Read Masana ROMENA 13 Bible Online

ROMENA 13 - Masana bible

ROMENA 13

¹Hin san gigekaw hum kuɗ sa ŋom-nagata. Kay ŋolda tun bay Lawnɗi, may sa ŋulona vi nagata ka kayni tunsi mi Lawna.

²Kay na'ta, sa ma fok kulo'o kay sa ŋom-nagata nam fok kulo kayni kay gatta vi Lawna. Nisi sa fok kulo'o nisi ma fi kitata visiya.

³Kay narta kuɗ sa ŋom-nagata may hay lop ma ŋaanɗi, may hay lop ma joona. May la naŋ min li nar kay sa ŋom nagataɗi, laŋ sle ma ŋaana, nala nisi ma di ŋaa'a kaŋu.

⁴Kay nisiya si sunda vi Lawna kay ŋaata vaŋu. May la naŋ li sle ma joona, laŋ nari, kay nisi may mi ziy kew-gaferaŋa kayni ɦawaɗi, nisiya si sunda vi Lawna tam sum-zlata kat nisi sa li joo'o.

⁵Kay na'ta lalitige kaw nigi ma hum kuɗsiya, kay sum-zlata kepɗi, may kay sle'ta vi tap-wida kaw.

⁶Kay na'ta nigi ma vul taara kaw, kay nisiya si sunda vi Lawna sa ŋom lopna kayni.

⁷Wurakgi bal ma kigi tam sumun kaf: Taara tam sa taara, taara vi vun-lumuna tam sa tar vun-lumuna, nar kuɗ sana vi narta, suburta tam sa ma suburta.

⁸Hin bal kigi tam saɗi, may hin kayni ti minda ta jar-tuwgita: Kay sa ma min sugolomu, nam hob vun gatta kulo'o.

⁹Kay vun-ma-gatna di'e: Naŋ li zlata-buloɗi, naŋ ci matɗi, naŋ kulɗi, naŋ ka sinɗi, naŋ niŋaɗi, hinɗi vun-ma-gatna mara'a mara'a tap tuwam hay yoboyn kayni kepe: Naŋ ma min sugoloŋu ki tuwaŋ nala.

¹⁰Sa ma ka hiɗi ti-kamda li va ma joo'o tam sugolom noŋɗi, ti-kamda kayni ti hobta vi vun-ma-gatna.

¹¹May nigi ma li slen kayni, kay nigi wi liyn ma nay ka hayamna. Liyn maawa kay nay ma zliy kulo'o hay senda, kay su'da ka goboy hiɗi nay wulini suw ma nay vi jewna.

¹²Henjeta kali ŋolo, grawta ka goboyo: Kay na'ta nay ma cuk lopna vi jufunda goyo, nay ma jun kaway-ma-duura vi haraŋa taya.

¹³Nay ma poy gaŋaya ki hay falayta nala, may hay gijum-gijumta hiɗi ɦiwirta kuɗ dolaynɗi, hay liwista hiɗi bay-zulotaɗi, hay lawta hunaytɗi kaw.

¹⁴May cukgi Bum-Sumuna Yesu Kristu kigiya, slena vi sliwna nigi ma var kalamu kay hob darta valamɗi.