Read Masana 1 KORINTENA 14 Bible Online

1 KORINTENA 14 - Masana bible

1 KORINTENA 14

¹Gargi ti-kamda. Gargi vulda-slugota vi Ŋusta, may suw pet vulda-slugota kay di vun-jobta goyo.

²Kay sa ma law hiɗi vunna, nam law kayni may tam sumunɗi, may tam Lawna, kay sa may humum vunamɗi, may nam dum kayni mi sle ma ŋayayna vi Ŋusta.

³May sa ma di vun jobta-Lawna, nam ka di tam sumuna kay insi kulo'o, kay gatsiya, kay teŋsi irsi kaw.

⁴Sa ma di vunna in tuwam ma kay tuwam ɗeŋŋa kulo'o, may sa ma di vun jobta-Lawna in tapna kulo'o.

⁵Nan min ala nigi kaf ma law hay vunna, may nan min suw pet kayn ala nigi ma di vun jobta-Lawna. Sa ma di vun jobta-Lawna nam ŋol suw sa ma di vunna. La nam may muɗum mi vunna kay in tapna kulo'o hiɗi namɗina.

⁶Wulini ɓosiyonna, la nan co tigiya hay li ma nan ka di hiɗi vun mara'a mara'a, may la yoboy ma ŋayayna hiɗi wida, la vun jobta-Lawna kla, hatta kla, la nan may digitɗi, nigi as fi ŋaat kuɗ kayni arige?

⁷Sle ma li nul hiɗi namna ki difna nala, ki dilla nala, la delem may tiy goy haraŋɗi, san as wi ala buw kayn difna lebo dilla hiɗi yal mige?

⁸May ma togolomna tiy goy haraŋɗi, sa ma as kot tuwam kay duura mi gige?

⁹Nala nigi kaw, la nigi hiɗi vungiya di yoboyn ma goy haraŋɗi, sa fi hum va ma diyna nanige? Nigi law ɗawni goy jar simeɗn ɦawa'a.

¹⁰Vun mara'a mara'a ŋolo ka kay nagata, may ma hum goy haraŋɗi jaram kep kaw mayɗi.

¹¹La nan wi vunna vi sa henɗi, nan muɗi mi jaf mara'a vok sa ma wi vun namna, sa ma di vun namna muɗi mi jaf mara'a vokan nanu kaw.

¹²Nala nigi kaw, hay li ma nigi gar vulda-slugota vi Ŋusta, nigi ma gar a fi ŋolo kay wul Ekklesiyata kulo'o. Nala nigi ma gar kay fi vulda na'ta ŋolo.

¹³Kay na'ta, sa ma law vun mara'a mara'a nam ma siɗawa kay nam fi dum diram goyo kaw.

¹⁴Kay la nan siɗaw hiɗi vun mara'a mara'a, Ŋusta van ka hay siɗawta, may varta vanu mus ɦawa'a, fi gutdaɗi.

¹⁵Nala li litige? Nan as siɗaw hiɗi Ŋusta, may nan as siɗaw hiɗi varta kaw. Nan ma gi nulu hay Ŋusta vanu, nan ma gi nulu hay wida van kaw.

¹⁶Kay la nan gi deɓ mi Lawna hay Ŋusta vanu, sa ma musi hum ɦawana as hot dit ala «Amen» kuɗ gi-deɓta vaŋu bay wi va ma naŋ dumna ir nanige?

¹⁷Gi-deɓta vaŋu na' ŋaa ŋolo, may na' in sa mara kuloɗi.

¹⁸Nan gi deɓ mi Lawna kay nan law vun mara'a mara'a suwgi nigi kafe.

¹⁹May hay dabta vi sa viyna, la nan di yoboyna vasl ɦawa hiɗi varta kay hat segen hiɗi namu, kayni ŋaa'a suw yoboyn ma dum ir birim doogo hiɗi vun mara'a mara'a.

