Read Masana 1 KORINTENA 11 Bible Online

1 KORINTENA 11 - Masana bible

1 KORINTENA 11

¹Sligi kuɗanu, ki nan sli kuɗ Kristu nala.

²Nan tiygi segiya kay nigi ka var kanu hay slen pet, nigi viy kuɗ vun-ma-gatna vanu ki nan vulum tigi nigi nala kaw.

³May nan min kay nigi ma wi ala: Kristu mi yamda vi juf gige gigekaw, may jufna mi yamda vi cata, Lawna mi yamda vi Kristu may.

⁴sa juf marige kaw, hay li ma nam siɗawa lebo di vun-jobta, la hiɗi yalam baraya, kayn di ala nam sli yam sa ma ŋolla valam kuloɗi.

⁵May la cat tarige kaw, la na' siɗawa kla, di vun-jobta Lawna kla hiɗi ya' bay bara, na' sli yam ma ŋolla va' kuloɗi, kayni ŋray ca ki ya' welay goyo nala.

⁶Kay la cata ya' may barayɗi, marya na' wel ɗuŋusa' goyo, lebo zulo'o kay ka ya' goyo, ŋaata na' bar ya'a.

⁷Sa jufna as kay bar yalamɗi, kay tuwamu sli tuw Lawna, kay namu mi gajijita vi Lawna kaw, may cata na'a mi gajijita vi sa jufna.

⁸Kay sa jufna may goy hay tuw cata paɗi, may cata may goy hay tuw sa jufna pa.

⁹Sa jufna kotom kayni may kay cataɗi, may cat kota' kayni kay sa jufna.

¹⁰Kay na'ta, kuɗ sunda-wuralawna, na' ma jun va ka'a, kay ɗek ala na' ka sli yam jufa' kulo'o.

¹¹Nir na'ta kepe, hay Bum-Sumuna cata mus bay sa jufnaɗi, jufna mus bay cataɗi kaw.

¹²Kay cata may goy hay tuw sa jufna pa, nala kaw sa jufna vuɗay goy hay tuw cata pa, nisi kaf may goy vi Lawna pa may.

¹³Sargi kayni jar-tuwgi tige, la cata siɗaw Lawna hiɗi ya' bay bara, kayn hay liyam su?

¹⁴Sle ma goy jiyna ma Lawn lumna hatgi kaw ala, la sa jufna hin ɗuŋusam wul fiyoko, kayni zulo'o kalamu may naɗi su?

¹⁵May la cata hin ɗuŋusna va'a wul fiyoko, kayni vula' gajijita, kay ɗuŋusa' vuli ta'a ki va ma baara nala.

¹⁶May la san gar kay ci waya, numa may hatay naɗi, tapna vi Lawna may li naɗi may.

¹⁷Hay li ma nan vulgi gatta kayni, va ma nan suburumɗin kayn ala, nigi tok yam tuwgi kayni may kay muɗ ŋaa'a suwaɗi, may kay muɗ joo'o suwa.

¹⁸Ma jewna, nan hum ala: Hay li ma nigi tok tuwgi hay dakka, ɓurawta ka jargiya, nan var ala kayni ma li gasiya.

¹⁹Ŋaa'a kay ci-wayta ma li jargiya, kay sum sa gasina sa ka jargina dirsi ma pat goy haraŋi.

²⁰Kay na'ta hay li ma nigi tok tuwgiya, kayni may kay ti tina vi Bum-Sumunɗi;

²¹Kay hay li ma nigi ka ti'e, sa hena ti tina valam jewe, sa hena mayt ka cumu, hena hobay ŋolo kaw.

²²Ziy ma nigi ti fun haya, ci haya kaw mayɗi su? Lebo nigi pan tapna vi Lawna, sa fisin mayɗina nigi muɗsi zulo'o kaw kayni ŋaa'a su? Nan min digi mige? Nan as di va ma ŋaa'a kigi su? Hay kayni nan as di va ma ŋaa'a kigi noŋɗi.

²³Kay slen ma nan vulum tigin kayni nan fumi vi Bum-Sumuni pa, a Bum-Sumuna Yesu hay li ma henjeta di newti kalamna, nam sli funa,

²⁴bugol nam gi bol kalam gina, ɓurawamu di'e: kayni mi tuwanu, ma (vuli goy) kigina, ligi kayni kay humgi gigi kanu.

²⁵Nala kaw nam sli kaway-ma-cina bugol tina, di'e: kaway-ma-cina kayni bonota wulita hay busuwna vanu: ligi kayni dok-dok hay li ma nigi cumu, kay humgi ma gigi kanu.

²⁶Kay dok-dok hay li ma nigi ti fun kayni hiɗi ci kaway-ma-cin kayni, nigi ka li di-goyta kay mitta vi Bum-Sumuna ta-ta mata valamu.

²⁷Kay na'ta, gigekaw ma ti tuwna, ci kaway-ma-cina vi Bum-Sumuna kaw hiɗi dikam bay koti as kalamna, kitata ma ko kalamu kay tuwna hiɗi busuwna vi Bum-Sumuna.

²⁸Hin san gigekaw ɗuw dikam kay tuwamu, bugolda kayni nam ma ti kuɗ funa hiɗi ci kuɗ kaway-ma-cina;

²⁹Kay sa ma ti'e hiɗi ci'e, nam ti'e hiɗi ci'e tam kitat kalamu, la nam wi kay poŋ ir tuwna vi Bum-Sumunɗi.

³⁰Kuɗ na'ta kayni sa maŋayna hiɗi sa moyna ka jargi ŋolo, segena kali sene kaw.

³¹May la nay ka kitat kay tuwaya, kitat ma nig kayɗi.

³²May hiɗi kitata valamu, Bum-Sumuna ka gataya, kay kitata ma nig kaya hiɗi sa nagatna kuɗ tuwayɗi.

³³Kay na'ta ɓosiyonna, hay li ma nigi daka kay ti'e, nigi ma cub tuwgiya jar-tuwgiya.

³⁴La mayt ka ci sa'a, nam ma kal ti vo valamu, kay nigi ma mar kitata kigiɗi. Sle ma hinina nan ma hatgiya hay li ma nan ma coys jargiya.