Read Masana 1 KORINTENA 13 Bible Online

1 KORINTENA 13 - Masana bible

1 KORINTENA 13

¹La nan di vunna vi sum-wurana lebo vunna vi sunda-wuralawna kaw, la ti-kamda van mayɗi ni, nan ki kawayna hiɗi daray ma ci tiŋ-tiŋŋa ɦawa nala.

²La nan ka hiɗi vulda kay di vun jobta-Lawna, la nan ka hiɗi wida vi sle ma ŋayayna hiɗi wida tara'a tara'a kaw, la vida vanu as kay jok hiɗiyn goyo kaw, la ti-kamda van mayɗi, nan mi va waa'a.

³La nan vul slena van kaf kay tina vi sa hawna kaw, la nan vul tuwan kay ŋal goyo kaw, la ti-kamda van mayɗi, slen kayni as lan va ŋaa'a noŋɗi.

⁴Ti-kamda min ŋalda kiliŋga, ti-kamda li suwarɗi, ti-kamda li hunayɗi, ti-kamda jigal tuwa'ɗi, subur tuwa'ɗi,

⁵na'a li va ma zuloɗi, gar ŋaat kay ya' ɗeŋgaɗi, muɗ ɦiyɗi, var kay va ma jooɗi,

⁶na'a firiya hay bay-ɗigertaɗi, may na'a firiya hay gasita;

⁷na'a vul gida kafe, na'a vi slen kafe, cub hiɗi sle'ta pet, muɗ ɦiy hay zumaldaɗi.

⁸Ti-kamda vat goy noŋɗi. La mi vun-jobta, nam ma vat goyo; la mi vunna, nam ma vat goyo; la ti wida, na' ma vat goyo.

⁹Kay nay wi kayni ne' ne' ɦawa, di vun-jobta kaw ne' ne' ɦawa kaw.

¹⁰May hay li ma sle ma gasin maawa goy haraŋi, sle ma ne' ne'na ma vat goyo.

¹¹Hay li ma nan ay goor tuwa, nan law ki goorgoor nala, nan var ki goorgoor nala, nan li slen ki gurosgurayn nala kaw. May hay li ma nan muɗi ŋolo, nan hin slena vi guraytawa goyo.

¹²Wulini nay ka wi kayni ki hiɗi daraŋgal nala, nay ɗuw guriya. May nay ma wi slen goy vokay haraŋi. Wulini nan wi slen ne' ne', may hay na'ta (ɗawni), nan ma wi goy haraŋi, ki nisi ay wan nala.

¹³May wulini, vida, cubta-sle'ta, ti-kamda; nam ɦidi lakŋi ka'a, may ta ŋolda jaram kayni ti-kamda.