Read Masana LOPNA 19 Bible Online

LOPNA 19 - Masana bible

LOPNA 19

¹Hay li ma Apolos ay hay Korinte kayni, Paulus, bugol nam jik ay hay hoyok-ziyna ma ŋulona vi nagata jikŋa, nam ma hay Efesus. nam ŋaf hiɗi sa hatayna sara'a sa nam ka disi ala:

²Hay li ma nigi vi'e nigi fi Ŋusta-Peldetta su? Nisi hotom dita: Numa may humi ala Ŋusta-peldetta ka'a noŋɗi.

³Nam di ala: Nigi fum kayni mi baptisma marige? Nisi hotom dit ala: Mi baptisma vi Yohana.

⁴Nala Paulus ka disi ala: Yohana li baptisma hiɗi baptisma vi hamda; nam di tam sumuna kay nisi vi hay nam ma ka co bugolomu. Kayn min di'e vi hay Yesu.

⁵Hay li ma nisi hum dit kayni, nisi fi baptisma hay semda vi Bum-Sumuna Yesu.

⁶Paulus bar ɓalam kisiya, Ŋusta-Peldetta ma kisiya; nisi tun caw law hiɗi vun mara'a mara'a, di vun jobta-Lawna kaw.

⁷Nisi kaf ay ir sumun doogo yam ma' nala.

⁸Paulus kal hay sinagogayna*, liyna ma nam law goy butiya, nam kus yoboyna hiɗi nisiya ir til ɦidi. Nam visi diksiya kay lawta vi mulda-Lawna.

⁹May ki segena kep kep hini jarsi hiɗi diksi so'otiya, bay vi'e kaw, nisi burah hagata vi Bum-Sumuna vok sumuna. Nam vi tuwam goy tisiya, yaw sa hatayna goy visiya, buurta kaf nam ka kus yoboyna hiɗi nisiya hay lekolla vi Tiranus.

¹⁰Nam li kayni ir busat ma', ta-ta sum sa hay Asiya kaf, sa Yudiyana hiɗi sa Grekŋa hum yoboyna vi Bum-Sumuna.

¹¹Ɗekka ma li san ɦuyum' ŋolo Lawna lum hiɗi ɓam Paulus,

¹²ta-ta nisi jo lebbella lebo sligara tam sa moyna, hay li ma nam tunawa tisiya, hay na'ta kayni moyna hinsi de', ŋusiyan ma joon kaw kali goy haysi pa.

¹³Sum sara sa Yudiyana sa diniyan kisina sa poy hay hagata, tun caw yi sem Bum-Sumuna Yesu, kay digiɗ ŋusiyan ma joona goyo hay dita ala: Nan daŋ hay sem Yesu ma Paulus ka kusumna!

¹⁴Nisi sa li slen kayni ay siɗiya, nisi si gurona vi Skefas, kep jar muliyan ŋulo sa-ɗifinna.

¹⁵Ful ma joona hotsi dit ala: Nan wi Yesu, Paulus nan wum kaw, may nigiya, nigin si sarige?

¹⁶Sa ma ful ma joon ay kalamna fok kisi jaŋi, nam yawsi kafe, ta-ta nisi pir goy hay ziyn pa nala'a, tuwsi kaay goy mili kaw.

¹⁷Van kayni sumuna wum kaf, sa Yudiyana hiɗi sa Grekŋa kaw sa lakay hay Efesus, narta nig kisi kafe. May semda vi Bum-Sumuna Yesu fi suburta kaw.

¹⁸Sumuna ŋolo jar sa viyna ma kay ham goy hiɗi vunsiya, di goyo kaw kay slena ma nisi lumna.

¹⁹Sumun ŋolo jar sa li guna kaw mar ɗerwella visiya, ŋalam goy vok sumun kaf, nisi ŋaɓ gusta valamu, gusta valam co gurjuta doorota birim dok-vasl.

²⁰Nala kuɗ donota vi Bum-sumuna, yoboyna vi Lawna meray goyo hiɗi donota ŋolo.

²¹Bugol slen kayni li lina, Paulus col varta kay tuɗ hay Yerusalem, hay li ma nam raw hay Makedoniya hiɗi Akaya. nam di ala: Hay li ma nan coowa ɗawni, nan ma tuɗ ɗuw Rom kaw.

