Read Masana YOHANA 21 Bible Online

YOHANA 21 - Masana bible

YOHANA 21

¹Bugol kayni Yesu vul tuwam lo kir sa hatayna valamu kel niy-lum ma ŋolla vi Tiberiyad. Nam vul tuwam kirsi kayni ki kayn nala.

²Simon Peter, Tomas ma yum Didimus, Nataniyel ma hay Kana hay Galileya, gurona vi Sebedew, sa hatayna valam sara ma' lay tokay kuɗ tuwsi ɗawni.

³Simon Peter di tisiya: Nan kal ciwa. Nisi dumu: Numa kaw, numa tuɗis kuɗaŋu. Nisi kali goyo, jik hay lumna kaw; hay henjet na'ta kayni nisi may vi vaɗi.

⁴Hay li ma liyn foowa goyo, Yesu ka colay kulo deŋel zaw, may sa hatayna may wi ala colay zawni mi Yesuɗi.

⁵Yesu disi ala: Gurona, va ma ti may kigi ne'ɗi su? Nisi hotom dita: Va mayɗi.

⁶Nam disiya: Cukgi dena hay gal ma jufna vi lumda, nigi ma fi kaw. Nisi cukumu; may donota visi kay yawam kulo'o may loɗi, kay kulufna hobay hayam ŋolo.

⁷Nala sa ma hatayna ma Yesu minimna di tam Peter: Nam kayni mi Bum-Sumuna! Hay li ma Simon Peter wi ala zawni mi Bum-Sumuna, nam cuk sligara valam talamu, kay nam ay goy nala'a, nam gi tuwam goloŋ hay niy-lum ŋolla kuf',

⁸Sa hatayna sa hena ka sor lumda, nisi tan dena ma hobay hiɗi kulufna kuɗsiya kaw, kay nisi ay goy goy gine hiɗi deŋella ir goloŋ goboy kis-ma'.

⁹Hay li ma nisi jik kulo ɗeŋe, nisi wi ganuna tuni ta', kuluf buri vunamu hiɗi funa kaw.

¹⁰Yesu disiya: Nargi kuluf ma nigi vumin aya.

¹¹Simon Peter jik kulo hay lumda, tan dena ma hobay hiɗi kulufna ma ŋulona kis kalam dok-vasl yam ɦidi kulo ɗeŋe. Kuluf vi hay dena ŋolo, nir na'ta kep ir dena haw goyɗi.

¹²Yesu disiya: Nigiyay tigiya. Sa ma hatay mara kep ma mal vunam kulo jobom ala naŋ mi gige mayɗi. Kay nisi wi ala nam mi Bum-Sumuna.

¹³Yesu ma'a, sli funa, vulsita, nam li hiɗi kulufna nala kaw.

¹⁴Kayni hay sem ma ɦidina ma Yesu vul tuwam kir sa hatayna valamu, tun caway tam dayta valamu kulo jar sa mitina pa.

¹⁵Hay li ma nisi vat hiɗi tina vatna, Yesu di tam Simon Peter: Simon, goora vi Yonas, naŋ minan suw sa lakŋa su? Nam hotom dita: Awa, Bum-Sumuna, naŋ wi ala nan minaŋu. Yesu dumu: Kotaŋ tuw guro fok-dimina vanu!

¹⁶Nam dum sem ma'ta lo: Simon, goora vi Yonas, naŋ minan su? Peter hotom dita: Awa, Bum-Sumuna, naŋ wi ala nan minaŋu. Yesu dumu: Ŋomaŋ fok-dimina vanu.

¹⁷Nam dum sem ɦidita lo: Simon, goora vi Yonas, naŋ minan su? Peter yor tuwamu kay nam dum sem ɦidita: Naŋ minan su? Nam hotom dita: Bum-Sumuna, naŋ wi slen kaf, naŋ wi kaw ala nan minaŋu. Yesu dumu: Kotaŋ tuw fok-dimina vanu.

¹⁸Nan daŋ gasita, hay li ma naŋ ay joriyo tuwa, naŋ jun sligara vaŋ kay tuwaŋu, tuɗ arige hay liy ma naŋ mina kaw; may hay li ma naŋ muɗawa maari, naŋ ma meɗ ɓaŋ goyo, sa mara ma junaŋga, lo ma tuɗaŋ hay liy ma naŋ minɗin kaw.

¹⁹Nam di kayni kay ɗek ala nanige Peter ma vul suburta mi Lawna hay mitta valamu. Hay li ma nam di kayni dina, nam dumu: Tapaŋay kuɗanu.

²⁰Peter ci porlay bugolomu, nam wi sa ma hatayna ma Yesu minimna tapay kuɗsiya, nam ma hay tina vi funa, gah dig Yesu di kaw ala: Bum-Sumuna, nam ma di newt kaŋ kayn nam gige?

²¹Hay li ma Peter wumu, nam di tam Yesu: Nam ma kilan naŋ ma li talam mi mige?

²²Yesu dumu: La nan minawa ala nam mus iriya ta-ta nan hotaya, law vaŋ hay su?

²³Naŋu, tapaŋay kuɗanu. Kuɗ kayni, labara dusi goy jar sa ɓosiyosina ala ma hatayna namna mitɗi. May Yesu law kayn ala nam ma mitɗi naɗi, may nam di'e: La nan minawa ala nam mus iriya ta-ta nan hotaya, law vaŋ hay su?

²⁴Li di-goyta kay slen namna, ɗom kaw kayni mi ma hatayn namna. Numa wi kaw ala di-goyta valam gasiya.

²⁵Yesu li slen hena ŋolo ŋolo, lali ɗom ɗoy kayn kalam kep kepe, nan fi var ala nagat kay tuwa' kaw as ziy ɗerwel namna ma ɗoyn kaynɗi.