Read Masana ROMENA 16 Bible Online

ROMENA 16 - Masana bible

ROMENA 16

¹Nan vulgi ɓasuyta Febe ays hay ɓigiya, na'a ti cata ta sun-tapna hay Kaŋkreya.

²A nigi ma tapa' kuɗgiya hay Bum-Sumuna, ki lop ma nagay kay sa peldetna nala, gut kuɗa'a hay slen pet ma na' nagay kay lum kay tuwa'ɗi. Kay na' kay tuwa'a gut kuɗ sumun ŋolo. Awa, na' gutan nanu kaw.

³Gigi deɓ mi Priskila hiɗi Akuilas, nuriyon sa lopna hay Kristu Yesu,

⁴nisi sa vul irita visi goyo kay suɗ irita vanu; gisi deɓ kayni may mi nan kepɗi, may Ekklesiyata vi sa waana kafe;

⁵Gigi deɓ mi sa tapna sa ka hay ziyna visin kafe. Gigi deɓ mi Epenitus, ma hayan kamna, namu, vun-jaf ma jewna hay Asiya tam Kristu.

⁶Gigi deɓ mi Mariya ta li lop ŋolo kigita.

⁷Gigi deɓ mi Andronikus hiɗi Yuniyas sa sugoliyonna, nuriyon sa daŋgayna kaw, sa sesi tiy ŋaa'a jar sa apostolayna, nisi sa co tam Kristu jewan nanu kaw.

⁸Gigi deɓ mi Ampliyas, ma hayan kamna hay Bum-Sumuna.

⁹Gigi deɓ mi Urbanus nirma ma lopna hay Kristu, hiɗi Stakiyus ma hayan kalamna.

¹⁰Gigi deɓ mi Appeles ma waki-wak hay Kristu. Gigi deɓ mi nisi sa vo hay ziyna vi Aristobulus.

¹¹Gigi deɓ mi Herodiyon ma sugolanna. Gigi deɓ mi sa vo hay ziyna vi Narsis sa ka hay Bum-Sumuna.

¹²Gigi deɓ mi Trifene hiɗi Trifosa, sa ziy makka kay Bum-Sumuna. Gigi deɓ mi Persida, ta hayan ka'ta, ta mak tuwa' ŋolo kay Bum-Sumuna.

¹³Gigi deɓ mi Rufus, ma vileki-goyna hay Bum-Sumuna, hiɗi sulum ta sun nanta kaw.

¹⁴Gigi deɓ mi Asinkritus, Flegon, Hermes, Patrobas.

¹⁵Gigi deɓ mi Filologus hiɗi Juliya, Nerews hiɗi ɓasulumta, hiɗi Olimpas kaw, hiɗi sa peldetna kaf sa ka hiɗi nisiya.

¹⁶Gigi deɓ jar-tuwgiya hiɗi ŋaf-vunda ta peldetta. Tapna vi Kristu kaf gigi deɓe.

¹⁷Nan gatgiya ɓosiyonna, kay nigi ma li ŋali hiɗi sum sa mar ɓurawta hiɗi sle ma dab-semna, kay fok ci-wayta hiɗi sle ma nigi hatamna. Vigi tuwgi goy tisiya.

¹⁸Kay sum sa ki kayn naana sunum kayn mi Bum-Sumuna vaya Yesu Kristuɗi, may nisi sunum kayn mi haysiya. hiɗi vunna visi ma golɓotna hiɗi yoboy ma jibetna, nisi ɗut sum sa wi caw vaɗina.

¹⁹May nigiya, sumun kaf wi hum-vunda vigiya, kuɗ na'ta nan ka li firi kigiya, kay na'ta nan min ala nigi ma muɗ yali kay sle ma ŋaana hiɗi pasiyakŋa, kay sle ma joona kaw.

²⁰Lawna vi toyta ma kirap Satan gaa kuɗ segiya. Slugota vi Bum-Sumuna vaya Yesu Kristu mus hiɗi nigiya.

²¹Timotewus niran ma hay lopna gigi deɓe. Lukiyus, Yason hiɗi Sosipater sa sugoliyonna gigi deɓ kaw.

²²Nan kaw gigi deɓe, nan Tertiyus ma ɗo ɗerwelda kayni hay Bum-Sumuna.

²³Gayus ma nan vo valamna, ma vi sa tapna kaf vo valamna kaw gigi deɓe. Erastus, sa ma ŋom gurjuta vi hoyok-ziyna kaw gigi deɓe, ɓasuyna Kuwartus kaw gigi deɓe.

²⁴Slugota vi Bum-Sumuna vaya Yesu Kristu mus hiɗi nigi kafge. Amen.

²⁵May nam ma donota valam ka'a kay muɗgi ɗeŋe kuɗ labara ma firina vanu hiɗi kusta-yoboyna vi Yesu Kristu, kuɗ wida ta nay fa'a hay ŋayayta vi Lawna, ŋayayta na'ta ya' ay kusuɓiya hay liyn ma jewna,

²⁶may wulini na' maawa goy haraŋi kuɗ ɗota vi sa jobta, kuɗ dita vi Lawn Ma-Vatɗina, maray goy haraŋi hay wida vi jaf-sumuna kaf, kay sumun ma hot yisi gaa'a hiɗi vida.

²⁷Lawna kep mi ma wi yalla hay Yesu Kristu, talam namu, gajijita hay vatɗita vatɗita. Amen.