Read Masana LOPNA 28 Bible Online

LOPNA 28 - Masana bible

LOPNA 28

¹Hay li ma numa suɗawa goyo, nisi duma ala jokota ya' ala Maltus.

²Sum sa barbara* li slugot tuma kiɗayɗi, nisi ŋal kuta, lakma vuna'a kaf, kay niyn ka si ŋolo. Liyn sleɗay ŋolo kaw.

³Paulus yaw cekcelemna kay cukum kay kuta, may guy-makayda cukay goyo kay gar liyn ma kuɗusina, na' slew hay ɓam Paulus.

⁴Wulini hay li ma sum sa barbara wi guyna slewi hay ɓam Paulus, nisi di jar-tuwsiya: San kayni fum mi sa ma ci mati, kay nam suɗay goy vun niyna, may bum-ɗigerta min ala nam mus iriya loɗi.

⁵May Paulus ɦiwel guyt goyo hay kuta, va ma joo may lum noŋ ne'ɗi.

⁶Sumun kayni cub ala tuwam ma bala, lebo nam ma nig gaa'a wulini wulini de', mita klasige. May hay li ma nisi cub ta-ta cubna, nisi wi kayni va ma joo'o may co talamɗi. Nisi muɗ varta visiya, nisi di ala san kayni mi Lawi.

⁷Ziyna vi mul-jokota ka goboy tam liy namna, mul-jokota yum ala Publiyus, nam vuma'a, li slugota tuma'a kaw ir buur ɦidi.

⁸Bum Publiyus ay moyo, tuwam gum kuwa kaw, suɗoyn ɦokom busuwu kaw. Paulus kal kalaf talamu, siɗaw kalamu, bar ɓalam kalamu, muɗum goy ŋaa'a kaw.

⁹Bugol slen kayni, sum sa moyn tisina sa ka kay jokota co tam Paulus, nam muɗsi goy ŋaa'a kaw.

¹⁰Nisi sluma yuma kulo ŋolo, hay li ma numa tun caw kala, nisi vulma sle ma as gutma'na ŋolo.

¹¹Hay li ma numa li til ɦidi kay jokota lina, numa ɓe hay lumna ma Aleksandriya, ma ci cayda kay joko na'ta, ma ɗota-ŋonayta ka kulo vokomna.

¹²Hay li ma numa co hay Sirakusa, numa lak ɗawni ir buur ɦidi.

¹³Ɗawni pa, numa ka jik deŋele deŋele, ta-ta numa co hay Regiyo, simeɗ ma gal kayamna fok biwa. Nala ir buur ma' numa co hay Puzol.

¹⁴Ɗawni numa fi ɓosiyoma' sara'a, nisi siɗawma'a kay numa lak hiɗi nisiya ir buur siɗiya, bugol kayni numa kali hay Rom.

¹⁵Ɓosiyay sa hay hoyok-ziy namna, hay li ma nisi hum labara vuma'a, nisi co ŋafma irma'a ta-ta hay lumuna vi Apiyus hiɗi Taverna ma ɦidina. hay li ma Paulus wisiya, nam gi deɓ mi Lawna, nam muɗ kursuli kaw.

¹⁶Hay li ma numa co hay Rom, mul ma sojen kalam kisna vul sa daŋgayna hay ɓam komandaŋŋa, may nisi vul hagat tam Paulus kay mus goy valamu, col sojen talam kep kay ŋomom may.

¹⁷Van li nala buur ɦidi bugolda, Paulus yi sa ŋulona vi sa Yudiyana talamu; hay li ma nisi tok talamu, nam ka disi ala: Ɓosiyonna, nan li va ma joo'o kat sumun kaynɗi, kat gatta vi sumiyayɗi kaw. Hay Yerusalem, nisi gan daŋgaya, nisi vulan goyo hay ɓam sa Romena.

¹⁸Hay li ma sum sa Romena joban jobna, nisi gar kay gan goyo, kay nisi fi va ma joo ma nagay kay can goy kuɗumɗi.

¹⁹May sa Yudiyana min hinɗi, kuɗ kayni nan fi li va maraɗi, nala nan raw kitata ay vok Cesar, may nan di va ma joo kay sum sa hay jafna vanɗi.

²⁰Kuɗ na'ta kayni, nan gar kay ŋaf hiɗi nigiya, kus yoboyn hiɗi nigiya kaw; kay nan ka ziy jaɓna kayni kuɗ cubta-sle'ta vi sa Israyella.

²¹Nisi hotom dita: Hay Yuda pa, numa fi ɗerwelda tara'a kaŋ noŋɗi, ɓasuy mara'a may di law mara'a ma joo kaŋ noŋɗi.

²²May numa min hum varta vaŋu hay vunaŋ naŋ kay tuwaŋu. Kay numa wi ala sekta[41] na'ta kayni ka ŋaf hiɗi ci-wayt ŋolo hay liyn kaf.

²³Nisi col buur tara'a kay ŋaf hiɗi namu, sumun ŋolo co fum hay liy ma nam musi hayna, hay hatta valamu, nam li di-goyta kay mulda vi Lawna, hiɗi vun-ma-gatna vi Musus, hiɗi sa jobta-Lawna kaw, nam gar a mun varta visiya kay Yesu. Nam law tisiya hay grawt culum pa, ta-ta hay vulatita.

²⁴Segena varta visi muni kay sle ma nam dumna, segena lak hay bay-vida may.

²⁵Hay li ma nisi tun caw mera hiɗi vunsi ɓuraway tak-tak, Paulus ka disi malam ɦawa ala: Slen ma Ŋusta-Peldetta dum tam sumaygiya kayni hay liyamu, hay li ma na' di'e hiɗi vun sa ma jobta-Lawna Esaya ala:

²⁶Tuɗaŋ tam sumun kayni disi ala: humgi ma hum ŋaa'a, May nigi ma humum cawamɗi, nigi ma ɗuw ŋaa'a, May irgi ma wiɗi:

²⁷Kay sumun kayni diksi muɗi liŋ-liŋi, humsi hum siyeŋ-siyeŋe, Nisi duk irsiyawa kaw, kay nisi ma wi hiɗi irsiɗi kaw, Hum hiɗi humsiɗi kaw, Wum cawamɗi kaw, may gar hamda kay nan ma muɗsi goy ŋaa'aɗi kaw.[42]

²⁸Nala nigi ma wi ala su'da vi Lawna na'ta vuli goyo tam sa waana, nisiya, nisi ma huma'a.

²⁹Hay li ma nam di kayni dina, sa Yudiyana kaliya, nisi ci way jar-tuwsi ŋolo.

³⁰Paulus mus busat ma' hay ziy ta nam wurak kaata, sum sa co talamu nam visi kaf.

³¹Nam kus yoboyna kay mulda-Lawna, nam vul hatta ŋolo kay Bum-Sumuna Yesu Kristu, nam di slen goyo hiɗi bay-narta, sa ma telem mayɗi.