

¹⁰Nam yi juf-cata dumu: San gigekaw ci vin ma ŋaana jewe, sumun ɦoy hiɗi vinna, bugolda nam ci ma may ir ŋaaɗina, may naŋ ŋom vin ma ŋaanawa ta-ta wulini?

¹¹Kayni ti ɗekka ta jewta ta Yesu la' hay Kana hay Galileya, nam ɗek goy kay gajijita valamu, nala kaw sa hatayna valamu vi hayamu.

¹²Bugol kayni nam kali gaa hay Kapernawum, hiɗi sulumu, hiɗi ɓosiyomna, hiɗi sa hatayna valamu kaw, nisi lakay ɗawni ir buur neeɗa ɦawa.

¹³Paskata vi sa Yudiyana coowa goboyo, nala Yesu kali kulo hay Yerusalem.

¹⁴Nam fi sum sa gus luwayn goyna, sa gus fok-dimin goyna hiɗi sa gus gukayn goyna kaw lakay hay Tempella, hiɗi sa muɗ gurjuta kaw.

¹⁵Nam kot tilek-zigewna, nisi kaf nam digiɗsi goy hay Tempella, nam mun fok-dimina hiɗi luwayna, nam das gurjuta vi sa muɗna goyo, ɦo tablena gaa'a kaw.

¹⁶Tam sa gus gukayn goyna nam di ala: Nigi yawam goy tan pa, nigi ma li ziyda vi bunu goy ziy ma tererenɗi.

¹⁷Sa hatayna valamu humsi gisi kay ɗota ta ala ciwerta kay ziyna vaŋu tiyofanawa.[4]

¹⁸Sa yudiyana sli ditiya dumu: Ɗekka mige ma naŋ li tuma'a kay li slen ki kayn nala?

¹⁹Yesu hotsi dita: ɦogi Tempella zawni gaa'a, may hay buur ɦidi nan ma inim kulo'o.

²⁰Sa yudiyana di'e: A in Tempella zawni kulo'o, numa'a li busata dok-fiɗi yam karkiya, may naŋu, hay buur ɦidi de, naŋ as inim kulo'o?

²¹Dolay nam ka law kayni kay Tempella vi tuwamu.

²²Hay li ma nam day kulo jar sa mitina pa dayna, sa hatayna valamu humsi gisi ala nam di nala, nisi vi hay Ɗota, vi hay dita ta Yesu da'ta kaw.

²³Hay li ma Yesu ka hay Yerusalem, hay yuldeta vi Paskata, sumuna ŋolo vi hay semda valamu, hay li ma nisi wi ɗekka ma nam lumna,

²⁴may Yesu kay tuwamu tun varta valam kisiɗi, kay nam wisi kafe,

²⁵kay nam gar a sa ma lum di-goyta kay sa mara'aɗi, kay nam kay tuwamu wi va ma ka hay sana.