Read Masana LOPNA 16 Bible Online

LOPNA 16 - Masana bible

LOPNA 16

¹Nam co hay Derbe hiɗi Listra. Sa ma hatayna kep ay ɗawni, ma semda valam ala Timotewus, goora vi cata Yudiyata ta viyta, bulum mi sa ma grekŋa may.

²Nam mi sa ma ɓosiyom sa hay Listra hiɗi Ikoniyum li di-goyta ta ŋaata kalamu.

³Paulus min vum kuɗum hay rogoyta, nam vumu kaam gosaya, kay Yudiyana sa ay hay liy namna ɗawni, kay sumuna kaf wi kaw ala bulumu mi sa ma Grekŋa.

⁴Hay li ma nisi ka jik hay hoyok-ziyna, nisi ka disi kay law ma colay kay sa Apostolayna hiɗi sa maariyana hay Yerusalem, a sumuna ma hum kuɗumu.

⁵Sa tapna fi donota hay vida, ŋaɓta visiya ɦur voka'a hay buurta buurta kaf.

⁶Ŋusta-Peldetta telsi kay nisi kus yoboyna ma kus yoboyna hay Asiyaɗi, nala nisi raw voksi hay Frigiya hiɗi nagata vi Galatiya.

⁷Hay li ma nisi co goboy hiɗi Misiya, nisi li ki kal hay Bitiniya nala, may Ŋusta vi Yesu may hinsi a li kayni noŋɗi.

⁸Nisi jik vun Misiya kal hay Trowas.

⁹Hay henjeta van vul tuwam kir Paulus: Sa ma Makedoniyan kep colay zaw, siɗawamu hay dita ala: Jikaŋay hay Makedoniya, naŋay gutaŋ kuɗma'a.

¹⁰Bugol van vul tuwam kir Paulus vulla, numa gar kay tuɗ hay Makedoniya gosoy wit', kirma goy haraŋ ala Lawna yuma ay kay kus labar ma firina haya.

¹¹Numa jik hay lumna kay tuɗ hay Trowas, numa dol ɗiger hay Somatrak, hay buurta ta ka'ta hay Neyapolis.

¹²Goy ɗawni pa, numa kali hay Filipi, kayni mi hoyok-ziyna ma jewna ma hay galla vi Makedoniya, hoyok-ziyna ma ka kuɗ gaŋeraŋa sa Romena. Numa lakay hay hoyok-ziyna namna ir buur neeɗa.

¹³Hay fatta vi sabatna, numa kali goy jiy vun-galana, gal deŋel niyna, liyn ma numa'a vara'a kaw ala liyn ma siɗawta ka haya. Numa lak gaa'a, numa kus yoboyna hiɗi boy sa dakayna.

¹⁴Cat tara ay kep ta ya' ala Lidiya, hay hoyok-ziyna vi Tiyatira, ta ka gus sligar-purpel goyta, na' li nar kuɗ Lawna. na' huma, nala Bum-Sumuna mala' dika'a, kay na' ma tun varta va' kay slen ma Paulus dumna.

¹⁵Hay li ma na' fi baptisma hiɗi ziyna va' fina, na' siɗawma'a duma ala: La nigi wi kaw ala nan ti cata ta viy kuɗ Bum-Sumuna, nigiyay vo hay ziyna vanu, lakgi haya kaw. Na' nilamma ŋolo.

¹⁶Hay buur mara'a numa kali hay liyn ma siɗawta, cata ta sunda kep ta diniyan ka'ta ŋafma'a, na' ta hiɗi ful ma na' dumna, ka fi slen ŋolo mi sa muliya'na.

¹⁷Hay li ma numa hiɗi Paulus ka tuɗa, na' tuɗay bugolma'a, siwel ala: Sumun yawni si sunda vi Lawn ma Kulo-Jamna, nisi kusa' tigi kayni ti hagata vi su'da.

¹⁸Na' siwel kisi ki kayn nala ir buur taray ca, Paulus suwi kay lawta kayni, muɗ iram bugolomu, di tam fulla ala: Nan di taŋu, hay semda vi Yesu Kristu, kay naŋ ma kali goy haya'a pa. Nam kali goy haya' pa hay leer namna de'.

