Read Masana YOHANA 8 Bible Online

YOHANA 8 - Masana bible

YOHANA 8

²Hay grawt culum, nam kali hay Tempella lo, sumun kaf ma talamu, nam mus gaa'a, tun caw hatsiya.

³Sa wi-ɗota hiɗi sa Farisena* mar cat kep ta nisi fa'ay hay zlata-bulota,

⁴nisi cola' goy jarsi zaw, tun caw di tam Yesu ala: Bum-hatta, cat zawni numa fa'ay hay zlata-bulota,

⁵Musus hay Gatta valamu vulma hagata ala cata ta ki kayn nala ga' hiɗi goorhoyona:[7] May naŋ di mige?

⁶Nisi di slen kayni kay nemem a pi lawta kalamu. May Yesu heray gaa'a, tun caw ɗo hiɗi cita-ɓalamu gaa kay nagata.

⁷Hay li ma nisi ka so tuwsi kuɗum hiɗi jobta lo lo, nam colay kulo'o di tisiya: Sa ma jargi ma li suluk noŋɗina sli goorhoyona, nam ga' jewe.

⁸Nam heray gaa'a lo, tun caw ɗo gaa kay nagata.

⁹Hay li ma nisi hum kayni, hay li ma tap-wida visiya pi lawt kisiya, nisi zlet tuwsi goy kep kep, tun caw tam sa liy maara ta-ta tam sa cawna. Yesu hin valam kep, hiɗi cata ta ay colay jarsita.

¹⁰Wulini Yesu colay kulo'o di ta'a: Cata, nisi sa pi lawt kagŋa ka arige? Sa may ka kitata kagɗi su?

¹¹Na' hot dita: Sa mayɗi, Bum-Sumuna. Yesu da'a: Nan kaw, nan ka kitat kagɗi, tuɗag magu, li suluk loɗi.

¹²Yesu kus yoboyn tisi lo di'e: Nanu mi haraŋa vi nagata; sa ma tap kuɗanu, nam ma poy hay jufundaɗi, may nam ma fi haraŋa vi irita.

¹³Kay na'ta sa Farisena* dumu: Naŋ li di-goyta kayn kay tuwaŋ ma ɗeŋŋa, nala di-goyta vaŋu tay gasiɗi.

¹⁴Yesu hotsi dita: La nan li di-goyta kay tuwan ma ɗeŋŋa kaw, di-goyta van kayni gasiya. Kay nan wi liyn ma nan may pana, liyn ma nan tuɗ haya nan wumu kaw. May nigiya, nigi wi liyn ma nan may panɗi, liyn ma nan tuɗ hayna kaw nigi wumɗi.

¹⁵Nigiya, nigi ka kitata kuɗ sliwna, nanu nan ka kitata kay saɗi.

¹⁶May la nan ka kitat kaw, kitata van ka' kayn kuɗ gasita va'a, kay nan may van kepɗi, may Bumna ma ganina ka hiɗi nanu.

¹⁷Kay hay Gatta vigiya ɗot ɗoy ala di-goyta vi sumun ma' na' gasiya.[8]

¹⁸Nanu, nan li di-goyta kay tuwan ma ɗeŋŋa, nala Bumna ma ganina li di-goyta kanu kaw.

¹⁹Kay na'ta nisi dumu: Buŋu ka arige? Yesu hot dita: Nigi may wan nanɗi, nigi wi Bunɗi kaw, la nigi wanawa, nigi ma wi Bunu may.

²⁰Yesu di yoboyn namna kayni nam colay goboy tam timgil ma cuk gurjut hayna. Hay li ma nam ka hat hay Tempella, sa vumɗi kaw, kay liyna valam bay co tuwa.

²¹Yesu disi lo ala: Nan ma kal goyo, nigi ma garanu kaw, may nigi ma mit hay sulukŋa vigiya; liyn ma nan ma kal hayn ɗawni nigi as coys hayamɗi.

²²Sa Yudiyana di'e: Nam min ci tuwam goy kay tuwamu su? Kay nam di ala liyn ma nan ma kal hayna ɗawni nigi as coys hayɗi?

²³Nam di tisiya: Nigi ka gaa tani, may nanu, nan may kulo pa. Nigiya si sum sa nagat tanna, may nanu, nan may mi sa ma nagat tanɗi.

²⁴Kuɗ na'ta nan digi ala nigi ma mit hay sulukŋa vigiya, la nigi bay vi ala nan mi nanu, nigi ma mit hay sulukŋa vigiya.

²⁵Nisi dumu: Naŋ mi gige? Yesu disiya: Nan as digi ɗawn kay mige? Kayni mi va ma nan digiyawa kalam hay jew pa.

²⁶Slen ŋol ka kanu kay di tigiya, kay ka kitat kigiya kaw. May nam ma ganina nam gasiya, va ma nan humumay talam pana, nan dum tam sa nagatna may.

²⁷Nisi may wi goy haraŋ ala nam law tisi kayn kay Bumnaɗi.

²⁸Yesu disiya: Hay li ma nigi gaɓ goora vi sanawa kulo'ona, hay na'ta nigi ma wi ala nan mi nanu, nan may li va kay tuwan ma ɗeŋɗi, may nan dum mi va ma Bumna hatanay a di'e.

