Read Masana ROMENA 14 Bible Online

ROMENA 14 - Masana bible

ROMENA 14

¹Sa ma bay vi dono'o tapam kuɗgiya, may kaagi kitat kay varta valamɗi.

²Sa ma kepna vida valamu as ti slen kafe, may sa hena ma maŋayna tum mi hadafna ɦawa.

³Sa ma ti'e nam ɗuw sa ma tiɗina birek-cekɗi, sa ma tiɗina ma ka kitat kay sa ma tinaɗi kaw, kay Lawna vumawa.

⁴Naŋ ka kitat kay sa ma sun vo hay ziyna vi sa hen kayn naŋ gige? La nam col kulo'o, lebo la nam nig gaa' kaw kayni wum mi mulamna. Awa, nam fi cola, kay Bum-Sumuna donota valam as kay hinim col kulo'o.

⁵Sa hena buurta kepta kiram ŋol suw hena, sa hena lo buur kaf kiram ŋray ca. May gigekaw ma col dono'o kay va ma nam kay tuwam varamna.

⁶Sa ma tun ŋalda valam kay buura nam tun ŋalda valam kayn kay Bum-Sumuna. Sa ma ti'e nam li kayn kay Bum-Sumuna, kay nam vul gi-deɓta mi Lawna. Nam ma tiɗi kaw, nam li kayni kay Bum-Sumuna, vul gi-deɓta mi Lawna kaw.

⁷Kay sa jaraya ma mus tuwam iri kay tuwam mayɗi. Sa ma as mit tuwam kay tuwam mayɗi kaw.

⁸La nay lak iriya, nay lak iri kayni hay Bum-Sumuna, la nay mita, nay mit kayn kay Bum-Sumuna kaw. La nay lak iri maya, la nay mit maya kaw, nay ka hay Bum-Sumuna.

⁹Kay na'ta Kristu mitiya, muɗi iriya lo, kay nam fi mus mi Bum-Sumuna vi sa irina hiɗi sa mitina kaw.

¹⁰May naŋu, naŋ ka kitat kay ɓasuŋŋa kay mige? Naŋu lo, naŋ ɗuw ɓasuŋŋa birek-ceke kay mige? Kay nay kaf ma lak vok zlamda-kitata vi Lawna.

¹¹Ki ɗo'ay nala: Nan ka iriya, din Bum-Sumuna, Sumun kaf ma girif ŋulofgi gaa vokanu, Vunna vi sumun kaf ma subur Lawna.[19]

¹²Nala san gige gige kaf jaraya ma ɗek lopna valam kay tuwamu goy vok Lawna.

¹³Kay na'ta nay ma tun kitat kay tuway jar-tuwayɗi, kitata vigi kayn ala nigi ma li va ma dab sem ɓasukiɗi, li va ma pukum gaaɗi kaw.

¹⁴Nan wi'e, nan viy goy haraŋi hay Bum-Sumuna Yesu ala: Va ma liwisi kay tuwam mayɗi, may va ma kir san liwisi, nam muɗi talam nam liwisi may.

¹⁵Kay la ɓasuŋŋa ka yor tuwam kay va ma naŋ ti'e, naŋ may poy hay ti-kamda loɗi, sa ma Kristu mit kalamna naŋ naram tam ba-goyta kuɗ tina vaŋɗi.

¹⁶Hin ŋaata vigiya muɗ goy va ma sa di joo'o kalamɗi.

¹⁷Kay mulda Lawna kayni may mi tina hiɗi cinɗi, may ɗigerta hiɗi toyta hiɗi firita hay Ŋusta-Peldetta.

¹⁸Kay sa ma sun Kristu ki kayn nalana nam kir Lawna ŋaa'a, sumun var ŋaa'a kalamu kaw.

¹⁹Kay na'ta, nay ma garam mi sle ma mar toyta, hiɗi sle ma wulay kulo hay vida kaw.

²⁰Ɓulakay lopna vi Lawna kay lawta vi tinɗi, hay gasita slen pet ka cet-cete; may nam joo'o kay sa ma tumna, hay li ma nam tumu kay dab sem sa hiɗi namu.

²¹May ŋaa'a kay mut sliwnɗi, may ŋaa'a kay ci vinɗi kaw, va ma as puk ɓasuŋŋa gaa'a naŋ as hinim goyo.

²²Vida vaŋ ta hayaŋga naŋ ma col ka' ɗeŋe vok Lawna, sle'ta ka kay sa ma ka kitat kay tuwamɗi kay va ma kiram ŋaa'a hay liyamna.

²³May la san ti hiɗi giriŋga, kitat ka kalamu, kay nam ti kayni hiɗi vidaɗi. Mige kaw ma li hiɗi vidaɗi kayni mi sulukŋa.