Read Masana LOPNA 14 Bible Online

LOPNA 14 - Masana bible

LOPNA 14

¹Hay Ikoniyum, Paulus hiɗi Barnabas cuk kalaf hay sinagogayna* vi sa Yudiyana, nisi kus yoboyna ta-ta vok ma ŋolla vi sa Yudiyana hiɗi sa Grekŋa kaw vi'e.

²May Yudiyana sa min viɗina li yam sa waana kat ɓosiyosina.

³Nisi lakay hay Ikoniyum ir buura ŋolo, nisi law hiɗi diksi kaf hay Bum-Sumuna ma nisi li di-goyta kay yoboyna ma slugota valamu, ma vulsi kay wi ɗekka hiɗi sle ma gul-yalda ma nisi lum hiɗi ɓisiya.

⁴Vokŋa ma hay hoyok-ziyna ɓuraw gaa tis', sum sa hena tapay kuɗ sa Yudiyana, sa hena tapay kuɗ sa Apostolayna.

⁵Hay li ma sa waana hiɗi sa Yudiyana, hiɗi sa ŋulona visi kaw tun caw fok lawta kay lisi lasi, kay gisi hiɗi goorhoyona kaw,

⁶Paulus hiɗi Barnabas, hay li ma tuwsi disiya, nisi ŋay goy hay hoyok-ziyna vi Likawniya, Listra, Derbe hiɗi liyn ma galamna.

⁷Nisi kus labara ma firina haya kaw.

⁸Hay Listra, sa ma hurɓulina ay ɗawn musi dam', nam vuɗi hurɓuliya, nam may tuɗ noŋɗi.

⁹San kayni hum Paulus ka lawa. Paulus cuk iram kiram ŋiresl, hay li ma nam wi vida valam ta as muɗum goy ŋaa'a,

¹⁰Paulus di hiɗi delem kulo ala: colaŋ kulo ɗiger kay seŋu. Nam ɦal kulo gif', tun caw tuɗ kaw.

¹¹Hay li ma sumuna wi va ma Paulus lum kayni, sumun siwel hiɗi delsi kulo'o hay vun Lawdikiyana ala: Lawayna ma sli tuw sumun nalana jikiyawa gaa taya.

¹²Nisi yi Barnabas ala Yupiter, Paulus nisi yum ala Merkuri may, kay sli lawti kayni mi namu.[32]

¹³Mul-ma-ɗifinna vi Yupiter ma ka goy hay vun-galana vi hoyok-ziyna, mar luway-jufayna hiɗi zigewna ma torɗayna hay vun-galana, nam min li ɗifinna ŋray ca ki sumuna var nala kaw.

¹⁴Hay li ma sa Apostolayna, Barnabas hiɗi Paulus hum na kayni, nisi haw sligara visi goyo, pat jaŋ kulo jar sumuna, siwel tam sumuna kaw ala:

¹⁵Nigi li van kayni kay mige? Numa kaw numa si sumuna ŋray ca kigi nigi nala. Numa ka kus labara ma firina tigiya kay nigi ma muɗay goy tam slen ma waana kayni pa, muɗ irgi tam Lawn ma irina, ma li dukalawna, li nagata, li niy-lum ma ŋolla hiɗi slen ma hayamna kaf.

¹⁶Hay zaman ma kalina, nam ra jaf-sumun kaf poy hay hagata visiya visiya,

¹⁷nir na'ta kepe, nam hin di-goyta goy kay ŋaata ma nam lumna noŋɗi, hay liyn ma nam hin niy ma sina ay kulo dukalawni pa, hiɗi liyna ma jafna li ŋaa'a, hay li ma nam hobgi hiɗi tina, hob dikgiya hiɗi firita kaw.

¹⁸Hiɗi dita kayni kaf, a tel sumuna kay li ɗifin tisiɗi kayni, ma li lop ŋolo.

¹⁹Sum sa Yudiyana may hay Antiokiya pa, hay Ikoniyum pa, gi yam sumuna, nisi gi Paulus hiɗi goorhoyona, sabam goy jiy hoyok-ziyna, nisi var ala nam mitiya.

²⁰Sa hatayna ŋuy goy talamu, nam fok kulo'o, kal hay hoyok-ziyna kaw.

²¹hay li ma nisi kus yoboyna hay hoyok-ziyna kayni kusna, bugol nisi muɗ sumuna ŋolo goy sa hatayna muɗna, nisi hotay hay Listra, hay Ikoniyum hiɗi Antiokiya kaw.

²²Nisi vul donota mi sa hatayna, vulsi gatta kay nisi lak hay vida hiɗi dita ala: Nay as kal hay mulda-wuralawna ɗawni hiɗi zumalda ŋolo.

²³Nisi siɗawa, li laata kaw, bugolda nisi vilek sa maariyana vi tapna vilekŋa, nisi vulsi goy hay ɓam Bum-Sumuna ma nisi vi kuɗumna.

²⁴Hay li ma nisi raw hay Pisidiya rawna, nisi co hay Pamfiliya.

²⁵Hay li ma yoboyna kusi hay Perge kusna, nisi kali hay Ataliya.

²⁶Goy ɗawni pa nisi dol hay Antiokiya, liyna ma sumuna vulsi goy hay slugota vi Lawna kay lopna ma nisi lum ay wulinna kayni.

²⁷Hay cota visiya, nisi tok sa tapna, disi kay slena ma Lawna lum hiɗi nisin kaf, disi ala ir nanige Lawna mal vun-ziyna vi vida kay sa waana.

²⁸Nisi lak hiɗi sa hatayna ir liyn kiɗayɗi.