Read Masana YOHANA 4 Bible Online

YOHANA 4 - Masana bible

YOHANA 4

¹Hay li ma Bum-Sumun wi ala sa Farisen* humi ala Yesu fi sa hatayna ŋolo suw Yohana, li baptisma ŋol suwa kaw,

²May Yesu kay tuwamu may li baptismaɗi, may lum kayni si sa hatayna valamu.

³Nam hin Yudiya hot hay Galileya lo.

⁴Ŋaat kayni la litigekaw nam ma jik hay Samariya.

⁵Nam co hay hoyok-ziyn kep ma ka hay Samariya yum ala Sikar, goboy hiɗi sinena ma Yakub vulum mi goora valam Yosef.

⁶Hay ɗawni kaata vi Yakub aya. Hay rogoyta valamu Yesu ay makaya, nam mus gaa kel kaata may.

⁷Cata Samariyata kep ma kay go niyna. Yesu da'a: Vulan niy ma ci'e.

⁸Kay sa hatayna valamu kali hay hoyok-ziyna kay gus sle ma tina.

⁹Cata Samariyata dumu: Naŋ sa ma Yudiyana naŋ joban nan cata Samariyata kay vulaŋ niy ma cina kay mige? -- Kay sa Yudiyana jarsi may tap hiɗi sa Samariyanɗi. --

¹⁰Yesu hota' dita: Lali nak wi vulda vi Lawna, lali nak wi sa ma dag ala vulan niy ma ci'en zawni, Jobom kay niy ma cin ɗawn ti nak kay tuwagu, nala nam ɗawn ma vulag niy ma irina.

¹¹Na' dumu: Bum-Sumuna, va may kaŋ a naŋ go niy hiɗi namɗi, lo kaata zul ŋolo, niy namna ma irina naŋ fumay ɗawni arige?

¹²Buy Yakub ma vulma kaatiya, nam kay tuwamu, gurona valamu hiɗi farayna valam kaw ci niyna haya'a, naŋ kayn ŋol suwum su?

¹³Yesu hota' dita: Gigekaw ma ci kuɗ niyn tani laat ma lum lo;

¹⁴May nam ma min ci niyna ma nan vulumtina, laat ma lum noŋ loɗi, niyn ma nan vulumtin ɗawni, ma muɗ hayam mi liyn ma niyn law haya, ma jaŋay goyo ta-ta tam irita ta vatɗita.

¹⁵Cata ka dumu: Bum-Sumuna, vulan niy namna, a laata ma lan loɗi, a nan hotay tan go niy loɗi ge!

¹⁶Nam da'a: Tuɗag yag jufagiya, nak hotay tani.

¹⁷Cat hot dita: Jufan mayɗi. Yesu da'a: Nak di ala jufag mayɗi kayn hay liyamu.

¹⁸Kay nak yaw jufayn vasl, ma nak ka kuɗum wulinna kaw nam may mi jufagɗi. Hay kayni nak di gasita.

¹⁹Cata ka dumu: Bum-Sumuna, nan wi ala naŋ mi sa ma jobta-Lawna.

²⁰Sumayma'a girif kulo kay hiɗiyta zawni, may nigiya, nigi di ala liyn ma girif hayna ka kulo Yerusalem.

²¹Yesu da'a: Cata, vag yoboyna vanu, liyn ma ma'a, hay li ma nigi ma girif bumna kulo kay hiɗiyta zawni loɗi, hay Yerusalemɗi kaw.

²²Nigi girifim mi va ma nigi may wumɗi; may numa'a, numa girifim mi va ma numa wumu, kay su'da may goy vi Yudiyana pa.

²³May liyna ma ma'a -- liy namna ka wulini kaw -- hay li ma sa girif gasina ma girif Bumna hay Ŋusta hiɗi gasita kaw; kay Bumna garsi kayn si sa girifim ki kayn nana.

²⁴Lawna mi Ŋusta, nisi sa girifimu, la linigekaw nisi ma girifimu hay Ŋusta hiɗi gasita kaw.

²⁵Cata ka dumu: Nan wi ala Mesiyas ka ma'a, nam ma yum Kristu, hay li ma nam maawana, nam ma di slen goy tay kafe.

²⁶Yesu da'a: Nan ma ka law hiɗi naku, nan mi namu.

²⁷Hay na'ta kayni sa hatayna valamu ma'a, nisi fum kus Yoboyn hiɗi cata ta Samariyata, nisi muɗ ɦuyum'. Nir na'ta kepe, sa mal vunam kulo'o di ala: Naŋ jobom mi gige? Lebo: Naŋ law hiɗi na' kayn kay mige? May noŋɗi.