²⁹Nam ma ganina ka hiɗi nanu; nam hinan goy van kepɗi, kay dok-dok nan lum mi va ma kiram ŋaana.

³⁰Hay li ma nam di slen kayni dina, sumuna ŋolo vi hayamu.

³¹Nala Yesu ka di tam sa Yudiyana sa vi hayamna ala: La nigi lak hay yoboyna vanu, nigi kayni si sa hatayna van gasi;

³²Nigi ma wi gasita, gasita na'ta ma butgi goyo.

³³Nisi hotom dita: Numa kayni si jafna vi Abraham, numa may li gorvo vok saɗi; nala naŋ di ala numa ma fi butta-goyta kayn ir nanige?

³⁴Yesu hot dita disiya: Nan digi gasita, gigekaw ma li suluku, nam mi gorvona vi sulukŋa.

³⁵Kay gorvona fi mus hay ziyna ta-ta hay vatɗitɗi, may goora fi mus haya ta-ta hay vatɗita.

³⁶La goora vulgi butta-goyta, nigi ma but goy gasi.

³⁷Nan wi goy haraŋ ala nigiya si jafna vi Abraham; may nigi ka gar kay can goyo, kay yoboyna vanu may fi liyn ma musta haygiɗi.

³⁸Nanu, nan di va ma nan wumay vi bunu, may nigiya, nigi lum mi slen ma nigi humumay vun bugiya.

³⁹Nisi hotom dita: Buma'a kayni mi Abraham, Yesu disiya: la nigi si gurona vi Abraham, ligi lopna vi Abraham.

⁴⁰Wulini nan digi gasita ta nan huma'ay vi Lawni pata, may nigi gar kay can goyo. Van kayni Abraham may lumɗi.

⁴¹Nigi lum kayni mi lopna vi bugiya. Nisi dumu: Numa vuɗi misewɗi, buma kep kayn mi Lawna.

⁴²Yesu disiya: La Lawn kayn mi bugiya, nigi kaw ma minanu, kay nan kali goyo, may goy kayn tam Lawni pa, nan ma kay tuwan ma ɗeŋŋaɗi, may ganay mi namu.

⁴³Nigi may hum caw lawta vanɗi kay mige? Kayni kuɗ ta ala nigi min hum yoboyna vanɗi.

⁴⁴Bugi kayni mi Matna. Nigi min hoba' kulo kayni ti darta vi bugiya. Matna nam ci mati hay cawa'ta tunita pa, nam col kay gasitɗi kaw, kay gasita tay hayamɗi. Hay li ma nam ka sini, dita valam may valam kay tuwam ma ɗeŋŋa, kay nam ka sini, nam mi bum-sinda kaw.

⁴⁵May nanu, kay nan digi gasita, nigi min vi hayanɗi may.

⁴⁶Sa jargiya ma as pi lawt kan ala nan li suluk mara goor ne' kaw mi gige? La nan digi gasita, nigi min viɗi kay mige?

⁴⁷Sana vi Lawna nam humum mi yoboyna vi Lawna, nigi may humɗi kay nigi may vi Lawnɗi.

⁴⁸Sa yudiyana hotom dita: Numa di kaŋ ala naŋ mi sa ma Samariyana, ful ka kaŋu kaw kayni hay liyamɗi su?

⁴⁹Yesu hot dita: Ful may kanɗi, nan slum kulo kayn mi yam bunu may nigi ɗuwan bisi.

⁵⁰Nanu nan may gar gajijita vanɗi, nam ma gar gajijita van ka'a, ma ka kitat kawna.

⁵¹Nan digi gasita, la san ŋom yoboyna vanu, nam ma wi mittaɗi ta-ta hay vatɗita.

⁵²Sa Yudiyana dumu: Wulini numa waawa ala ful ka kaŋu. Abraham mitiya, sa jobta-Lawna lay. May naŋ di'e: La sa ŋom yoboyna vanu, nam ma jugo mittaɗi!

⁵³Naŋ kayn ŋol suw buma Abraham ma mitin su? Sa Jobta-Lawna kaw mitiya, may naŋ ɗuw tuwaŋ kayn ala naŋ mi gige?

⁵⁴Yesu hot dita: La nan vul suburta mi tuwanu, suburta van kayn waa'a. Suburan kayn mi Bunu, nam ma nigi di kalam ala nam mi bugiyana.

⁵⁵Nigi may wumɗi may nanu nan wumu. La nan di ala nan wumɗi, nan muɗi mi sa ma sinda kigi nigi nala. May nan wumu, nala nan ŋom yoboyna valamu.

⁵⁶Abraham bugiya hobay hiɗi firita hay varta kay wi buurta vanu. Nam wa'a, li firi kaw.

⁵⁷Sa yudiyana dumu: Nan bay li busat dok-vasl tuwa, may nan wi Abraham aya?

⁵⁸Yesu disiya: nan digi gasita: Jew vu'da vi Abraham nan aya.

⁵⁹Kay na'ta nisi yaw goorhoyona kay gum hiɗi namu; may Yesu ŋay tuwamu, kali goy jiya, hin Tempella.