Read Masana LOPNA 4 Bible Online

LOPNA 4 - Masana bible

LOPNA 4

¹Hay li ma nisi ka kus yoboyn tam sumuna, muliyan-sa-ɗifinna hiɗi mulla vi sa ŋom Tempella hiɗi sa Sadusena* ma'a,

²nisi muɗ ɦiy ŋolo kay hatta ma nisi ka hat sumuna kay Yesu, kay di-goyta ma nisi ka li'e kay dayta-kulota vi Yesu jar sa mitin pa kaw.

³Nisi yawsiya, cuksi daŋgaya ta-ta goy jifini, kay hay na'ta kayni liyn ay vulatiya.

⁴May hiɗi kayn kaf sumun ŋolo jar sa hum yoboyna vi'e, ŋaɓta vi sumuna co kulo goboy birim vasl.

⁵Hay buurta ka'ta, sa ŋulona visiya hiɗi sa maariyana hiɗi sa wi-ɗota tok tuwsi hay Yerusalem,

⁶hiɗi Anas mul ŋol ma-ɗifinna, Kayfas hiɗi Yohana, Aleksander hiɗi sa hay jafna vi mul ŋol ma-ɗifinna kafe.

⁷Nisi lak Peter hiɗi Yohana voksiya, ka jobsi ala: Nigi li slen namna kayni hiɗi donota mige lebo hiɗi sem gige?

⁸Peter hobay hiɗi Ŋusta-Peldetta, nam di tisi ala:

⁹Nigi sa ŋulona vi sumuna hiɗi sa maariyana vi Israyel, la vaydi numa fi jobta vok irgiya kay va ma ŋaana ma li ay tam sa ma moyna, kay va ma nam fi ŋaata hiɗi namna kaw,

¹⁰nigi kaf humgi goy ŋaa'a, nigi sumuna vi Israyel kaf kaw! San zawni muɗi goy ŋaa'a, coli vok irgi tani kaw kayni hay semda vi Yesu Kristu ma Nasaretna, ma nigi ɓalam kat gu-ma-grakŋa, ma Lawna dayam kulo'o jar sa mitin pana.

¹¹Nam mi Hiɗiyna ma, nigi sa in ziyna gum goyna, may nam muɗawa goy mi hiɗiyna ma ŋolla hay gef-ziyna.[12]

¹²Su'da ka hay sa maraɗi, kay gaa kuɗ dukalawn kayni, semda tara'a ta vuli jar sumuna ta nay fi su'da haya'a tayɗi.

¹³Hay li ma nisi wi kursulita vi Peter hiɗi Yohana, nisi muɗi ɦuyum', kay humsi ka gisi lo ala sumun lakŋi, nisi ka hay vokŋa vi sum sa bay-hatta. May nisi wi goy haraŋ ala sumuna lakŋi ay hiɗi Yesu.

¹⁴Lo hay li ma nisi wi san ma muɗi goy ŋaana colay tisi zaw, nisi fi va kay di loɗi.

¹⁵Nisi di tisi kay nisi ma cuk goy jiya tam sa diger-lawta pa; nisi ŋra vunsiya di'e: Sumun yawni nay ma lum tisin mige?

¹⁶Kay ɗekka ma nisi lumna ka goy haraŋ vok ir sumuna kaf sa ka hay Yerusalem, nay kaw ma puw vunay kay kaynɗi.

¹⁷May kay a lawta kayni jok goy jar sumun suwɗina, nay ma lawsi hiɗi dono'o kay nisi ma kus yoboyn kay sem san kayni mi sa mara loɗi.

¹⁸Bugolda hay li ma nisi yisi yina, nisi gatsiya kay nisi ma kus yoboyna hay sem Yesu loɗi, hat kay semda valamɗi kaw.

¹⁹May Peter hiɗi Yohana hotsi dit ala: Vargi kigi hawtige! Kay hum kuɗgi suw humda kuɗ Lawna kayni kir Lawna hay liyam su?