¹⁹Hay liyn ma muliya'na wi ala nisi may fi va loɗi, nisi yaw Paulus hiɗi Silas, tansi hay liy ma sumun mol hayna, ta-ta kulo vok sa kitana dab'.

²⁰Hay li ma nisi marsiyawa vok sa kitana, nisi di ala: Sumun lakŋi ɦiwir hoyok-ziyna vuma kulo'o.

²¹Nisi kayni si sa Yudiyana, nisi hat data vi sumaysi tuma'a, numa sa Romena sa hagata vuli tuma kay va' noŋɗi, li kuɗa' noŋɗi kaw.

²²Vokŋa ma tokay tan kaw fok kulo kisiya, hay li ma sa kitana haw sligara visi goyo, vul hagata kay watsi hiɗi libetna kaw.

²³Bugol watsi ŋol watna, nisi cuksi daŋgaya, di tam sa ma ŋom daŋgayna kay nam ma ŋomsi ŋaa'a.

²⁴Sa ma ŋom daŋgayna ma gatta vuli talamna cuksi hay ziy daŋgay ta kalafta, nam junsi gaysi jar gun kit-kit'.

²⁵Hay henjeta ŋolda Paulus hiɗi Silas siɗawa, gi nul ma suburta tam Lawna, sa daŋgayna humsi delsiya kaw.

²⁶Wulini wulini nagat jiriya ta-ta sem ziy ta daŋgayna geɗa, hay liy namna de, vun-ziy ma daŋgayna kaf mali goyo, jaɓna vi sa daŋgayna kaf wiled goyo kaw.

²⁷Sa ma ŋom daŋgayna zliy kulo'o, may hay li ma nam wi vun-galana vi ziyda daŋgayta kaf goy maliya, nam pat kew-gaferaŋa valamu, nam min ci tuwamu, kay nam var ala sa daŋgayna piriya.

²⁸May Paulus siwel hiɗi delem kulo'o di'e: Ɓulak tuwaŋɗi, numa ka tan kaf.

²⁹Hay li ma nam job haraŋa jobo, nam kal kalaf jaŋi, tuwam vum bat-bat', nam gi tuwam gaa vok Paulus hiɗi Silas.

³⁰Nam marsi goy jiya, disi ala: Sum sa ŋulona, nan ma lum mi mige kay suɗ goyo?

³¹Nisi hot dita ala: Vaŋ hay Bum-Sumuna Yesu, naŋ ma suɗ goyo, naŋ hiɗi ziyna vaŋu.

³²Nisi kus yoboyna vi Bum-Sumuna talamu, tam sa hay ziyna valam kaf kaw.

³³Nam yawsi kuɗumu, hay leer nam ma henjet na kay', muzsi vun milla goyo, nam hiɗi sa falamna kaf fi baptisma kaw.

³⁴Nam marsi hay ziyna valamu, kot tin kisiya, li firita hiɗi sa falamna kay vida visi ma hay Lawna.

³⁵Hay liy ma liyna foowa goyo, sa ka kitana cuk sumuna tam sa ma ŋom daŋgayna kay dum ala: Cuk sumun lakŋi.

³⁶Sa ma ŋom daŋgayna tuɗ yoboyn kayni tam Paulus, ka dum ala: Sa ka kitana jok sunay kay cukgiya, wulin kayni cukgi goyo, tuɗgi hay sle'ta.

³⁷May Paulus di tam sa cuki ay sunna ala: Nisi watma goy kir sumun haraŋ, kitata kaw bay ka kuma'a, numa sa Romena kaw, nisi cukmaawa daŋgaya, may wulini nisi cukma goy jiya hay ŋayayta kayni ir litige? As li naɗi, nisi kay tuwsi ma co'o kay cukma goyo.

³⁸Sa sunda hot yoboyna kayni mi sa ka kitana, hay li ma nisi hum ala sumun kayni si sa Romena, nisi muɗ nar ŋolo.

³⁹Nisi ma'a sleɗsi diksiya, cuksi goyo, bugolda nisi siɗawsi kay nisi ma kal goy hay hoyok-ziyna pa.

⁴⁰Hay li ma nisi kali goy hay daŋgayna kalla, nisi cuk vo vi Lidiya, hay liyn ma nisi ɗuw ɓosiyosina ɗuw, teŋsi irsi teŋ kawna, nisi kala.