Read Masana 1 KORINTENA 15 Bible Online

1 KORINTENA 15 - Masana bible

1 KORINTENA 15

¹Ɓosiyonna, wulini nan min gigi humgi kay labara ma firina ma nan kusum tigina, ma nigi vumna, ma nigi ka lakay hayam wulini,

²Nigi fi su'dawa hiɗi namu kaw, la nigi vi dono'o hiɗi yoboyn ma nan kusum tigina, la naɗi vida vigi goy waa'a.

³Va ma jewn kayn ala nan vul tigiya va ma nan kaw fumna: Kayn ala Kristu miti kay sulukŋa vaya, ki ɗota di nala,

⁴nam piy gaa'a, nam dayay kulo'o kaw hay buurta ɦidita, ki ɗota di nala,[20]

⁵nam vul tuwam kir Kefas, bugolda kir sa doogo yam ma'na.

⁶Bugol kayni nam vul tuwam kir ɓosiyom tuwsina suw kis-vasl hay liyn kepe, ŋolsiya ka iriya ta-ta wulini, may segena kali sene kaw.

⁷Bugol kayni nam vul tuwam kir Yakub, bugolda kir sa Apostolayna kaf.

⁸Bugolsi kaf nam vul tuwam kiran nanu, nan ki goor ma vuɗi hiɗi tilam hini vokomu nala.[21]

⁹Kay nanu mi ma kiɗayna jar sa Apostolayn kaf, nan nagay a sa yan Apostolɗi kaw, kay nan li tapna vi Lawn lasi.

¹⁰May kuɗ slugota vi Lawna, nan ka hay liyanna dok-doko, slugota valam ta nam la' kanta nam may la' goy sur waaɗi, may nan li lopawa suwsi kafe, may mi nan kay tuwanɗi, may ti slugota vi Lawna ta ka hiɗi nanu.

¹¹Kuɗ kayni, la mi nanu, la nisiya kaw, kayni ti kusta vuma'a, kayni mi va ma nigi vumu.

¹²May la yoboyna kusi ala Kristu dayawa kulo'o hay mitta pa, segen jargiya fi di ala dayta-kulota vi sa mitin tayɗi kayn nanige?

¹³La dayta-kulota vi sa mitin tayɗi, nala Kristu kaw bay day kulo'o.

¹⁴May la Kristu bay day kulo'o, nala yoboyna ma numa kusumna kayni waa'a kaw, vida vigiya waa'a kaw.

¹⁵Nala numa kaw muɗi si sum sa ka sin tam Lawna, kay numa li di-goyt kalam ala nam day Yesu kulo'o, may doli nam bay dayam kulo'o, la sa mitin may day kuloɗi.

¹⁶Kay la sa mitin day kuloɗi, Kristu bay day kulo'o kaw.

¹⁷May la Kristu bay day kulo'o, vida vigi kayni waa'a kaw, nigi ka hay sulukŋa vigi tuwa kaw.

¹⁸Nala nisi sa kali sene hay Kristu nisi baawa goyo kaw.

¹⁹La nay ka hiɗi cubta-sle'ta hay Kristu kayni kuɗ irita ta hay nagat tanta ɦawa, nay muɗi haw ŋolo suw sum segen kaf.

²⁰May wulini Kristu dayawa kulo'o hay mitta pa dayna, nam muɗi vun-jaf ma niyi jewna jar sa kali senna.

²¹Kay mitta maawa kuɗ san kepe, nala dayta-kulota vi sa mitina maawa kuɗ san kepe kaw.

²²Kay ki kaf mit hay Adam, nala kafe ma muɗ iriya hay Kristu kaw.

²³May gigekaw col hay liyna valamu valamu: Kristu mi vun-jaf ma niyi jewna, bugolda sa fi Kristuna (ma day kulo'o) hay mata valamu.

²⁴Bugolda dabaŋ-gu'ta ma ma'a, hay li ma nam ma vul mulda tam Lawna Bumna, hay li ma nam ma vat sle ma ŋulona hiɗi sle ma donona hiɗi sle ma gaŋeraŋa goy kaf vatna.

²⁵Kay la litigekaw nam ma ti mulda ta-ta nam cuk sa gawt kalamna gaa kuɗ wur-selemu.

²⁶Mitta kayni ti gawta ta nam ma vata' goy bugol kafta.

²⁷Kay na'ta Lawn cuk slenawa kaf gaa kuɗ wur-selemu. May hay li ma nam di ala nam cuk slenawa kaf gaa kuɗ wur-selemu, kayn di ala nam ma cuk slen gaa kuɗ wur-selemu may hayɗi.

²⁸May hay li ma nam (Lawna) cuk slenawa gaa kuɗ wur-sem Goora cukŋa, Goora kaw ma hot yalam gaa kuɗ nam ma cukum slen gaa kuɗ wur-selemna, nala Lawn ma mus mul kay slen kafe.

²⁹Nisi sa hin tuwsi li baptisma kay sa mitina, nisi ma li linige? La sa mitin day kulo noŋɗi, nisi hin tuwsi fi baptisma kisiya kay mige?

³⁰Numa hin tuwma tuɗ vun mitta dok-dok kayn kay mige?