²⁰Vargi tige! Va ma numa wi'e, humi kaw, a kus kalamɗi kayni, as a liɗi.

²¹nisi lawsi ŋolo ŋolo, hinsi tuɗa kaw, kay nisi fi joot kisiya kay ka kitat kisiɗi, kay sumun pet ka subur Lawna kay va ma lina,

²²kay sana ma ɗekka li talamu, ma muɗi goy ŋaana kaw kayni busata valam as suw dok-fiɗi.

²³Hay li ma nisi cukay goy cana, nisi tuɗ tam sa fisina disi kay slen ma muliyan ŋulo sa-ɗifinna hiɗi sa maariyana dum tisina.

²⁴Hay li ma nisi hum kayni, nisi tap varta visi kep, siwel tam Lawna di'e: Bum-Sumuna, naŋ ma li wuralawna, li nagata, li niy-lum ma ŋulona hiɗi slen ma hayamna kaf kaw,

²⁵naŋ law hiɗi Ŋusta-Peldetta hay vun buma David sa ma sunda vaŋu ala: Jaf-sumuna ɦiwir kulo kayn kay mige? Sumun kaw varta visi kayn waa'a ɦawa nala su?

²⁶Muliyana sa kay nagatna yawawa kulo'o, sa ŋulona tap yam-tuwsiyawa kat Bum-sumuna, hiɗi ma mul ɦokay kalamna valamu.[13]

²⁷Kay hay gasita, nisi tok tuwsiya kay sunda vaŋ ma peldetna Yesu, ma naŋ ɦokom mul kalamna, Herod hiɗi Pontus Pilatus ŋra vunsi kalam hay hoyok-ziyn tani, hiɗi jaf-sumuna, hiɗi sum sa Israyel kaw,

²⁸kay li mige kaf ma ɓaŋu hiɗi varta vaŋu colay ala slen kayni ma li ki kayn nala.

²⁹Wulin kayni Bum-sumuna, tun ŋalda vaŋ kay joot ta nisi min la' tuma'a, vulaŋ kursulita mi sa sunda vaŋu kay nisi ma kus yoboyn hiɗi donota:

³⁰Meɗaŋ ɓaŋ goyo kay yerta-goyta ma li'e, ɗekka hiɗi slen ma li kuɗ gul-yalda ma li hay semda vi sa ma sunda vaŋu Yesu.

³¹Hay li ma nisi vat hiɗi siɗawta vatna, liyn ma nisi lakay hayamna wira; nisi kaf hob hiɗi Ŋusta-Peldetta, nala nisi tun caw kus yoboyna vi Lawna hiɗi kursuliya.

³²Vokŋa vi sa viyna diksi tapay kepe, ciwta visi kepe kaw. Sa mara ma di kay slena valam ala kayn fan nanna mayɗi. may slen lakay kisi jarsi dar kep.

³³Sa apostolayna ka li di-goyta hiɗi donot ŋolo kay dayta-kulota vi Bum-Sumuna Yesu, slugota ŋolo mus kisi kaf.

³⁴Kay jarsiya, sa mara ma di ala va valam ma nam ŋom ŋil tuwam hiɗi nam mayɗi may jarsiɗi; kay nisi kaf ka hiɗi sinena hiɗi ziyna gusum goyo, mar gurjuta vi va ma gusi goyniya,

³⁵tunum gaa vok sem sa apostolayna, nisi ɓurawam goy tam sumuna kuɗ asta vi va ma san gigekaw mina mina.

³⁶Yosef ma sa Apostolayn kaam gileta valam ala Barnabas, ma ɗek goy ala goora vi teŋ-irta, sa ma Levitna, ma vuɗi kaw hay Kiprus,

³⁷ma sinena valam ka'a, nam gusumay goyo, nam mar gurjuta tuna' gaa vok gay sa Apostolayna kaw.