Read Masana ROMENA 5 Bible Online

ROMENA 5 - Masana bible

ROMENA 5

¹Wulin kayni nay fi ɗigertawa kuɗ vida, nay toyawa hiɗi Lawna hay Bum-Sumuna vaya Yesu Kristu;

²hiɗi vida vay hay namu nay coowa tam slugota na'ta, nay as lak dono'o haya'a, nay as subur tuwaya hay cubta-sle'ta hay gajijita vi Lawna.

³may kayni kepɗi kaw, nay as li firiya hay zumalda vaya kaw: kay nay wi ala zumalda vuɗ so-tuwta,

⁴so-tuwta vuɗ dikga ta waki wak, dikga ta waki wak vuɗ cubta-sle'ta.

⁵Cubta-sle'ta hin san muɗ goy zuloɗi, kay ti-kamda vi Lawna hobawa hay dikaya kuɗ Ŋusta ta nam vulayawa.

⁶Kay hay li ma nay ay maŋay tuwa'a, hay li ma kaay kana, Kristu miti kay sa vi kuɗ Lawnɗina.

⁷Kay lop ŋolo a san hin tuwam mit hay baŋal sa ma ɗigera, li ŋalɗi san as fi kursuliya kay mit hay baŋal sa ma ŋaan kla.

⁸May Lawna vul ti-kamda valam goy haraŋi taya, hay li ma nay ay sa sulukŋa tuwa, Kristu miti goy kaya.

⁹kay nay wulini fi ɗigertawa hiɗi busuwna valamu, hay namu nay ma suɗ goyo vun ɦiyda pa kaw.

¹⁰La nay toyawa hiɗi Lawna hay mitta vi Goora valamu hay li ma gawt ay jaray hiɗi nam tuwa, bugol toyta lo, nay ma suɗ goyo kuɗ irita valamu.

¹¹May kayn kepɗi kaw, nay as subur tuwaya hay Lawna kuɗ Bum-Sumuna vaya Yesu Kristu, nam ma nay fi toytawa hay nam wulini.

¹²Kay na'ta ki sulukŋa maawa hay nagata kuɗ san kepe, mitta maawa kuɗ sulukŋa kaw, nala mitta raw voka'a tam sumun kaf, kay kaf li sulukawa.

¹³Kay sulukŋa ay hay nagata jew vun-ma-gatna, may hay li ma vun-ma-gatna mayɗi, sulukŋa may ŋaɓiɗi.

¹⁴Nir na'ta kep sulukŋa li gaŋeraŋi tam Adam pa ta-ta tam Musus, tam nisi sa li suluku hiɗi raw-goyta ki Adam naɗin kaw. Namu mi ŋus nam ma min ma'a.

¹⁵May vulda-slugota kayni na' may ki raw-goyta naɗi. Kay la sumuna ŋolo miti kuɗ raw-goyta vi ma kepna, nala suw kayni ŋolo kaw, kay slugota vi Lawna hiɗi vulda kuɗ slugota vi sa ma kepna, Yesu Kristu, nagawa ŋolo kisi kafe.

¹⁶May vulda li ki van li'e hay li ma ma kepna li suluku naɗi, kay kitata ma kuɗ san kepe tam ba-goyta, may vulda-slugota muɗi lita goy ɗigerta bugol raw-goyta ŋolo.

¹⁷Kay la kuɗ raw-goyta vi sa ma kepna, mitta li gaŋeraŋi, suw kayni ŋolo kaw, nisi sa fi slugotawa ŋolo hiɗi vulda vi ɗigerta, nisi ma li gaŋeraŋi kuɗ irita vi ma kepna Yesu Kristu kaw.

¹⁸Kay na'ta ki raw-goyta vi ma kepna mar ba-goyta tam sumun kafe, nala kaw lop ma ɗigera vi ma kepna mar ɗigerta vi irita kay sumun kafe.

¹⁹Kay ki sumun ŋolo muɗi goy si sa sulukŋa kuɗ ŋel-vunda vi sa ma kepna, nala kaw sumuna ŋolo ma muɗ ɗigere kuɗ hum-vunda vi sa ma kepna kaw.

²⁰Vun-ma-gatna maawa kay raw-goyta ma li ŋolo, may hay li ma sulukŋa muɗ ŋolo, slugota jor voka' ŋol suwa.

²¹Kay ki sulukŋa li gaŋeraŋ kuɗ mitta, nala kaw slugota ma li gaŋeraŋi kuɗ ɗigerta tam irita vatɗita hay Yesu Kristu, Bum-Sumuna vaya.