Read Masana 1 KORINTENA 12 Bible Online

1 KORINTENA 12 - Masana bible

1 KORINTENA 12

¹May ɓosiyonna, kuɗ lawta vi vulda vi ŋusta, nan min ala nigi ma lak hay bay-widaɗi.

²Nigi wi ala, hay li ma nigi ay sa nagatna tuwa, nisi ay tangi tam lawayn ma waana ma numulla, ki nisi ka tangi nala.

³Kay na'ta nan digiya kay nigi ma wi ala: La san gigekaw ka law hiɗi Ŋusta vi Lawna, nam fi di ala Yesu mi Anatema[17] noŋɗi. Sa fi di ala Yesu mi Bum-Sumunaɗi kaw, la nam ka law hiɗi Ŋusta Peldettaɗi.

⁴Vulda slugota ka tak-takɗi, may ŋusta kepe.

⁵Lop sunda ka tak-taki, may Bum-Sumun kepe.

⁶Donota kay li lopna ka tak-taki, may Lawna kepe ma vul donot hay kafe.

⁷Kay Ŋusta vul tam gigekaw tak-taki kayni kay lum mi lop namna ma kepna.

⁸Tam mara'a, Ŋusta vulum yoboy ma yalla; tam hena, Ŋusta vulum yoboyn ma wida, kuɗ vulda vi Ŋusta na'ta kepe,

⁹tam sa hena, Ŋusta na'ta vulum vida, tam sa hena lo, Ŋusta na'ta vulum vulda-slugota kay muɗ sa moyna goy ŋaa'a.

¹⁰Tam sa hena na' vulum donota kay li sle ma ŋulona, tam hena lo, na' vulum kay di vun-jobta; tam sa hena na' vulum kay poŋ ir ŋusiyana, tam sa hena na' vulum kay wi vun dak-daki, tam sa hena lo, na' vulum kay muɗ vunna.

¹¹Slen namna kayni pet lum ti Ŋusta na'ta kepe, na' ɓuraw tam gige kuɗ minda va'a.

¹²Nala kaw, ki tuwna ka kepe, la ɓetna valam ka ŋol dak-daki kaw, nam tapay kulo hay tuw ma kepna -- Kristu kaw ka ki kayni nala.

¹³Kay nay kafe fi baptisma hay Ŋusta na'ta kepe kay tap hay tuw ma kepna, la Yudiyana lebo Grekŋa, la gorvona lebo sa ma vuɗina, nay kafe ci kuɗ Ŋusta na'ta kepe.

¹⁴Kay tuwna kayni may mi ɓetna ma kepna ɦawaɗi may ɓetna ŋolo.

¹⁵La semda di ala, nan may mi ɓamtaɗi, nan may mi ɓetna vi tuwnaɗi, na' as pat goy hay tuwna kuɗ kayni su?

¹⁶La humda di ala: Nan may mi iraɗi, nan may mi ɓetna vi tuwnaɗi, na' as pat goy hay tuwna kuɗ kayni su?

¹⁷La tuwna pet mi ira, hay na'ta humda ka arige? La tuwna pet mi humda, hay na'ta hista ka arige?

¹⁸May Lawna tun ɓetna kaf hay liyna valamu valamu hay tuwna, ki nam min nala.

¹⁹La kaf mi ɓetna kepe, tuwna ka arige?

²⁰May wulini ɓetna ka ŋolo, may tuwna mi kepe.

²¹Ira as di tam ɓamta ala: Lawta van may hiɗi nakɗi su? Yamda kaw as di tam gayta ala: Lawta van may hiɗi nakɗi su?

²²As di naɗi. May ɓetna vi tuwna ma kiray bay donona lopna valam ka kaw.

²³Ɓetna vi tuwna ma nay var ala suburta may kuɗum ŋolɗina, nay ka vulum suburta ŋol suwa; ɓetna vi tuwaya ma nay ka li zulo kalamna kayni, nay ka ŋayam suwa kay zulota,

²⁴may ɓetna ma jifiyna hay tuwaya nay may ŋayamɗi. May Lawna tap tuwna kayn ki kayn nala, ma maŋayna nam vulum suburta suwa.

²⁵Kay ɓurawta ma li hay tuwnaɗi, may kay ɓetna ma var kay tuwam jar-tuwamu kaw.

²⁶La kepe jar ɓetna ka ci lasi, ɓetna kaf ka ci las kuɗumu. La kepe jar ɓetna fi suburta, ɓetna kaf li firiya hiɗi namu.

²⁷May wulini nigi mi tuwna vi Kristu, gigekaw mi ɓetna valamu hay lopna valamu valamu.

²⁸Hay tapna kayni, sem ma jewna Lawna cuk sa Apostolayna, sem ma ma'na sa jobta, sem ma ɦidina sa hatna, bugolda sa ka hiɗi vulda-slugota kay li ɗekka, sa ka hiɗi vulda-slugota kay yer sa moyna goyo, kay gut sumuna, kay ŋom sumuna, kay di vun mara'a mara'a kaw.

²⁹Kafe si sa Apostolay su? Kafe sa jobta-Lawna su? Kafe si sa hatna su? Kafe li sle ma ŋulo ŋulona su?

³⁰Kafe vulda-slugota ka kisi kay muɗ sa moyn goy ŋaa'a su? Kafe law vun (mara'a mara'a) su? Kaf muɗ vunna su?

³¹May gargit ti vulda-slugota ta ŋol suw kafta. Nan min ɗekgi kay hagat tara'a ta ŋaa'a suwa kaw.