²²Jar sa sunda valamu nam cuk sumun ma' hay Makedoniya: Kayni Timotewus hiɗi Erastus, nam kay tuwamu musi hay Asiya ir liyn neeɗa.

²³Hay liy namna kayni ɦiwirta fok kulo ŋol kay hagata vi Bum-Sumuna.

²⁴Sa ma yor ora kep ma semda valam Demetriyus, nam kot Tempella vi Diyata hiɗi doorota, ma vul farayn ŋolo mi sa kotomna.

²⁵Nam toksiya, nisi sa lopna visi ki falamna naana, nam disi ala: Nigi kaf wi ala nay lakay ŋaa kayni kuɗ lopna kayni;

²⁶Nigi waawa, humgiyawa kaw, ala hay Efesus kepɗi, may hay Asiya kaf, Paulus namna kilani viy sumunawa goy ŋolo hiɗi lawta, lo nam muɗ ir sumunawa hay dita ta ala lawayna ma kotay hiɗi ɓam sumuna nam kayni may mi lawayɗi.

²⁷Namu ma ɓulak lopna vaya ɦawaɗi, may Tempella vi cata-lawta Diyata ta ŋolda, sumun ma muɗ ɗuwa' ki va ma waa'a nala, may suw pet ŋolda va' ta sumuna sa hay Asiya hiɗi nagata kaf girifa'na kayn ma vat goy waa'a kaw.

²⁸Hay li ma nisi hum yoboyn kayni, nisi hob hiɗi ɦiyda, nisi tun caw siwel ala: Diyata vi Efesena kayni ti ta ŋolda!

²⁹Hoyok-ziyn kaf fok kulo hay ɦiwirta, nisi yaw jaŋ kuɗ tuwsi kep, kal hay ziy ma liwna, Gayus hiɗi Aristarkus, sum sa Makedoniya, sa may rogoy hiɗi Paulus pana, nisi yawsi kuɗsi dono'o kaw.

³⁰Paulus min kay col goy haraŋ vok sumuna, may sa hatayna hinim a li naɗi;

³¹sum sara kep kep jar sa Asiyarkena,[37] sa ay boniyomna kaw, gi sun talamu, kay nam ma tuɗ hay liyn ma liwnaɗi.

³²Segena siwel ir valamu, segena lo siwel ir valamu, kay ɦiwirta ay jar sumuna, lo ŋolda vi sumuna may wi va ma nisi dakay kalamna noŋɗi.

³³Nala nisi mar Aleksander goy jar sumuna, nam ma sa Yudiyana zutumiya colom voksiya, Aleksander ci ɓalamu kay nam min di lawta valam vok sumuna.

³⁴May hay li ma nisi hum ala namu mi Yudiyana, nisi kaf siwel hiɗi delsi kulo ŋolo, goboy ir leer ma' ala Diyata vi Efesena kayni ti ta ŋolda!

³⁵Hay liy namna kayni sa ma ɗo slena hot varta vi sumun gaa'a, nam di ala: Nigi sa Efesena, hoyok-ziyna vi Efesus kayni mi ŋomda vi Tempella vi Diyata ta Ŋolda, hiɗi sle ma sli tuwa' nala ma nigay gaa dukalawn pa kaw, sa ma may wi naɗi mi gige?

³⁶Kay van kayni sa as puw vunam kalamɗi. Nigi lakgi ŋal kiliŋ' ligi va hay bay-varta hiɗi witi-witita loɗi.

³⁷Nigi mar sumun lakŋawa, nisi may li ɗifin ma liwisɗi, nisi may ŋul cata-lawta vayɗi kaw.

³⁸Demetriyus hiɗi sa wi yal lopna sa kuɗumna la lawta visi ka kay sa'a, buur ma ka kitana ka'a, buur ma lak vok guverner ka'a kaw; nisi as yi kisiya may!

³⁹La nigi gar law mara hiɗi nisiya, kayni ma ŋra ɗawn hay tokŋa kuɗ hagata va'a.

⁴⁰Kuɗ va ma li vaydina, sumuna ma di kay ala nay kayni si sa mar ɦiwirta kulona, kay molla vay tan sa as ɗekem cawam goy ala nay dakay tan nalaɗi. Hay li ma nam di dita kayni dina, nam mer faatana kulo'o.