Read Masana 1 KORINTENA 1 Bible Online

1 KORINTENA 1 - Masana bible

1 KORINTENA 1

¹Paulus, yumi kay li lop Apostolla vi Yesu Kristu kuɗ minda vi Lawna, hiɗi ɓasuyna Sostenes.

²Tam sa tapna vi Lawna hay Korinte sa liy goy peldete hay Yesu Kristu, sa yiyay kay muɗ goy peldete, hiɗi nisi kaf, sa hay liyn pet, yi sem Bum-Sumuna vaya Yesu Kristu, Bum-Sumuna vaya hiɗi fisin kaw.

³Slugota hiɗi toyta vi Lawna Buya hiɗi Bum-Sumuna Yesu Kristu ma vulis tigi vulge.

⁴Nan gi deɓ mi Lawna van kigi dok-doko kay slugota vi Lawna ta vuli tigiya hay Yesu.

⁵Kay nigi fi asta ŋolo hay namu, hay slen kaf, hay yoboyna hiɗi wida kaf kaw,

⁶kay di-goyta vi Kristu viy hay dikgi dono ŋolo.

⁷Vulda-slugota vi Kristu ta hini bay vul tigi tayɗi, nigi sa ka cub buur ma Bum-Sumuna vaya Yesu Kristu ma vul tuwam goy haraŋi.

⁸Nam ma vulgi dono'o ta-ta hay dabaŋ-gu'ta, kay nigi ma lak bay lawta joot kigiya hay fatta vi Bum-Sumuna vaya Yesu Kristu.

⁹Lawna mi gasina, namu mi ma yigiyawa kay tap hiɗi goora valamu Yesu Kristu Bum-Sumuna vaya.

¹⁰Wulini ɓosiyonna, nan min siɗawgiya hay semda vi Bum-Sumuna vaya Yesu Kristu, kay nigi kaf vungi ma tap kepe, hin ɓurawta kal jargiɗi. May nigi ma tap tuwgiya hay dikga kepta hiɗi varta kepta kaw.

¹¹Kay ɓosiyonna, sumuna vi Klowas dan kigi ala ci-wayta ka jargiya.

¹²Nisi dan kayn ala, gigekaw di valamu valamu: Hen ala nan kuɗ Paulus, hen ala nan kuɗ Apolos, hen lo ala nan kuɗ Kefas, hena lo ala nan kuɗ Kristu.

¹³Kristu ɓuraw tak-tak su? Paulus ɓalay kat gu-ma-grakŋa kigi su? Lebo nigi fi baptisma hay sem Paulus su?

¹⁴Nan gi deɓ mi Lawna kay nan li baptisma mi sa mara'a jargiɗi, may Krispus hiɗi Gayus tuta.

¹⁵Nala sa as di ala nigi fi baptisma hay semda vanuɗi.

¹⁶Nan li baptisma mi ziyna vi Stefanas kaw. Bugol kayni la nan li baptisma mi sa mara'a kla nan wiɗi.

¹⁷Kay Kristu gan kayni kay li baptismaɗi, may kay kus labara ma firina, kayni may hiɗi yoboy ma yallaɗi kaw, kay a grakŋa vi Yesu Kristu ma muɗ goy waaɗi.

¹⁸Kay yoboyna vi grakŋa kayni mi va ma ɦay-ɦayna kay nisi sa ba goyo, may kay nay sa suɗawa, namu mi donota vi Lawna.

¹⁹Ki ɗo'ay nala kaw: Nan min ɓulak yalla vi sa yalla, Nan min ɓulak wida vi sum sa wida kaw.[1]

²⁰Sa ma yalla ma arige? Sa ma wi ɗota ka arige? Sa ma var yali hay nagat tani ka arige? Kay Lawna muɗ yalla vi sum sa kay nagatawa goy ɦay-ɦaya ɗi su?

²¹Kay sa nagatna hay yalla visiya, may wi Lawna hay yalla vi Lawnɗi, Lawn ɗuw kayni kiram ŋaa'a kay suɗ san ma min vina kuɗ ɦay-ɦayta vi kusta-yoboyna.

²²Sa Yudiyana gar kay wi ɗekka, may sa Grekŋa gar yalla.

²³May numa'a, numa'a kus kay Kristu ma ɓalay kat gu-ma-grakŋa, kayni mi va ma dab-semna kay sa Yudiyana, va ma ɦay-ɦayna kay sa waana kaw.

²⁴May tam sa yiyna, la Yudiyana, la Grekŋa kaw, Kristu mi donota vi Lawna hiɗi yalda vi Lawna.

²⁵Kay ɦay-ɦayta vi Lawna yalla va' suw sumuna, maŋayta vi Lawna donota va' suw sumuna kaw.

²⁶Ɓosiyonna, ɗuwgi tam yita vigi tige. Sum sa yalla kuɗ sliwna may jargi ŋolɗi, sum sa gaŋeraŋa say ŋolɗi, sum sa hay jafna vi mulda say ŋolɗi kaw.

²⁷May Lawna vilek sle ma ɦay-ɦayna vi nagata, kay muɗ sa yalla zulo'o. Sle ma maŋayna hay nagata Lawna vilekemu kay muɗ sa donona zulo'o.

²⁸Lawna vilek sle ma waa ɗaara vi nagata, sle ma sumun ɗuwum birek-ceke, sle ma mayɗina nam vilekemu kay muɗ sle ma ka'ana goy waa'a.

²⁹Kay san ɦawa fi subur tuwam vok Lawnɗi.

³⁰May kuɗum namu nigi ka hay Yesu Kristu, namu ma Lawn muɗum goy yalla kaya, muɗum goy lita-peldetta hiɗi butta-goyta kay naya.

³¹Kay ki ɗo'ay nala: Sa ma subur tuwamu nam ma subur tuwam hay Bum-Sumuna.[2]