Read Masana LOPNA 23 Bible Online

LOPNA 23 - Masana bible

LOPNA 23

¹Paulus cuk iram ŋiresl kay sa ɗiger-lawta*, nam disi ala: Ɓosiyonna, nan poy vok Lawna hiɗi sle'ta hay dikanu ta-ta hay fatta vaydita.

²mul ŋol ma-ɗifinna Ananiyas vul hagata mi sa ay goboy hiɗi namna kay nisi ma ci Paulus hay vunamu.

³May Paulus dum ala: Lawna ma wataŋu, naŋ gulmun ma koray haɓna! Naŋ musawa kay ka kitat kanu kuɗ gatta, naŋ hin gatta goyo, vul hagata kay watanu!

⁴Nisi sa ay lakay ɗawni di'e: Naŋ ŋul mul ŋol ma-ɗifinna vi Lawna su?

⁵Paulus di'e: Ɓosiyonna, nan may wi ala zawni mi mul ŋol ma-ɗifinnaɗi, kay ɗot di ala naŋ ma di va ma joo'o sa ma ŋolla vi sumuna vaŋɗi.[39]

⁶Hay li ma Paulus wi ala gal tokŋa kayni si sa Sadusena,* gal hena kayni si sa Farisena* may ni, nam siwel goyo jar sa ɗiger-lawta ala: Ɓosiyonna, nan mi sa ma Farisena,* goora vi sa ma Farisena*, nan ka vok sumun tan kayni kuɗ cubta-sle'ta hiɗi dayta-kulota vi sa mitina.

⁷Hay li ma nam di kayni goy dina, ci-wayta fok kulo jar sa Sadusena* hiɗi sa Farisena, vokŋa kaw ɓuraw gaa'a.

⁸Kay sa Sadusena di ala dayta-kulota tayɗi, sa sunda sayɗi, ŋus mayɗi kaw, may sa Farisena vi ala nam cani ka'a.

⁹Lawta suwa kulo ŋolo, sa wi-ɗota kep kep jar sa Farisena* yaw kulo'o, tun caw ci wayt hiɗi ŋiraysi vat' di kaw ala: Nay may fi va ma joo ne' kaw hay san zawnɗi, la mi ŋusu lebo sunda-wuralawn kla laway hiɗi nam klasige!

¹⁰Ci-wayta ɦur kayn kulo voka' ŋol suwa. Komandaŋ li nari kay nisi ma jet Paulus goy klasige. Nam vul hagata mi vokŋa vi sojena kay jik gaa'a kay vum Paulus ay goy jarsi pa, maramay hay ziyda ta gulmun ta'ta.

¹¹Hay henjeta ta ka'ta, Bum-Sumuna ma goboy tam Paulus dum ala: Soŋ tuwaŋu, kay ki naŋ li di-goyta kanu hay Yerusalem nala, naŋ ma li di-goyta hay Rom kaw.

¹²Hay li ma liyn foowa goyo, sa Yudiyana ŋra lawta kalamu, yi va kisi kaw ala nisi min tiɗi, ciɗi kaw, la nisi bay ci Paulus goy jew kayni.

¹³Nisi sa ŋra vunsi nalana nisi suw dok-fiɗi;

¹⁴Nisi kali tam muliyan ŋulo sa-ɗifinna hiɗi sa maariyana kay disi ala: Numa yi vaawa kuma'a, la numa bay ci Paulus goyo, numa as tun fu vunmaɗi.

¹⁵Wulin kayni nigi ŋra lawta vigi hiɗi sa ɗiger-lawta*, nigi ma di lawta tam komandaŋŋa kay nam ma maram vokgiya. ki nigi min ɗuwa' kayn ti lawta valam nala, may numa ma baramu, cum goyo jew a nam co goboyo.

¹⁶Goora vi ɓasum Paulusta hum kay baarta visiya, nam kal hay ziyda ta gulmun ta'ta, kal kalafi kay di Paulus kay lawta kayni.

