Read Masana ROMENA 10 Bible Online

ROMENA 10 - Masana bible

ROMENA 10

¹Ɓosiyonna, darta vi dikanu hiɗi siɗawta vanu tam Lawna kisi kayn ala nisi ma fi su'da.

²Nan min li di-goyta kisi ala: Ciwerta visi kay Lawna ka'a, may bay wida-yalla.

³Kay hay li ma nisi bay wi ɗigerta vi Lawna, nisi gar a kot ɗigerta kay tuwsiya, nisi min hin tuwsi hay ɓam ɗigerta vi Lawnɗi.

⁴Kay Kristu kayni mi dabaŋ-gu'ta vi vun-ma-gatna, kay muɗ ɗigere nisi kaf sa min vi'e.

⁵Kay Musus ɗo kay ɗigerta ta may kuɗ vun-ma-gatna ala: Sa ma li kuɗ slen kayni, nam mus iriya kuɗum namu.

⁶May kayni mi va ma ɗigerta vi vida dumna: Sa ma fi jik kulo'o hay wuralawna mi gige? Kayni kay mar Yesu gaa'a. Naŋ as kay di hay dikaŋ kalaf naɗi.

⁷Lebo, sa ma as jik gaa hay zul ma wiŋŋa mi gige? Kayni kay day Kristu kulo'o jar sa mitina, naŋ as di hay dikaŋ kalaf naɗi kaw.

⁸May ɗota di ala mige? Yoboyna ka goboy hiɗi naŋu, hay vunaŋu, hay dikaŋu kaw. Kayni mi yoboyna vi vida ma numa kusumna.

⁹Kay la naŋ di goy hiɗi vunaŋ ala Yesu nam mi Bum-Sumuna, la naŋ vi hay dikaŋ kaw ala Lawna dayam kulo'o hay mitta pa, naŋ ma fi su'da.

¹⁰Kay hiɗi dikamu sa vi'e tam ɗigerta, hiɗi vunamu sa ham goy tam su'da. Kay ɗota di'e:

¹¹Gigekaw ma vi hay namu ma muɗ goy zuloɗi.

¹²Yudiyana hiɗi Grekŋa ma suw jarsi mayɗi. Nisi kaf Bum-Sumuna visi kep, nisi kaf sa siɗawamu nam nagay kisiya.

¹³Kay gigekaw ma yi semda vi Bum-Sumuna nam ma fi su'da.

¹⁴Nam ma nisi bay vi hayamna nisi as siɗawam ir nanige? Nisi fi vi'e hay li ma nisi bay huma ir nanige? Nisi fi huma bay sa kus yoboyn tisiya ir nanige?

¹⁵Nisi fi kus yoboyna bay sa cuksiya ir nanige? Ki ɗo'ay nala: Nisi sa mar labara ma firina sesi ka jifiy ŋolo.[10]

¹⁶May sumun kaf may hum kuɗ labara ma firinɗi. Kay Esaya di ala: Bum-sumuna, sa ma vi kuɗ labara ma firina vuma'an gige?

¹⁷Nala vida ma'a kuɗ kusta ta san huma'ta, kusta na'ta mi yoboyna vi Kristu.

¹⁸May nan di'e: Nisi bay hum su? Awa, nisi humiya. Delsiya kali goy hay nagata kuɗulu, yoboyna visiya kali hay vun-dabaŋgu'ta vi nagata kaw.

¹⁹May nan di'e: Sa Israyella may wi kaynɗi su? Musus di jew ala: Nan ma kal hunayt hay dikgiya kuɗ sum sa may jaf-sumuɗi, nan ma kal ɦiyd hay dikgiya kuɗ sum sa bay wida-yalla.[11]

²⁰Esaya di hiɗi kursulit ŋolo lo ala: Nisi sa garanɗina fanawa yo Nan vul tuwanawa kir nisi sa job kanɗi.[12]

²¹May kay sa Israyella nam di'e: Busat kaf nan ka meɗ ɓan goyo, mi jaf-sum sa ŋel-vunda hiɗi sa ci-wayta kaw.