Read Masana LOPNA 12 Bible Online

LOPNA 12 - Masana bible

LOPNA 12

¹Hay liy namna kayni, mulla Herod tun caw li las mi sum sara'a sa ka hay tapta,

²Kay lassiya, Yakub ɓasum Yohana kaw nam cum goyo hiɗi kew-gaferaŋa.

³Hay li ma nam ɗuw lawta kayni kir sa Yudiyana ŋaa'a, nam vi Peter lo, kayni hay buura vi fun-bay-kufna.[24]

⁴Hay li ma nam vumu, gum daŋgay kaw gina, nam vulum hay ɓam sojena sa ŋomda, sa lak kuɗ tuwsi fiɗi fiɗi, muɗ tuwsi sem fiɗi kay ŋomomu, hay varta ta ala bugol Paskata nam min tuɗum goy vok sumuna.

⁵Nisi ŋom Peter hay daŋgayna, may sa tapna ka siɗaw Lawn kalamu hiɗi ŋiraysi pet.

⁶Herod min kay tuɗum goy vok sumuna; hay henjet na'ta kayni, Peter ma ay ɓalay gaa hiɗi jaɓna ma', ka buri sene jar sojena ma', sa ŋomda lakay goy vun-ziyna ŋom daŋgayna may.

⁷Ɗuw na kayni, sunda-wuralawna kep co'o, haraŋa li hay ziyda-daŋgayna, sunda-wuralawna geɗ Peter hay galamu, zliyim kulo'o, dum ala: Fokaŋ kulo gosoy. Jaɓna ma hay ɓalamna cuk gaa'a.

⁸Sunda-wuralawna dumu: Junaŋ kantin furaŋu, cukaŋ tuguruna vaŋu kaw. Nam li ki kayni nala. Sunda-wuralawna dum ala: Cukaŋ sligara vaŋ taŋu, tapaŋay kuɗanu.

⁹Peter kali goy jiya, tapay kuɗumu. Nam may wi goy haraŋ ala sa sunda vi Lawna li kayni gasiyaɗi, may varta valam kayn ala: Vul tuwam kiram kayni mi va'a.

¹⁰Hay li ma nisi kurut ŋomda ta jewta, kurut ta bugolda ta ma'ta, nisi co tam vun-ziyna ma kawayna, ma vunam muɗi tam hoyok-ziyn hayna, nam mal goy voksiya kay tuwamu, nisi cuki goy jiya, tuɗ voksi hay hagata, kali wit' de', sunda-wuralawna kaliya.

¹¹Hay li ma Peter fi tuwamawa, nam di ala: Nan waawa goy gasi ala Bum-Sumuna gi sunda valamiyawa, nam butanawa goy hay ɓam Herod hiɗi slena kaf ma sa Yudiyana ka zamamna.

¹²Bugolda hay li ma nam var vari, nam kal hay ziyna vi Mariya sum Yohana ma gileta valam Markus. Liyna ma sumuna ŋolo ka tokay haya, ka siɗawa kaw.

¹³Hay li ma nam ci vun-ziyna, cata-sunda kepe semda va' Rode, ma goboy kay huma.

¹⁴Na' hum del Peter; hobay hiɗi firita, na' mal vun-ziyda goyɗi, may hotay jaŋ kay disi ala: Ka goy jiy kayni mi Peter.

¹⁵Nisi ka di ta' ala: Nak ɦoyaya. May na' so'ot ala lawta kayni hay liya'a.

¹⁶Nisi di ala: Kayni mi sunda-Wuralawna valamu. May Peter ka ci vun-ziyna lo lo, nisi mal vunna goyo, hay li ma nisi wumu, nisi muɗi ɦuyum'.

¹⁷Nam daksi hiɗi ɓalamu kay nisi ma lak ŋal kiliŋ', nam tun caw visi labara ala nanige Bum-Sumuna butumay goy hay daŋgayna pa. Nam ka di ala: Van kayni nigi ma dum goy tam Yakub hiɗi ɓosiyomna. Nam kali goyo, kal hay liyn mara'a.

¹⁸Hay li ma liyn foowa goyo, ɦiwirta li jar sojena kiɗayɗi, kay nisi wi va ma Peter muɗnaɗi.

¹⁹Hay li ma Herod garamu may fumɗi, nam ka kitat kay sa ŋomda, vul hagata kay cisi goyo. Nam fokis Yudiya pa, kal hay Sesariya, musi malam ɗawni.

²⁰Nam ay gaw hiɗi sum sa Tirus hiɗi Sidon, nisi co talamu hay varta kep, hay li ma nisi tap Blastus, soje ma ŋolla ma ŋom ziyna vi mulla kuɗsi tapna, nisi ma vokomu kay gar toyta, kay tiyna visi mays kayni hay nagata vi mulla pa.

²¹Hay li ma buur ma colina maawa, Herod cuk sligara vi mulda talamu, gah goy gaa kay zlamda-kitata valamu, ɓaka kaw.

²²Sumun ka siwela di'e: Kayni mi del lawayna, may mi del saɗi!

²³Hay musta valam na dam' kayni, sunda vi Bum-Sumuna cumu, kay nam may vul suburta mi Lawnaɗi, jufulla tumu, sukam sa'ata.

²⁴Yoboyna vi Bum-Sumuna wul ŋolo, biya goyo kaw.

²⁵Hay li ma Barnabas hiɗi Saulus vat hiɗi lopna visiya ma hay Yerusalem vatna, nisi vi Yohana ma gileta valam Markus kuɗsiya, hot misi hay Yerusalem may.