Read Masana LOPNA 17 Bible Online

LOPNA 17 - Masana bible

LOPNA 17

¹Nisi raw hay Amfipolis hiɗi Apoloniya, co hay Tesalonika, hay liyn ma sinagogayna* vi Yudiyana kep ay haya.

²Paulus kali kalafi ki nam ka li dok-dok nala, nam ka kasla hiɗi nisiya hay ɗota ir sabatn ɦidi.

³Nam ɗeksi goy haraŋi, hatsi kaw ala Kristu ma fi lasta, ma day kulo'o kaw jar sa mitin pa. Nala nam ka di ala: Yesu ma nan digi kalamna, nam kayni mi Kristu.

⁴Sara kep kep jarsiya varta visi mun kay kayni, nisi tap kuɗ Paulus hiɗi Silas hiɗi vok ma ŋolla vi sa Grekŋa sa li nar kuɗ Lawna, hiɗi boyna sa jar sa ŋulona ir kiɗayɗi kaw.

⁵May sa Yudiyana li hunaya, yaw sum sa waa piɗiwir jar sumuna kuɗsiya, tun caw tok sumun ŋolo. ɦiwir hoyok-ziyna kulo'o kaw. Nisi cuk hay ziyna vi Yason kay gar Paulus hiɗi Silas, kay marsi goy vok sumuna.

⁶Nisi may fisiɗi, nala nisi sab Yason hiɗi sum sara'a goy vok sa ka kitata hiɗi siwelda ala: Sum nisin yawni ɦiwir nagatawa kulo pet, nisi ma tani, may Yason visi vo valamu.

⁷Nisi kaf may li kuɗ gatta vi Cesarɗi, lo nisi di ala mul mara ka'a, mi Yesu.

⁸Dit kayni ɦiwir yam sumuna hiɗi sa ka kitana kaw,

⁹Nisi hin Yason hiɗi segen kayni, hay li ma nisi vulsi wurakŋa tuwa.

¹⁰Hay henjeta, ɓosiyosina li koloy kay tun caw Paulus hiɗi Silas hay Bere. hay li ma nisi co ɗawni, nisi cuk hay sinagogayna* vi sa Yudiyana.

¹¹Nisi kayni diksi ŋali suw sa hay Tesalonika; nisi vi yoboyna hiɗi diksi har', hay buurta kaf, nisi ka fek caw ɗota, kay ɗuw caw slena ma sumuna disitna, ala kayni hay liyam gasi kla.

¹²Sumuna ŋolo jarsiya vi'e, boy sa Grekŋa sa ŋulona hiɗi sumuna kaw ir ŋolo neeɗa.

¹³May hay li ma sa Yudiyana sa hay Tesalonika wi ala Paulus ka kus yoboyna vi Lawna hay Bere, nisi co haya, ɦiwir sumuna kulo'o kaw.

¹⁴Ɓosiyosin tunum goy gal niy-lum hena ir gosoy wit'; may Silas hiɗi Timotewus hinis misi may.

¹⁵Nisi sa tun caw Paulusna tuɗum ta-ta hay Aten. Bugolda nisi hotiya, hay li ma nisi fi sunda vi Silas hiɗi Timotewus kay nisi ma slisi sesis gosoyo.

¹⁶May hay li ma Paulus ka cubsi hay Aten, nam wi Ŋusta valam muɗ ɦiy hayam kalafi, hay li ma nam ka ɗuw lawayn ma waana hobay hay hoyok-ziyn kayni.

¹⁷Nam kus yoboyna vi Lawna hay sinagogayna hiɗi Yudiyana, hiɗi sa li nar kuɗ Lawna kaw, hay buurta kaf, hay li ma sumuna ka lak dok-dok haya, nam kus yoboyna tam sa nam ŋafsina kaw.

¹⁸Sum sara sa hat wida jar sa Epikuriyena hiɗi sa Stoyisena tun caw ci way hiɗi namu. sum segena ka di ala: sa ma fow lawt zawn ɓakam kayn mige? Segena lo, hay li ma nisi humum kus labara ma firina vi Yesu hiɗi dayta-kulota, nisi di ala: Nam kayn mi sa ma kus kay lawayn ma hay naga ma pulla.[35]

¹⁹Nala nisi vumu, tuɗum hay Areyapagus,[36] nisi ka di ala: numa as wi hatta ta wulita ta naŋ ka da' goyt kayn su?

²⁰Kay slena ma naŋ dum hay humda vuma kayni mi slena ma numa wum cawamɗi. May wulini numa min hum caw slen kayni goyo.

²¹Kay sum sa hay Aten kafe hiɗi sum sa pulla sa co jarsi kaw, nisi ba liyna visi kayni kay di labara lebo humum mi slena ma wulina.

²²Paulus, col kulo way Areyapagus di ala: Nigi sum sa Atenna, nan wi ala nigi viy dono ŋolo hay slen pet.

²³Kay hay li ma nan poy hay hoyok-ziyna vigiya, nan ɗuw slena ma girifta vigiya kaw, nan fi giwin-ma-ɗifinna kep ma ɗota ɗoy kalam ki kayn nala: Tam lawayn ma sa wumɗi! Va ma nigi girifimu may nigi wumɗi, kayni mi va ma nan ka dum tigiya.

²⁴Lawna ma li nagata hiɗi slen ma hayam kafna, nam mi Bum-Sumuna vi Wuralawna hiɗi nagata kaw, nam may mus hay Tempella ma koti hiɗi ɓam sumunɗi;

²⁵ɓamta vi sa-wurana as sunumɗi kaw, ki nam var a gar va mara'a nala, nam vul mi gige kaf irita hiɗi sukŋa hiɗi slen kaf kaw.

²⁶Goy hay san kepe, nam li jafna vi sumuna kaf sa lakay kay nagata pet; nam ka ir liyna kisiya, nam tun jara vi liy musta visiya kaw;

²⁷a nisi ma gar Lawna, nisi ma so tuwsiya, wak tuwsiya kay garamu, la nisi as fumu. Nir na'ta kep, nam may goy gine hiɗi sa kep jaray noŋɗi;

²⁸kay hay namu nay ka iriya, nay ka geɗa, nay ka'a kaw. kayni mi va ma sara kep kep jar sa ɗo nulla vigiya di kalam ala: Nay kaw si sa hay jafna valamna.

²⁹Nala, ki nay ka hay jafna vi Lawna nala, nay as vi hay lawayna ma ceɗay kuɗ varta vi sumuna ma sli ora, doorota, hiɗi hiɗiyna loɗi.

³⁰Lawna, raw kay liyna vi bay-wida, ka vul hagata mi sumuna sa hay liyn kaf, kay nisi ma hama.

³¹Kay nam col buur kep, ma nam ma ka kitat vi sa nagatna kuɗ ɗigerta va'a, hay sana ma nam vilekem goyna, lo, nam vul tam kafe va ma nam di goy kalamna hay li ma nam dayam kulo'o jar sa mitina pa.

³²Hay li ma nisi hum kay dayta-kulota vi sa mitina, sum sa hena cen kuɗumu, segena di ala: Numa ma humaŋ lo kay slen kayni hay buur mara'a.

³³Nala Paulus kali goy jarsi pa.

³⁴hiɗi kayn kaf, sum sara kep kep tapay kuɗumu, vi'e kaw; jarsiya Denis ma Areyapagusna, cata kep ta ya' ala Damaris, hiɗi segena kaw.