²⁰Ɓosiyonna, lakgi guroyo hay vartaɗi, may lakgi guroyo hay joota, may hay varta lakgi wuli wul.

²¹Ɗot ɗo'aya hay vun-ma-gatna ala: hiɗi sa law vun mara'a, hiɗi vunna vi sum sa pulla, Nan law tam sumuna kayni, Nir na'ta kep nisi ma hum kuɗanɗi. Din Bum-Sumuna[18]

²²La nala, vunna ka kayni kay ɗekka, may kay sa viynaɗi, may kay sa bay-vina. Vun jobta-Lawna ka kayni kay ɗekka kaw, may tam sa bay-vinaɗi, may tam sa viyna.

²³Hay na'ta, la sa viyna pet daka, la nisi kaf di hiɗi vun mara'a mara'a, la sum sa hum ɦawana kla, sum sa bay-vina kla, co kalaf jarsiya, nisi ɗawn ma di ala nigi ɦoyawa naɗi su?

²⁴May la nisi kaf di vun jobta-Lawna, la sum sa bay-vina lebo sa hum ɦawana co kalaf jarsiya, nam as kay lawta visi kafe, vida visi tun kitat kalamu kaw.

²⁵Varta ŋayayta vi dikam ɗawni ma ma goy haraŋi, nam ɗawn ma girif gaa'a siɗaw Lawna, ma li di-goyt ala: Lawn ka jargi gasi.

²⁶Nala litige ɓosiyonna? Hay li ma nigi dak tuwgiya, la sa gigekaw ka hiɗi nul ma giyna kla, hatta kla, ɗek-goy sle ma ŋayayna kla, di vun (mara'a mara'a) kla, muɗ vun goyo kla, hin slen pet li'e hay inda vi tuwgi kulo'o.

²⁷La san law hiɗi vunna mara'a mara'a, hinsi li ma' lebo la suwi ŋolon ɦidi, hen ma law bugol hena, sa hena as muɗum goyo may.

²⁸May la sa ma fi muɗum goy mayɗi, nam ma mus kiliŋ hay dakka vi sa viyna, hinim law jar-tuwam hiɗi Lawna.

²⁹May la si sa jobta-Lawna, la nisi ma' lebo ɦidi kaw hinsi lawa, sum segen ma poŋ ir sle ma nisi dumna.

³⁰Sa hena ma ka musi damna, la ŋusta ɗek sle ma ŋayayna kiramu, hay na'ta sa ma jewna ma ziŋa.

³¹Kay nigi kaf as di vun jobta-Lawna bugol tuwgiya, kay sumuna kaf ma fi hatta, ma fi gatta kaw.

³²Kay ŋusta vi sa jobta-Lawna hum kuɗ sa jobta-Lawna kaw.

³³Kay Lawna may mi Lawna vi gijum-gijumtaɗi, may Lawna vi toyta. Ki hay tapna vi sa peldetna kaf nala.

³⁴Nigi ma hin boyna lak kiliŋ hay dakka vi tapna, nisi may as kay kus yoboynɗi, may huma hay hot yamda gaata, ki gatta di nala kaw *[19]

³⁵May la nisi min job kay hum caw va'a, hinsi job jufaysi vo'o, kay la cata kus yoboyna hay dakka vi sa viyna kayni zulo'o.

³⁶Nanige? Yoboyna vi Lawna may goy vigi pa su? Lebo nam co kayn katgi nigi kep tuta su?

³⁷La san var ala nam mi sa jobo lebo dum ti Ŋusta, nam ma wi ala slen ma nan ɗom tan kayni mi vun-ma-gatna vi Bum-Sumuna.

³⁸La san wi kaynɗi, Lawn wumɗi kaw.

³⁹Kay na'ta ɓosiyonna, gargi kay di yoboyn jobta-Lawna, telgi sa kay di hiɗi vunnaɗi kaw.

⁴⁰May hin slen pet li ŋaa'a hay liyamu.