¹⁷Paulus yi sa kep jar sa ŋulo sa sojena kisi kis kisna, nam dum ala; Gaŋ caw goor zawni tam komandaŋŋa, kay nam min dum kay law mara'a.

¹⁸Ma ŋol ma sojen kalam kisna vum kuɗumu, tuɗum tam komandaŋŋa dum ala: Paulus ma daŋgayna yanu, jobanu kay nan ma tun caw goor ma joriyona zawni ay taŋu, kay nam ka hiɗi va'a kay daŋga.

¹⁹Komandaŋŋa vum ɓalamu, nisi kal goy visiya. Komandaŋŋa jobom ala va ma naŋ min dantina mi mige?

²⁰Nam hot dita: Sa Yudiyana kaf vunsi juni kep kay ma jobaŋu a naŋ ma hinsi Paulus tuɗis vok sa ɗiger-lawta, ki nisi min ɗuw caw lawta ta kalamta goy ŋaa'a nala.

²¹May naŋ ma humsiɗi, kay sumun suw dok-fiɗi yi va kisi ala: La nisi bay ci Paulus goyo, nisi tiɗi, ciɗi kaw; nisi kot tuwsiyawa vatiya, ka baramu kaw, may hini zama' kayn ti varta vaŋu.

²²Komandaŋ hin goor ma joriyona tuɗa, hay li ma nam gatam vunam ala lawta ta nam dumtita kayni nam da' goy mi saɗi.

²³Bugolda nam yi sa ŋulo sa sojen kisi kis kisna ma' talamu disi ala: Digi tam sojena kis-ma' kay kot tuwsiya, sa jaŋ kulumayna dok-siɗiya, sa ɓe ɓarawta kis-ma' kaw kay tuɗ ta-ta hay Sesariya hay leer ma ɦidina vi henjeta.

²⁴Nam disi lo kay nisi ma gan kulumayna vi Paulus, a nisi tuɗum tam guverner Feliks bay va geɗ talamu.

²⁵Nam ɗo letreta ki kayn nala:

²⁶Klawdiyus Lisiyas gi deɓ mi guverner ŋolla Feliks!

²⁷San kayni sa Yudiyana vumu, nisi goboy a cum goyo, hay li ma nan co kisiya hiɗi sojena, nan butum goy hay ɓisiya, hay li ma nan hum ala nam ayn mi sa ma Romena.

²⁸Nan gar a wi caw va ma nisi pi lawt kalamu, ta-ta tuɗum vok sa ɗiger-lawta* kaw kalamna.

²⁹Nan fi ala la nisi pi lawta kalamu, kayni kuɗ ci-wayta kay gatta visiya, may law ma nisi pum kalamna, ma as naram tam mitta lebo naram daŋgaya mayɗi.

³⁰May hay li ma nan hum ala sa Yudiyana ŋra vunsi kalam kay baram hay hagata, nan gumis taŋ gosoyo, sa pi lawt kalamna kaw nan di tisi ala nisi ma di lawta visi ta kalamta goy vokaŋu. Lakay ŋaa'a!

³¹Sojena, kuɗ va ma diys tisiya, nisi vi Paulus, tuɗum hay henje na'ta ta-ta hay Antipatris.

³²Hay grawta, nisi hin sa ɓey kay kulumayna tuɗ hiɗi namu, may segena hotay hay ziyda ta gulmun ta'ta.

³³Hay li ma nisi co hay Sesariya, nisi vul letreta mi guvernera, nisi mar Paulus vokomu kaw.

³⁴Hay li ma guverner jaŋ letret goyo, nam job ala Paulus ay hay naga tarige. Hay li ma nam hum ala Paulus mi sa ma hay Kilikiya, nam di'e:

³⁵Nan ma humaŋ goy haraŋ ɗawni, hay li ma sa pi lawt kaŋŋa maawana. Nam vulsi hagata kay nisi ma ŋomom kalaf hay Pretoriyumna* vi Herod.