Read Masana ROMENA 12 Bible Online

ROMENA 12 - Masana bible

ROMENA 12

¹Ɓosiyonna, nan siɗawgiya hiɗi slugota vi Lawna, a nigi ma ɗek tuwgi goyo ki ɗifinna ma irina, ma peldetna, ma kir Lawna ŋaana nala, kayni mi lopna vigiya kuɗ ŋusta tam Lawna.

²Nigi ma ligi tuwgi ŋray hiɗi sa nagatnaɗi, may nigi ma mu'ɗa kuɗ mu'da wulita vi varta vigiya, kay nigi fi wi minda vi Lawna, va ma ŋaana, ma kiram jifiya, ma pasiyakŋa.

³Kay kuɗ slugota ta vuli manu, nan min di tam gige jargi kaf a nam ma niŋa niŋata ta suwtaɗi, ta calay goytaɗi kaw, may nam ma var ŋali, poy ŋali kaw kuɗ vun ɓurawta vi vida ta Lawn vul tam sana sana.

⁴Kay ki ɓetna ŋolo ka tam tuw kepe, may ɓetna kaf lopna valam kepɗi.

⁵Nala kaw, nay sa ka hiɗi ɓetna ŋolo, nay tapay kep hay hay tuw ma kepna hay Kristu, nay kaf mi ɓetna vi tuway jar-tuwaya.

⁶Kay nay fi vulda-slugota tara'a tara'a kuɗ slugota ta nam vul taya, la vuli tay mi lopna vi jobta-Lawna, kayni ma liys kuɗ vida vaya,

⁷la vuli tay mi lop sunda, kayni ma liys hiɗi dikga vi sunda; la mi sa ma hatta, nam ma jun tuwam tam hatta;

⁸la mi sa ma vul gatta, nam ma vul gatta valamu, la mi sa ma vul slena, nam ma li kayni hiɗi gasita vi dikamu, la mi sa ma ŋom dakka, nam ma li kayni hiɗi ciwerta, sa ma li slugota, nam ma la' hiɗi firita kaw.

⁹Hin ti-kamda li bay mileta, ka gaw tam sle ma joona, vigi sle ma ŋaana dono'o.

¹⁰Ligi ŋali jar-tuwgiya, tiygi kay tuwgiya, gargi kay sli yam tuwgi kulo'o hena suw hena.

¹¹Lakgi lub-lub' hay ciwerta vigiɗi, may lakgi ciwer hay Ŋusta, sungi Bum-Sumuna.

¹²Lakgi firiya hay cubta-sle'ta, ŋali hay zumalda, ŋiresl hay siɗawta.

¹³Ŋomgi ŋil tuw sa peldetna, vigi rogoyna.

¹⁴Gigi bol kay sum sa ligi lasi, gigi bolo, beɗgiɗi.

¹⁵Firigiya hiɗi nisi sa ka firiya, tiygiya hiɗi nisi sa ka tiya kaw.

¹⁶Tapgi varta vigi kepe, vargi kay sle ma suburtaɗi, may vargi kay sle ma kiɗayna, sargi tuwgi ki sum sa wi yal ŋol naɗi.

¹⁷Wurakgi joota vi sa hiɗi joot noŋɗi. Gargit mi sle ma kir sumun pet ŋaana.

¹⁸La kayni nigi as a lumu, nigi ma lak hay toyta hiɗi sumun pet.

¹⁹Sa hayan kigina, hotgi joot kay tuwgiɗi, may hin liyn kay ɦiyda. Ki ɗot ɗo'ay nala: Hot joota kayni mi nanu, Nan min vul wurakŋa, din Bum-Sumuna.[18]

²⁰May, la mayt ci sa ma gawt kaŋŋa, naŋ ma vulum va ma ti'e, la laat lumu, naŋ ma vulum niy ma ci'e. Kay hay li ma naŋ ka li kayni, naŋ ka tok veŋ ma kuta kulo kalamu.

²¹Hin joot kol kaŋɗi, may naŋ ma kol kay joota hiɗi ŋaata.