Read Masana ROMENA 1 Bible Online

ROMENA 1 - Masana bible

ROMENA 1

¹Paulus, ma sunda vi Kristu Yesu, yumi kay lop apostolla, vileki goyo kay kus labara ma firina vi Lawna,

²ma Lawna dum jewe hiɗi vun sa jobta valamu hay ɗota-peldetta.

³kay Goora valamu, nam ma kuɗ sliwna vuɗi hay jafna vi David,

⁴nam ma ŋusta vi peldetta di goy kalam gasi ala: Namu mi Goora vi Lawna ma gaŋeraŋ kuɗumna, kuɗ dayta valam kulo'o hay mitta pa, mi Yesu Kristu Bum-Sumuna vaya.

⁵Namu ma numa fi slugota hiɗi lop apostolla kuɗumu, kuɗ semda valamu, numa ma nar jaf-sumun kaf hay hum-vunda vi vida,

⁶jarsiya nigi kaw yiyawa tam Yesu Kristu.

⁷Tam nisi sa Lawna dikam tiy kisina kaf, sa yiy goyo kay muɗ peldete, sa hay Rom, hin slugota hiɗi toyta vi Lawna Buya hiɗi Bum-Sumuna vaya Yesu Kristu vulis tigi vulge.

⁸Ma jewna, nan gideɓe mi Lawna vanu hay Yesu Kristu kigi kafe, kay mige vida vigiya se' ka tiy goy hay nagata pete.

⁹Kay Lawna ma nan sunum hiɗi dikan kaf hay labara ma firina vi Goora valamna, nam ka wi ala human ka gan kigi dok-dok hay siɗawta vanu.

¹⁰Nan ka siɗaw dok-dok ala, la Lawna mina, nan fi co tigiya.

¹¹Kay gisangi vanawa, nan min kay ɗuwgiya, kay nan min ɓuraw tigiya vulda-slugota vi ŋusta kay nigi ma fi donota.

¹²Kayn ala nanu hiɗi nigiya ma vul donot mi tuway hay vida vaya, figita hiɗi fanta.

¹³Ɓosiyonna, nan min ala nigi ma lak hay bay-wida kay kaynɗi, a nan so tuwan sen ŋolo kay coys tigiya kay fi vuɗna jargiya, ki jar jaf-sum segen nala, may slen telanu ta-ta wulini.

¹⁴Bal ka kanu tam sa Grekŋa hiɗi sa barbara kaw, tam sa yisi malina hiɗi sa muguruna kaw.

¹⁵Kayni mi va ma vulan varta kay di labar ma firin tigiya, tigi nigi sa ka hay Rom kaw.

¹⁶Kay nan may li zulo'o kay labara ma firina noŋɗi, kay namu mi gaŋeraŋa vi Lawna kay suɗ gigekaw ma min vi'e, sum sa Yudiyan jewe, bugolda sum sa Grekŋa.

¹⁷Kay hay kayni ɗigerta vi Lawna vul tuwa' goy haraŋi hay vida kuɗ vida, ki ɗot ka ɗoy nala ala: sa ma ɗigera ma mus iriya kuɗ vida.[1]

¹⁸Kay ɦiyda vi Lawna ɗek tuwa' ay goy wuralawn pa kay jiw-zlata hiɗi bay-ɗigerta vi sumuna sa gasit kirsi ta, may nisi lak hay bay-ɗigerta.

¹⁹Kay sle ma san as wum kay Lawna ka goy haraŋi kirsiya, kay Lawna vul kayni kirsiya.

²⁰Kay lopna valamu ma bay-wina, gaŋeraŋa valamu ma vatɗina, ŋolda valamu, san as wum goy haraŋi tam tun cawta vi nagati pa, kay san as wi kayni kuɗ lopna valam ma lina.

²¹Nisi as hulot goyɗi, kay mige nisi wi Lawna, may nisi may suburum ki Lawn naɗi, min hot gi-deɓta talamɗi kaw, may nisi muɗi joo'o hay varta visiya, diksi bay yali, muɗi jufunu kaw.

²²Hay li ma nisi subur tuwsi kay yalla visiya, nisi muɗi ɦay-ɦaya hay na'ta.

²³Gajijita vi Lawn ma ɓulakɗina nisi muɗa' hiɗi va ma sli tuw sana ma ɓulaka, va ma sli tuw layayna, va ma sli tuw muur ma selem fiɗi fiɗina hiɗi sle ma ɦarmatna.

²⁴Kay na'ta Lawna vulsi goyo tam liwista, kuɗ darta vi diksiya, kay nisi ma li sle ma zulona mi sliw tuwsiya jar-tuwsiya;

²⁵Nisi sa muɗ gasita vi Lawna goy sinda, girif sle ma liyna, sunum kaw, hin Bumna ma li slena goyo, namu ma bolda ka kalamu hay vatɗit pa. Amen.

²⁶Kay na'ta Lawna hinsi a nisi li sle ma zulona jar-tuwsiya, kay boyna visi kaw hin buur ma bur tam jufaysin goyo, muɗ lum mi sle ma sa-wuran lumɗina.

²⁷Jufayna kaw nala, buur ma bur tam boyna visina nisi hinim goyo, nisi tiy kuɗ darta vi sliwna jar-tuwsi nisi jufayna, ta-ta jufayn li zlata-liwisi jar-tuwsi nisi jufayna, nisi kay tuwsiya fi wurakŋa vi viy-goyta visiyawa.

²⁸Kay ki nisi min var kay wi Lawnɗi, nala Lawna vulsi goy hay varta waata, ta-ta nisi li sle ma zulona,

²⁹nisi hobay hiɗi bay-ɗigerta kaf, hiɗi jiw-zlata, hiɗi niŋata vi slena, hiɗi joota, hobay hiɗi hunayta, ci matta, cirepta, ɗutta, sa ɓulak sem sumuna,

³⁰sa hoso-hosona, sa yaw dira, sa ka gaw hiɗi Lawna, sa viyuk-viyukŋa, sa tiy sem tuwsina, sa sli yam tuwsi kulona, sa niŋa yal ma joon voksina, sa hum kuɗ sumaysiɗina,

³¹sa bay-yalla, sa wi gattaɗi, sa murlina, sa vul gidɗi, sa wi haw saɗi.

³²Sum sa wi gatta vi Lawn goy haraŋi, a sum sa ki kayn nana nagawa kay mitta, kay nisi ka li slen kayni ɦawaɗi, may tap vunsi hiɗi nisi sa lumna kaw.