Read Masana YOHANA 20 Bible Online

YOHANA 20 - Masana bible

YOHANA 20

¹Hay buurta jewta vi lumuna, Mariya Madelen kal vun zulda graw culum, liyn ka jufun tuwa, na' wi hiɗiyt poŋay goy vun zulda.

²Na' jaŋay tam Simon Peter hiɗi ma hatayna ma Yesu minimna, na' disiya: Nisi sli Bum-Sumunawa goy hay zulda pa, numa wi liyn ma nisi burum haynaɗi.

³Peter hiɗi ma hatayna ma hena kali kay tuɗ vun zulda.

⁴Nisi ma' pet yaway jaŋi. May ma hatayna ma hena jaŋ koloy suw Peter, nam co vun zulda jewe kaw;

⁵Nam her gaa'a, wi sligara lakay lak', may nam kal hay zuldaɗi.

⁶Simon Peter ma ay bugolomu coowa. Nam kal hay zulda, wi sligar ma beɗayna lakay lak',

⁷Sligar ma lakay kulo kay yam Yesuna may tapay hiɗi sligar ma beɗaynaɗi, may ɗuti ɗut, tuni goy hay liy mara valam ta'.

⁸May hay na'ta ma hatayna ma co jew vun zulda, kal gaa'a kaw, nam wi'e vi kaw.

⁹Kay ɗota ta di ala Yesu ma day kulo'o jar sa mitin pa, nisi may huma' cawa'ɗi.

¹⁰Nala sa hatayna hotay vo'o.

¹¹May Mariya colay goy jiya, goboy hiɗi zulda, na' ka tiya. Hay li ma na' colay zaw tiya, na' her gaa kay ɗuw hay zulda,

¹²na' wi sa sunda-wuralawna ma', cuki hiɗi sligar ma haɓi, lakay hay liyn ma tuw Yesu ay buri hayna, kep kulo yalamu, kep gaa gayamu may.

¹³Nisi da'a: Cata, nak tiy kay mige? Na' hotsi dita: Kay nisi sli tuw Bum-Sumuna van goyo, nan wi liyn ma nisi burum haynɗi kaw.

¹⁴Hay li ma na' di kayn dina, na' hot bugola'a, na' wi Yesu colay zaw; may na' wi goy ala zawn mi Yesuɗi.

¹⁵Yesu da'a: Cata, nak tiy kay mige? Nak gar gige? Hay varta va' kayn ala ay zawn mi sa ma kot jardeŋŋa, na' dumu: Sam-ŋolla, la slum tuwam goy mi naŋu, danay kay liyn ma naŋ burum hayna, kay nan min slumu.

¹⁶Yesu da'a: Mariya! Na' muɗ ira' talamu, dum hay vun Hebren ala: Rabbuni! Kayn min di'e: Bum-hatta.

¹⁷Yesu da'a: Nak may jon tuwanɗi, kay nan bay kal kulo tam bun tuwa. May tuɗag tam bosiyonna, nak disi ala nan tuɗ kulo tam Bunu hiɗi bugiya, tam Lawna vanu hiɗi Lawna vigiya.

¹⁸Mariya Madelen ma tam sa hatayna disi ala: Na' wi Bum-Sumuna, nam di slen kayni ta'a kaw.

¹⁹Hay vulatita vi buur na'ta, kayni ti buurta jewta vi lumuna, vun-ziyna vi liyna ma sa hatayna lakay hayna ay kulo dukiya, kay narta kuɗ sa Yudiyana; Yesu ma'a, colay jarsiya di tisi ala: Sle'ta mus hiɗi nigi musge!

²⁰Hay li ma nam di nala dina, nam ɗeksi ɓalamu hiɗi hoyokamu. Sa hatayna li firi ŋolo hay li ma nisi wi Bum-Sumuna.

²¹Yesu disi mara lo ala: Sle'ta mus hiɗi nigi musge! Ki Bumna ganiyawa, nan kaw nan cukgiyawa.

²²Bugol dit kayni, nam gi suk kisiya di'e: Vigi Ŋusta-Peldetta.

²³Nisi sa nigi vulsi gidawa kay sulukŋa visiya, sulukŋa visi ma ɦas goyo, nisi sa nigi vulsi gida kay sulukŋa visiɗina, sulukŋa visi ɦas goyɗi may.

²⁴Hay li ma Yesu con kayni, Tomas ma yum Didimus, ma kep jar sa doogo yam ma'na mayɗi.

²⁵Sa hatayna sa hena dum ala: Numa wi Bum-Sumun aya. May nam disiya: La nan wi huɗukŋa vi oslna hay ɓalamɗi, la nan tun cita-ɓan hay baŋal oslnaɗi, la nan tun ɓan hay hoyokamɗi kaw, nan as vi noŋɗi.

²⁶Buur glafandi bugol kayni, sa hatayna vi Yesu lakay kalaf hay ziyda lo, Tomas ay hiɗi nisiya kaw. Vun-ziyda ay duki duk', may Yesu ma'a. Nam col jarsiya, disi ala: Sle'ta mus hiɗi nigi musge!

²⁷Bugolda nam di tam Tomas ala: Tomas, meɗaŋ cita-ɓaŋay tani, ɗuwaŋ ɓanu, meɗaŋ ɓaŋaya, tuna' hoyokanu; naŋ mus bay viɗi, may vaŋu!

²⁸Tomas hotom dita: Bum-Sumuna vanu hiɗi Lawna vanu!

²⁹Yesu di talam ala: Kay naŋ wanawa, naŋ vaawa. Sle'ta ka kay nisi sa may wi hiɗi irsiɗi, may nir na'ta kep nisi vi'e.

³⁰Ɗekka hena ŋolo Yesu lum kir sa hatayna valamu, may nam may ɗoy gaa hay ɗerwelda kaynɗi.

³¹May slen kayni ɗoy ɗo kay nigi ma vi ala Yesu kayni mi Kristu, goora vi Lawna, hay li ma nigi vaawa, nigi fi irita hay semda valamu.