²⁸Cat hin genda va'a, kali hoyok-ziyna, ka di tam sumun ala:

²⁹Nigiyaya, ɗuwgi sana kep ma dan kay slena ma nan lum kafna; nam as lin mi Kristu ɗisu?

³⁰Nisi cukay goyo hay hoyok-ziyna, tuɗ talamu kaw.

³¹Hay na'ta sa hatayna valamu siɗawamu di'e: Rabbi, taŋu.

³²May nam disiya: Nan ka ti tina ma nigi wumɗina.

³³Nala sa hatayna ka di jar-tuwsiya: Sa mara maram va ma ti'e su?

³⁴Yesu ka disiya: Tina vanu kayni kay li minda vi nam ma ganina, a vat lopna valamu kaw.

³⁵Nigi may di ala til mayɗi fiɗi feɗna ma li'e ɗi su? Ɗuwgiya, nan ka digiya, poŋgi irgi kulo'o, ɗuwgi sinena ka muɗi haɓi a feɗa.

³⁶Wulini pa sa ma feɗna fi wurakŋa, tok vuɗna vi irita ta vatɗita. Kay sa ma was-jafna hiɗi sa ma feɗna fi firi kuɗ tuwsiya.

³⁷Kay hay kayni, sle ma diyna nam gasiya: Kep was jafna gaa'a, hena li feɗna may.

³⁸Nan cukgiyawa kay feɗ va ma nigi li lop kalamɗi, segena li lopnawa, nigi cuk kayni cuki hay ɦawa.

³⁹Sum sa Samariyana ŋolo sa hay hoyok-ziyn kayni vi hay Yesu kuɗ yoboyna vi cata, hay li ma na' li di-goyt ala: Nam dan kay slen ma nan lumna kaf.

⁴⁰Lo hay li ma sa Samariyana maawa talamu, nisi siɗawam kay nam ma mus hiɗi nisiya; nam mus ɗawni ir buur ma'.

⁴¹Sumuna ŋolo suw asa lo vi kuɗ yoboyna valamu.

⁴²Nisi tun caw di tam cata: Numa'a vi kayni kuɗ dita vagɗi; kay numa'a humum kay tuwma'a, numa wi'e kaw ala zawni mi sa ma su'da vi sa nagatna gasi.

⁴³Bugol buur ma' vatawa, Yesu kali ɗawn pa tuɗ Galileya;

⁴⁴Kay Yesu kay tuwamu di goy ala sa ma jobta-Lawna fi suburta hay nagata valamɗi.

⁴⁵May hay li ma nam co Galileya, sa Galileyana vum hiɗi firita, kay nisi wi slen kaf ma nam lumay hay Yerusalem hay buura vi yuldeta. Kay nisi kaw ay hay yuldeta.

⁴⁶Nam hot hay Kana hay Galileya lo, liyna ma nam muɗ niyna goy vinna. Hay Kapernawum sojen kep ma li lop vo vi mulla goora valam ka moyo.

⁴⁷Nam hum ala Yesu may hay yudiya pa maawa hay Galileya, nam tuɗ talamu, siɗawamu kay nam jikay gaa'a kay muɗ goora valam goy ŋaa'a, nam ma ay goboy vun mitta.

⁴⁸Yesu dumu: ɗekka hiɗi gul-yalda lali nigi wum wiyɗina, nigi lak ɗawn hay bay-vida!

⁴⁹Sojena ma li lop vo vi mulla dumu: Bum-Sumuna, jikaŋay gaa'a jew goora van mita.

⁵⁰Yesu dumu: Tuɗaŋu. goora vaŋ ka iriya. San kayni vi kuɗ yoboy ma Yesu dumna, nam kali kaw.

⁵¹Hay li ma nam ka jikay gaa'a, sa sunda valamu ŋafam iramaya dum ala goora valam ka iriya.

⁵²Nam jobsi ala goora valam muɗ marya kayni hay leer marige? Nisi dumu: Kamata hay leer ma siɗiyana, tuwam ma gum kuna hinimu.

⁵³Bumna wi goy haraŋ ala kayni hay leer ma Yesu dum ala goora vaŋ ka iriyana. Nam vi'e, nam hiɗi ziyna valam kaf kaw.

⁵⁴Kayni ti ɗekka ta Yesu la' sem ma'ta hay li ma nam may Yudiya pa co Galileya.