Read Masana LOPNA 24 Bible Online

LOPNA 24 - Masana bible

LOPNA 24

¹Buur vasl bugolda, Ananiyas mul ŋol ma-ɗifinna hiɗi sa maariyan sara kep kep, hiɗi Tertulus sa ma di slen goy haraŋa kaw, nisi co'o. Nisi yi kay Paulus vok guverner Feliks.

²Nisi yumay goy jiya, Tertulus tun caw pi lawt kalam hay dita ala:

³Guverner, sle'ta ta ŋolda numa fa' kayn kuɗaŋ naŋu, sle ma hay nagat tani kot goy ŋaa kayn kuɗ wida vaŋ ta vokka, Feliks ma ŋolla, slen kayni numa vum kaf, hay liyna vuma kaf kaw hiɗi gi-deɓta ta ŋolda.

⁴May, nan may makaŋ yaŋ ŋolɗi, nan siɗawaŋu kay naŋ humma hiɗi ŋalda vaŋu ir liyn neeɗa.

⁵Numa fi san zawni, ki bakmarana ma mar cirepta jar sa Yudiyana sa kay nagatna kaf nala, nam mi ma ŋolla vi vida vi sa Nazareena,

⁶nam gar a muɗ Tempella goy liwisi kaw, numa vumu, numa gar kay ka kitat kalamu kuɗ gatta vuma'a,

⁷May komandaŋ Lisiyas co'o, nam hulotom goy ɓuma hiɗi dono'o,

⁸nam di tam sa pi lawt kalamna kay ma kulo vokaŋu. Naŋ kay tuwaŋ kaw as jobomu, naŋ ma wi va ma li a numa pi lawt kalamna.

⁹Sa Yudiyana vunsi vi law na'ta, nisi di goy kaw ala lawt kayn hay liya'a.

¹⁰Hay li ma guverner ɗek Paulus kay nam di'e: Nam sli dita di'e: Nan wi'e naŋ mi sa ma ka kitana vi sa nagat tani ir busat ŋolo, nan as di sem lawta van goy vokaŋ bay giriŋi.

¹¹Buura may coy doogo yam ma'ɗi -- naŋ as hum kayni goy haraŋi -- nan kali kulo Yerusalem kay li girifta.

¹²Nisi may fan ci wayt hiɗi sa'a lebo fan li va ma ɦilay sumun kulo hay Tempellaɗi, hay sinagogaynaɗi, hay hoyok-ziynɗi kaw.

¹³Va ma nisi pi lawt kan kalam vaydina kaw, nisi as dum cawam goy gasiɗi.

¹⁴Nan di goy haraŋ vokaŋ ala: Nan ka sun Lawna vi sumiyanu, kuɗ hagata ta nisi ya' ala sekta;[40] nan viy kuɗ slen ma ɗoy hay gatta kafe, viy kuɗ sa jobta nala kaw,

¹⁵nan ka cub kuɗ sle'ta ɓam Lawna -- nisi kaf kaw ka cub kayn ki kayn nala -- kay dayta-kulota vi sa ɗigera hiɗi sa bay-ɗigera ma co'o.

¹⁶Kuɗ na'ta nan li dono'o kay poy hay tap-wida ta ŋaata vok Lawna, vok sumuna kaw.

¹⁷Bugol busata kali ŋol kali, nan ma'a kay li vulda tam sa hay jafna vanu, kay mar vulda kaw tam Lawna.

¹⁸Nisi fan hay Tempella hay li ma nan li poora lina, nisi may fi sumun zatay kuɗanɗi, fan fok ɦilayta kulotaɗi kaw.

¹⁹May sa Yudiyan sara kep kep hay Asiya. co vokaŋu kay pi lawt kan kayn si nisiya, la lawta visi ka kanu.

²⁰Lebo hinsi di goyo kay zlata-joota ta nisi fa' kanta, hay li ma nan col vok sa ɗiger-lawta*.

²¹La kayni kuɗ dita ta nan col kulo jarsiya siwela' ala: kuɗ dayta-kulota vi sa mitina, nan ka vun kitata vaydi vok irgiya!

²²Feliks ma wi slena kay hagata kayni goy haraŋi, nam gi lawt voko, disi kaw ala: Hay li ma Komandaŋ Lisiyas maawa, nan ma fek caw lawta vigiya.

²³Bugolda nam vul hagata mi ma ŋol ma sojen kalam kisna kay ŋom Paulus, may hinim goy ir buti neeɗa, sa falamna sa min co ɗuwumna telsiɗi kaw.

²⁴Li buur ca kayni, Feliks co hiɗi cata valam Dursila ta Yudiyata, na' gi suniya kay mar Paulus. Nam humum kay vida hay Kristu Yesu.

²⁵May hay li ma Paulus ka ɓak kay ɗigerta, kay tel-tuwna, kay kitata ta min ma'a kaw, narta vi Feliks, nam di Paulus ala: Wulin kayni tuɗaŋ maŋu, hay li ma nan fi liynawa, nan ma yaŋ mara'a.

²⁶Nam var kay Paulus ma vulum gurju'u, kuɗ na'ta kayni, nam gi sun ay kalam lo kalam lo, kay kus yoboyn hiɗi namu.

²⁷Busat ma' vat goy ki kayn nala, Porsiyus Festus vurna baŋal Feliks. Kay Feliks min vi dik sa Yudiyana ni, nam hin Paulus juni hay daŋgayn waŋi.