Read Masana LOPNA 1 Bible Online

LOPNA 1 - Masana bible

LOPNA 1

¹Tewfilus, hay ɗerwella van ma nan ɗom taŋ jewna, nan daŋ labara kay slen ma Yesu tun caw lumna hiɗi ma nam tun caw hatamna kaw,

²ta-ta hay buur ma slumis kulo'o hay wuralawna, bugol nam ɗek sa Apostolayna valamu sa nam vileksiyawa hay Ŋusta-Peldetta ɗekŋa.

³Sa nam bugol wakka ŋolo vul tuwam kirsi iriya, bugol nam ci lasta cina, ɗek tuwam kirsiya buur dok-fiɗi, ka law kay mulda vi Lawna.

⁴Hay li ma nam ay hiɗi nisiya, nam disi ala nisi ma ja jarsi goy gine hiɗi Yerusalemɗi, may nisi ma lak zam va ma Bumna di kay nam min vula, nam di'e: Kayni ma va ma nan ligi di-goyt kalamna,

⁵kay Yohana li baptisma hiɗi niyna, may nigiya, hay buur ma wulin vok ŋolɗi, nigi ma fi baptisma hiɗi Ŋusta-Peldetta.

⁶Kay na'ta hay li ma nisi ka dakaya, nisi jobom ala: Bum-Sumuna, naŋ ma tun mulda vi Israyel ɗawn hay liy namna de su?

⁷Nam hotsi dita: A wi caw liyna hiɗi leera ma bunu kaam hiɗi donota valamna kayn may kigiɗi.

⁸May nigi ma fi donota, hay li ma Ŋusta-Peldetta maawa kigiya, nigi ma muɗ si sa di goy kanu hay Yerusalem, hay Yudiya pet, hay Samariya kaw, ta-ta hay dabaŋ-gu'ta vi nagat goŋ'.

⁹Hay li ma nam di kayn dina, nam sliys kulo'o hay li ma nisi ka lakay ɗuwa, ɗugulla viyim goy vok irsiya may.

¹⁰Hay li ma nisi ka lakay ɗuw kulo wuralawn ŋiresl hay liyn ma nam kali hayna, ɗuw na kayn sumun ma' cuki hiɗi sligar ma haɓ tal-tal', lakay voksiya, ka disi ala:

¹¹Nigi sa Galileyana, nigi lak kay ɗuw kulo dukalawna kay mige? Yesu nam ma slumis kulo wuralawna goy jargi pana, nam ma hotiya lo ŋray ca ki nigi wum tuɗ kulo wuralawn ɗawn nala kaw.

¹²Wulini nisi hotay hay Yerusalem, hay li ma nisi may goy hay hiɗiyta ta ya' ala Olive pa, ta ka goboy hiɗi Yerusalem ir tu'da sabatna kepe[1]

¹³Hay li ma nisi cuk kulo haya, nisi kal kulo hay ziyda-kulota hay liyn ma nisi lak hay dok-dokŋa: Peter, Yohana, Yakub hiɗi Andre, Filip hiɗi Tomas, Bartelemi hiɗi Matewus, Yakub goora vi Alfewus, Simon ma ciwera, hiɗi Yudas goora vi Yakub.

¹⁴Nisi kaf hay varta kep, so'oti hiɗi siɗawta, hiɗi boyna, hiɗi Mariya sum Yesu, hiɗi ɓosiyomna kaw.

¹⁵Hay buur namna, Peter fok kulo jar ɓosiyomna, -- ŋaɓta vi sumun sa dakayna ay goboy kis kalam dok-ma' -- Nam di ala:

¹⁶Ɓosiyonna, la linigekaw ɗota ta Ŋusta-Peldetta di goy hay vun David vuna' ma hob kulo'o, ɗota ta di ala la linigekaw Yudas ma muɗ mi ma tuni vok sum sa min vi Yesuna.[2]

¹⁷Nam ay ŋaɓay jaraya, nam fi galla valamu ma sunda kayni kaw.

¹⁸Hay li ma san kayni gus sinena hiɗi wurakŋa vi jiw-zlata, nam gi tuwam gaa'a, yalam pi gaa kit', hoyokam kusa, ruwatam mer goy kep kep.

¹⁹Van kayni sum sa lakay hay Yerusalem pet wum goy haraŋi, ta-ta sinen kayni fi yida hay vunna visi ala: Hakeldama, kayn min di'e: sinena vi busuwna.

²⁰Kay ɗota ɗoy hay ɗerwella vi Nulla ala: Ziyna valam ma hin goy waa'a, sa mara mus hay noŋɗi. Lo, Sa mara ma vurna baŋalamu.[3]

²¹Nala jar nisi sa ays hiɗi nay dok-dok hay liyn ma Yesu ays hiɗi nayn lakŋi,

²²tun caw hay baptisma vi Yohana pa, ta-ta hay buur ma nam sliys goy jarayn pa, jar nisi sa ka kuɗaya, kep jarsiya ma muɗ mi ma li di-goyta hiɗi naya kay dayta-kulota.

²³Nisi lak sumun ma' voksiya: Yosef ma yum Barsabas, ma gileta valam Yustus, hiɗi Matiyas.

²⁴Bugolda nisi siɗaw ala: Bum-Sumuna, naŋ ma wi dikga vi sumun kaf, ɗekma kay sa ma naŋ min vilekemu jar sum sa ma'na lakŋi,

²⁵kay nam ma vurna hay baŋalam hay lopna vi sunda tani, hiɗi lopna vi apostolla tani kaw ma Yudas ram goyo kay kal hay liyna valamu.

²⁶Nisi li ŋaɓta jar-tuwsi kuɗ ɦayta, ŋaɓta nig kay Matiyas, nam tap hiɗi sa Apostolayna sa doogo yam kepna.