Read Masana YOHANA 6 Bible Online

YOHANA 6 - Masana bible

YOHANA 6

¹Bugol kayni Yesu kali goy gal hena vi niy-lumna vi Galileya ma yum Tiberiyad.

²Tok ŋolla tapay kuɗumu, kay nisi wi ɗekka ma nam lumay kat sa moyna.

³Yesu jik kulo kay hiɗiyta, ɗawni nam musi gaa'a hiɗi sa hatayna valamu.

⁴May yuldeta vi Paskata vi sa yudiyana ay goboyo.

⁵Yesu poŋ iram kulo na kayni, nam wi tokŋa vi vok ŋolla ka tuɗay talamu, nam ka di tam Filip: Nay ma gus fun ay arige a sumun kayni ma fi a ti'e?

⁶May nam di kayni kay wakamu, kay nam wi va ma nam ma lumna.

⁷Filip hotom dita: La funa ir deniye kis-ma' kaw, as ɓuraw kisi a sa fi ne' ne' kafɗi.

⁸Sa mara kep jar sa hatayna valamu, Andre, ɓasum Simon Peter dumu:

⁹Goor ma joriyona ka tani ma fu-orgena ka hay ɓalam vasl, kuluf ma' lay, may kay vok ŋol ma ɦini-ɦinin tani, nam asam kisin mige?

¹⁰Yesu di'e: Molgi sumun gaa'a. Hay liy namna usna ay ŋolo. Nisi lakay gaa'a, ŋaɓta visi ir sumun birim vasl.

¹¹Yesu yaw funa, gi bol kalamu, ɓurawam goy tam sa ay molay gaana; nam li nala kaw hiɗi kulufna, ta-ta nisi fi pet ma nisi mina.

¹²Hay li ma nisi hobawa, nam di tam sa hatayna valamu: Cawam ma ray goyna yawam kulo'o, kay va ma ba goyɗi.

¹³Wulini nisi yawam kulo'o, nisi hob tikisina doogo yam ma' hiɗi caw fu-orgena, ma ray goy kuɗ sumuna, hay li ma nisi ti tina.

¹⁴Vok ɗekka ma Yesu lumna kayni, sumuna di'e: Gasi nam zawni mi jobta-Lawna ma min ma kay nagata.

¹⁵Hay li ma Yesu wi ala nisi min tunum mulu, nam puw goyo, kali lo kulo kay hiɗiyta, nam valam kep.

¹⁶Hay li ma vulatita coowa, sa hatayna valamu jik gaa ta-ta deŋel niy-lum ŋolla.

¹⁷Nisi jik hay lumda kay kal ta-ta kulo gal hena vi niy-lum ŋolla hay Kapernawum. Wulini liyn liy jufunu, may Yesu bay ma tisi tuwa.

¹⁸Simeɗ ŋolla biwa, billa li ŋol suw asa.

¹⁹Hay li ma nisi gi voksiya ir stade* dok-ma' yam vasl lebo dok-ɦidi, nisi wi Yesu ka tuɗay kay niy-lumna; hay li ma nam hebay goboy tam lumda, nisi muɗi nari.

²⁰May Yesu disiya: Kayni mi nanu, ligi narɗi!

²¹Nisi min jikimay kulo kuɗsiya hay lumda, ɗuw na kayni lumda gaɓ kulo deŋel hay liy ma nisi na hayn cis' may.

²²Hay buurta ka'ta, vokŋa ma hinay goy gal hena vi niy-lumna, ɗuw kayni lumna mara kalis ɗawn paɗi, may lumda kep na kay', nisi may wi Yesu jik kulo haya' hiɗi sa hatayna valamɗi, may nisi kali visiya.

²³May lum hena may Tiberiyad pa goboy hiɗi liyn ma nisi ti fun hayna, bugol Bum-Sumuna gi bol kalam gina.

²⁴Hay li ma sumun wi ala Yesu hiɗi sa hatayna valam kaw say ɗawnɗi, nisi jik hay lumna, kali Kapernawum kay gar Yesu.

²⁵Nisi fum kulo gal niy-lum ŋolla dumu: Rabbi, naŋ may gal tan kayn lancitige?

²⁶Yesu hot dita: Nan digi gasita, nigi garanu, may kay nigi wi ɗekkaɗi, may kay ta ala nigi ti funa hobay kaw.

²⁷Ligi lop kay tin ma ba goynaɗi, may kay tina ma mus ta-ta kay irita ta vatɗita, nam ma goora vi sana ma vulgiya, kay nam kayni ma Bumna -- Lawna -- tun soona valam kalamna.

²⁸Nisi dumu: Numa ma lum mi mige a li lopna vi Lawna?

²⁹Yesu hot dita: Lopna vi Lawn kayni kay nigi vi hay nam ma nam gumina.

³⁰Ɗekka mige ma naŋ ma li'e kay numa ma wa'a, vi hayaŋ kaw? Naŋ lum mi lop mige?

³¹Sumayma ti manna hay fulda, ki ɗo'ay nala: Nam vulsi tina ma may wuralawn pana a ti'e.[5]

³²Yesu disiya: Nan digi gasita, funa ma may wuralawni pana vulgitin mi Mususɗi, may funa ma gasina ma may wuralawni pana vulgit mi Bunu;

³³kay funa vi Lawna, nam kayn ma may kulo wuralawni pana, ma vul irita mi sum sa nagatna.

³⁴Nisi di talamu: Bum-Sumuna, naŋ vulma fun kayni dok-doko.

³⁵Yesu disi ala: Nan mi fun ma irina. Nam ma min ma tanu, mayt ma cum loɗi, nam ma vi hayanu, laat ma lum loɗi kaw.

³⁶May nan digiya, nigi wanawa, nir na'ta kep nigi min viɗi.