³¹Hay buurta kaf nan ka vun mitta, ɓosiyonna, la nan fi subur tuwanu kigi nigiya, nan as subur tuwan hay Bum-Sumuna vaya Yesu.

³²Nan dur hiɗi muura hay Efesus,[22] la kayni kuɗ yalda vi sana, nan as fum kuɗ kayni mi mige? La sa mitin day kuloɗi, nay taya, nay caya kaw, kay jifini nay ma mita.[23]

³³Ɗut tuwgi goyɗi, poy hiɗi nuriyom sa joona ɓulak varta vi sa ŋaana.

³⁴Hotgiyay hay hagata, ki sum sa ɗigera nala, ligi sulukɗi, kay sara'a may wi Lawnɗi. nan di kayni kay nigi ma muɗ zulo'o.

³⁵May san fi di ala: Sa mitina day kulo'o ir nanige? Tuwsi ma nisi ma goy hiɗi namna ir nanige?

³⁶Naŋ sa ma ɦay-ɦayna, jaf ma naŋ cukum gaana, hot muɗ iri bay mitɗi.

³⁷Hay li ma naŋ cuk jaf gaa'a, naŋ cukum kayni may mi tuwam ma day kulonɗi, may mi wal-jafna ɦawa, la mi jaf alkamare kla, la mi jaf mige kla.

³⁸May Lawna vulum tuwna ki nam min nala, tam jafn marige nam vulum tuwna kuɗ jafamu jafamu.

³⁹Tuwna kuɗ jafam valamu valamu. Tuw hena hay sana, tuw hay muura, tuw hena hay layayna, tuw hena hay kulufna kaw.

⁴⁰Tuw ma wuralawn ka'a, tuw ma nagatna ka kaw, tuw ma wuralawna gajijita valam ir valamu, tuw ma nagatna gajijita valam ir valamu kaw.

⁴¹Wileta vi fatta ir va'a, wileta vi tilla ir valamu; mislekŋa kaw wileta valamu may ŋrayɗi.

⁴²Dayta-kulota vi sa mitina kaw nala, tuwsi cuki gaa'a hay ɓulakka, may nisi ma day kulo hiɗi ɓulakɗita.

⁴³Tuwsi cuki gaa'a hay zulota may nam day kulo'o hay gajijita, nam cuki gaa'a hay maŋayta, may nam day kulo'o hay gaŋeraŋa.

⁴⁴Nam cuki gaa'a hay tuwna ma sliwna, may nam day kulo'o tuw ma ŋusta, kay tuw ma sliwna ka'a, tuw ma ŋusta ka kaw.

⁴⁵Ki ɗot ɗo'ay nala ala: Sa ma jewna Adam muɗi goy ciwta irita, Adam ma cawna muɗi ŋusta ta vul irita.[24]

⁴⁶Sa ma hiɗi ŋusta may co jewɗi, co jew mi ma bay-ŋusta, ma ŋusta co bugolda.

⁴⁷Sa ma jewna yawamay goy hay nagat pa, nam vi nagata, sa ma sem ma'na may vi wuralawn pa may.

⁴⁸Nisi sa fi nagatna ka ki nam ma may goy vi nagat pana nala, nisi sa fi wuralawna ka ki nam may goy wuralawn pa nala kaw.

⁴⁹Ki nay sli tuw nam ma kotom hay nagat nala, nay ma sli tuw nam ma may wuralawn pa nala kaw.

⁵⁰May ɓosiyonna nan min digi ala: Hay sliwna hiɗi busuwna, san as yaw vocota hay mulda-Lawnɗi. Ɓulakka as yaw vocota hay ɓulakɗitɗi.

⁵¹Humgiya, nan min digi va ma ŋayayna: Nay ma kal sen kafɗi, may nay kaf ma muɗa,

⁵²Ir liyn neeɗa ɦawa, ki san li iram mirik' nala, kuɗ buwna vi togolomna ma cawna. Kay togolomna ma buwa, sa mitina ma day kulo'o hay ɓulakɗita, nay kaf ma muɗa.

⁵³Kay nanige kaw ma ɓulakay tanna ma cuk ɓulakɗita talamu, ma mit tanna ma cuk mitɗita talamu kaw.

⁵⁴Hay li ma nam ma ɓulak tanna ma cuk ɓulakɗita talam cukŋa, hay li ma nam ma mit tanna ma cuk mitɗita talam cukŋa, hay na'ta yoboy ma ɗoy tani vunam hobawa goyo, (yoboy ma ala): Mitta piy gaa hay kolda,

⁵⁵Nak mitta, jarfayna vagu ka arige? Nak mitta kolda vagu ka arige?[25]

⁵⁶May jarfayna vi mitta kayni mi sulukŋa, gaŋeraŋa vi sulukŋa kayni mi vun-ma-gatna.

⁵⁷May gi deɓ mi Lawna ma vulay koldawa hay Bum-Sumuna vaya Yesu Kristu.

⁵⁸Hay na'ta, ɓosiyon sa hayan kigina, lakgi dono'o, ge'ɗi, wulgi vokgi dok-dok hay lopna vi Bum-Sumuna, kay nigi wi ala lopna vigiya hay Bum-Sumuna li goy sur waaɗi.