Read Masana ROMENA 7 Bible Online

ROMENA 7 - Masana bible

ROMENA 7

¹Lebo ɓosiyonna, a vun-ma-gatna li gaŋeraŋ kay san kayni hay li ma nam ka iri tuwana, nigi bay wi kayni su? Nan di kayni tisi nisi sa wi vun-ma-gatna.

²Kay cata, la jufa' ka iri tuwa, kuɗ vun-ma-gatna na' juni talamu hay irita valamu, may la jufa' mitawa, na' buti goyo kay va ma vun-ma-gatna ma juna' tam jufa'na.

³La na' sli juf mara'a, hay li ma jufa' ka iri tuwa, nisi hay na'ta ma ya' ala cata viyuwta; may la jufa' mitiya, na' buti goy kay vun-ma-gatna, hay na'ta la na' sli juf mara kaw, na' may ti cata, viyuwtaɗi.

⁴Kay na'ta ɓosiyonna, nala nigi kaw miti tam vun-ma-gatna hay tuwna vi Kristu, kay nigi ma muɗ goy vi sa mara'a, kay muɗ goy vi nam ma dayay kulo'o hay mitta pa, kay nigi ma li sle ma ŋaana vok Lawna.

⁵Kay hay li ma nay ay hay sliwna tuwa, darta vi sulukŋa ta vun-ma-gatna mara' kayta ka li lop hay ɓetna vi tuwaya, ta-ta nay li sle ma nar san tam mitta.

⁶May wulini nay buti goy kay vun-ma-gatna, kay nay miti tam va ma tuway juni kuɗumna, nala nay ma suɗ kuɗ ŋusta wulita, may kuɗ ɗota ta muɗi busayta loɗi.

⁷La nala nay ma di mige? Vun-ma-gatna mi suluk su? May noŋɗi. May nan wi sulukŋa kayn kuɗ vun-ma-gatna. May la vun-ma-gatna di diy ala naŋ niŋaɗi ɗini, nan as wi niŋatɗi.

⁸May sulukŋa li niŋa mara'a mara'a hayanu kuɗ vun-ma-gatna. Kay bay vun-ma-gatna sulukŋa mitiya.

⁹May nanu, nan ay giy jewe bay vun-ma-gatna, may hay li ma vun-ma-gatna coowa, sulukŋa hot zliy kulo'o, nanu nan mita may.

¹⁰Nala vun-ma-gatna ma nar san tam irita muɗi kanu ki va ma nar san tam mitta nala.

¹¹Kay sulukŋa fi liyna, nam ɗutanu hiɗi vun-ma-gatna, hiɗi vun-ma-gatna nam can goyo.

¹²Nala gatta ka peldete, vun-ma-gatna ka peldete, ɗigere, ŋaa'a kaw.

¹³Va ma ŋaa'a muɗi mi va ma mar mitta kan su? May noŋɗi. May sulukŋa, kay ɗek tuwam goy sulukŋa, nam mar mitta kanu hiɗi va ma ŋaana, kay kuɗ vun-ma-gatna sulukŋa muɗ joo'o suwa.

¹⁴Kay nay wi ala vun-ma-gatna kayni kuɗ ŋusta, may nanu, nan kuɗ sliwna, gusi goy gus tam sulukŋa.

¹⁵Kay va ma nan min li'e nan lumɗi, kay va ma nan min li'e nan lumɗi, may va ma nan minɗi kayni nan lumu.

¹⁶May la nan li va ma nan liɗi, nala nan tap vunan hiɗi vun-ma-gatna ala nam ŋaa'a.

¹⁷May wulini lum kayni may mi nanɗi, lum mi sulukŋa ma ka hayanna.

¹⁸Kay nan wi ala va ma ŋaa'a may hayanɗi, kayn di ala hay sliwna vanu: Nan ka hiɗi minda kay li va ma ŋaa'a, may gaŋeraŋa van as kay kaynɗi.

¹⁹Kay va ma ŋaana ma nan min li'e nan liɗi, may va ma joo'o ma nan min liɗi kayni nan lumu.

²⁰May la nan li va ma nan min liɗi, lum kayni may mi nan loɗi, may mi sulukŋa ma ka hayanu.

²¹Nan fi gatta kayni ta ka tanu: La nan min li ŋaa'a, joota ka gaɓi tan waŋ.

²²Kuɗ san hay dikan kalafna, nan firiya kay vun-ma-gatna vi Lawna.

²³May nan wi vun-ma-gatna mara'a hay ɓetna vi tuwanu, ma dur hiɗi vun-ma-gatna ma hay dikanu, nam junan gaa'a kuɗ vun-ma-gatna vi sulukŋa ma ka hay ɓetna vi tuwanu.

²⁴Nan sa ma joona, sa ma fi suɗan goy hay tuwna vi mitta zawni mi gige?

²⁵Nan gi deɓ mi Lawna hay Yesu Kristu Bum-Sumuna vaya. La nala, nan sun vun-ma-gatna vi Lawna hiɗi tap-wida vi dikanu, kuɗ sliwna, nanu mi gorvona vi gatta vi sulukŋa.