³⁷Nisi kaf sa Bumna vulanta, nisi ma tanu, nam ma ma katanu, nan ma gum goy noŋɗi;

³⁸Kay nan may kulo wuralawni pa, kay li minda vanɗi, may kay li minda vi nam ma ganina.

³⁹Awa, minda vi nam ma ganin ka kayn ala: Nisi kaf sa nam vulantina, nan ma ba mara kuɗsiɗi, may kay nan ma daysi kulo'o hay buur ma cawna.

⁴⁰Minda vi Bun kayn ala: San gigekaw ma ɗuw goora, vi hayamu kaw, nam ma fi irita ta vatɗita; nan ma dayam kulo'o hay buur ma cawna kaw.

⁴¹Hay na'ta kayni sa Yudiyana ŋurnay kuɗumu, kay nam di'e: Nanu, nan mi funa ma may kulo wuralawni pana.

⁴²Nisi di'e: Nam zawn may mi Yesu di su? Goora vi Yosef ɗi su? Ma bulum hiɗi sulum nay wisi yawn ɗi su? Nam as di ala: Nan jikay kulo wuralawni pa ir nanige?

⁴³Yesu hotsi dita: Nigi may ŋurnay jar-tuwgiɗi.

⁴⁴Sa as ma katanu bay bumna ma ganina maramayɗi, nan min dayam kulo'o hay buur ma cawna may.

⁴⁵Ɗota ɗoy hay sa jobta-Lawna ala: Nisi kaf Lawna ma hatsiya.[6] Gigekaw ma hum vun Bumnawa, vi hatta valamu kaw ma tanu.

⁴⁶Sa ma wi Bumna mayɗi, may mi nam ma may vi Lawni pana; namu nam wi Bumniyawa.

⁴⁷Nan digi gasita, sa ma vi'e nam ma fi irita ta vatɗita.

⁴⁸Nanu, nan mi funa vi irita.

⁴⁹Sumaygi ti manna hay fulda, nisi mitiya.

⁵⁰Tani mi funa ma jikay wuralawni pana, kay gigekaw ma fi tumu, nam ma mitɗi.

⁵¹Nanu, nan kayni mi fun ma irina ma may kulo wuralawni pa. La sa ti kuɗ fun kayni, nam ma mus iriya ta-ta hay vatɗita, kay funa ma nan vulum kayni, nam mi sliw-tuwanu kay irita vi sa nagatna.

⁵²Hay na'ta sa yudiyana ci wayt jar-tuwsiya di'e: Nam as vulay sliw-tuwamu a ti'e ir nanige?

⁵³Yesu disiya: Nan digi gasita, la nigi ti sliw-tuwna vi goora vi sanaɗi, ci busuwamɗi kaw, irita may haygi noŋɗi.

⁵⁴Nam ma ti sliw-tuwanu, can busuwan kaw, nam ma fi irita ta vatɗita, nan ma dayam kulo'o hay buur ma cawna kaw.

⁵⁵Kay sliw-tuwan kayni mi va ma tina gasi, busuwan kaw mi va ma cina gasi.

⁵⁶Sa ma ti sliw-tuwanu, ci busuwanu kaw, mus hayanu, nan mus hayamu kaw.

⁵⁷Ki Bumna ma irina ganiyawa, nan kaw ka iriya hay Bumna, nala kaw sa ma tan tuwan nanu, ma mus iri kuɗan nanu.

⁵⁸Funa ma jikay wuralawni pana ka tani. Nam may ŋray ki ma sumaygi tumaya, nisi mit kawna naɗi. Sa ma ti fun namna nam ma mus iriya ta-ta hay vatɗita.

⁵⁹Kayni mi slen ma Yesu dumu hay li ma nam ka hatsi hay sinagogayna*, hay Kapernawum.

⁶⁰Hay li ma nisi hum kayni, ŋolo jar sa hatayna valamu di'e: Yoboyna ma ɗeŋŋa kayni sa ma as kay humum mi gige?

⁶¹Yesu wi hay tuwam ala sa hatayna valamu ka ŋurnay jar-tuwsiya kuɗ lawt kayni, nam disi ala: Lawta kayni muɗi kigiya mi va ma dab sem su?

⁶²May la nigi wi goora vi sanawa kal kulo'o hay liy ma nam ay jew pana klasige!

⁶³Vul irita kayni ti Ŋusta. Sliw-tuwna nam mi va ɦawa. Yoboyna ma nan dum tigiya kayni mi Ŋusta hiɗi irita kaw.

⁶⁴May sara ka jargi yaw, nisi may viyɗi. Kay hay tun cawta pa Yesu wi nisi sa viɗina hiɗi nam ma min di newt kalamna kaw.

⁶⁵Nam di'e: Kuɗ kayni nan digi ala, sana as ma tanɗi, la Bumna vulum a li nalaɗina.

⁶⁶Hay liy namna pa, sa hatayna valam segen ŋolo tun caw hot goy bugolsiya, nisi min tuɗ hiɗi nam loɗi.

⁶⁷Yesu ka law tam sa doogo yam ma'na ala: Nigiya, nigi min tu'ɗi may su?

⁶⁸Simon Peter hot dit talamu di'e: Bum-Sumuna, numa ma tuɗ tam gige? Yoboyna vi irita ta vatɗita ka kaŋu.

⁶⁹Numa vi'e, wi kaw ala naŋ mi Kristu, ma Peldetna vi Lawna.

⁷⁰Yesu hotsi dita: Nigi sa doogo yam ma'na, vilekgi goy mi nanɗi su? May kep jargiya mi Matna!

⁷¹Nam law kayn kay Yudas goora vi Simon Iskariyot, kay nam mi sa ma min di newt kalamna, nam kep jar sa doogo yam ma'na.